1 Korinto 10 - Mazu Otchena a Mulungu

Jokokomeza ira atu omuroromela Yesu kahavolowe muwari mwa jabure jaira atu amohiwa

¹ Miyo abalaga nnafuna muumbuwele ira makolo ehu a wanle kakumaga Ijipitu, atene kohosogolrelriwa na murambo eto kagafwannye bara, kohovolowa, kalambuwaga.

² Muwari mosogolrelriwa na murambo mbara mule, tapulela ira atu atene kohobatiziwa ira kakale atu osogolrelriwa na Mozeji.

³ Kagalambuwile, atene kohodja udja umohive warumile Mulugu.

⁴ Atene kohong'wa mahindje mamohive Mulugu arumile liye ira kakume munibweni. Nibwe nne narumiwe na Mulugu eto nawenda vamohi na aliwa. Eto fwanyeya ira Nibwe neno nali Kiristu.

⁵ Masiki eno Mulugu ohatakaleliwa oindjiva na joira jiwa. Kohofiyeda piwa, maningo ewa kala gwembelre gwembelre muisalesaleni.

⁶ Jatene ejo jaireya ira jikale jofwalrafwaniha ira hiyo nagavwile, nahakale atu otamangela jabure nnga atu anne.

⁷ Kamukale atu ohara vikwamutu josema nnga jairile aIzarayeli amohiwa wanle. Kalaga nnga ilrembiwe mMazuni ira: <<Kohogaratigi aliwa roma sakanya pwando yewa kadjaga jakutenle atu ikwamutu yosema ile eto kang'waga. Eto kohovenyaga ira kawalredege.>>

⁸ Hiyo kanikaleni atu oraruwa nnga vire afwihu a malambo a mundulrimu. Na mwasa oraruwa, Mulugu siku nimohi ohapa atu 23.000.

⁹ Eto kanikaleni atu omuxixa Kiristu nnga jairile afwihu a malambo a mundulrimu. Na mwasa omuxixa, dohokalawo nyowa dazile roma atolotchaga.

¹⁰ Teto kanikaleni atu omung'ong'oha Mulugu. Tchoira na mwasa omung'ong'oha Mulugu, ukala maliba atolotcha atu Mulugu amurumile liye, wenno adowile atolotcha atu atene kamung'ong'ohile.

¹¹ Jatene eji jaaireyele ira jikale jofwalrafwaniha eto jilrembiwele para hiyo atu a tchineneva, hiyo atu okalawo matempu ogomiheda ala ira niwendjele, nahairena makalelo abure kaira afwihu.

¹² Nona mutu unaviona ira dihiimela, inafwanela aing'ane pama makalelo aimenle liye tawiha ira unagwe.

¹³ Xixiwa unaxixiwa nyo, na atu atene anaxixiwa na makalelo amohive. Mulugu mbwenye gororomeleya, liye kanauhiyani ira muxixiwe na makalelo ohowanda nyo vilela mbwenye muwari moxixiwa mule, Mulugu unerege uvahani makalelo anafuna nyo xolra xixiwa ule ira muwande vilela.

¹⁴ Nona nyo atu anauziveliwani miyo, nnouwandelani ira mutawe ja vikwamutu josema.

¹⁵ Nnawonga na nyo nnga nnawonga na atu oonelramo. Mazu anawonga miyo ala inafwanela mwahala, muumbuwele pama.

¹⁶ Muumbuwele zela kopo ya mareliho yenno nnarelihetcha hiyo nadjaga seya wa Nabwiya. Hiyo natukulaga kopo ile ning'waga, nnang'wa muwari mogumanihiwa na sangiri na Kiristu. Eto nadjaga pawu, nnadja muwari mogumanihiwa na maningo a Kiristu.

¹⁷ Muwari moira pawuwa inadja hiyo tchi imohive bahi, na hiyene masiki nagalive adjindji, nnafwanyeya nagali maningo mamohive, mwasiwa nnadja pawu imohive.

¹⁸ Inafwanela muumbuwele jinaira azarayeli. Ale anadja mikuto anarumelela mabasa analabiwa vaibuwani.

¹⁹ Dawongaga eno kodi miyo nnawonga ira jodja jikuteliwe vikwamutu josema jihimala nongeya? Kodi nnawonga ira ikwamutu yosema tchi yengo yokalawo? Nari.

²⁰ Inawonga miyo, nnawonga ira atu ohombalra Mulugu, kakutelaga vikwamutu josema mikuto diwa, anakutela minemba dabure. Kinamukutela Mulugu. Miyo eto kannafuna ira nyo murumelelege mabasa a minemba dabure.

²¹ Kakalevo unang'wa kopo ya Nabwiya vamohi na kopo ya minemba dabure. Kakalevo unadja jodja ja meza ya Nabwiya vamohi na jodja ja meza ya minemba dabure.

²² Kodi nnafuna nitatamule sandje ya Nabwiya? Kodi nnaumbuwela ira nihikana kopolo domukwaranya liye?

Mutu omuroromela Yesu airegena jatene ira Mulugu ateteliwe

²³ Atu anowongetcha ira: <<Jengo jatene jinorumelihiwa ira mutu airegena.>> Mbwenye kahi ira jatene jinomulabela mutu yengo. Atu anowongetcha ira: <<Jengo jatene jinorumelihiwa ira mutu airegena.>> Mbwenye kahi ira jatene jinonilimbiha.

²⁴ Kakalevo mutu unafuna viziveliha ekave. Mbwenye inafwanela mutu awande muziveliha nfwaye.

²⁵ Mudje nyama yenno inagulihiwa merkado mwahafukile yengo tawiha ira munoza mukayena yowanganyeda.

²⁶ Mwasiwa Mazu anawonga ira: <<Ilambo ya vati yatene nari jatene jilimo, mwinnya gu Nabwiya.>>

²⁷ Akala nfwawo ahanamuroromela Yesu unouitanela tchima, wafunaga dja, uperuwe wadje inavahiwa we wahafukile tawiha ira unoza ukayena yowanganyeda.

²⁸ Mbwenye akala we wahanadje, ukalawo unauwandela ira: <<Nyamela tchokuteliwa ikwamutu yosema>>, weyo kudje na mwasa wa wenno uuwandenle eto tawiha ira unoziha yowanganyeda.

²⁹ Dawongaga zela ziha yowanganyeda, kannawonga ira weyo unokana yowanganyeda, nari. Mbwenye nnawonga zela wenno uuwandenle. Tchoira miyo kannatongiwa na mutu mmohiwa zela inawanda miyo irana.

³⁰ Akala nnowanda mutamalelana Mulugu zela inadja miyo, mwasiwa gwa nni unafuna miyo sumululiwa zela yenno inamutamalelana miyo Mulugu?

³¹ Nona ilukuluwa, wadja, wahadje, wang'wa, wahang'we, masiki joira jawo jatene, uiregena jatene ira undimuwa wa Mulugu uoneye.

³² Kamuirena yengo yoagwagwadutcha aJudewu, nne atu ohokala aJudewu, nne nikuru na Mulugu naye.

³³ Kalaga nnga miyo. Miyo dairagana joira jaga jatene, nnairela ira atu atene kaziveliwe. Kannairana jofuna jaga meka, mbwenye nnairana joira ira atu kadiona, oindjiva kawande vulusiwa.