1 Korinto 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo, mutu osakulriwa mofuna mwa Mulugu ira dikale namarumiwa wa Yesu Kiristu. Dili vamohi na mbalihu Sostene.

² Nnoulrembelani nyo nikuru na Mulugu, atu atene otchenihiwa muwari mokala muwari mwa Kiristu munafwanyeya sidadi ya Korinto. Mulugu usakulrani nyo ira mukale atu otchenihiwa vamohi na atu atene oitana nzina na Nabwiya wehu Yesu Kiristu wenno uli Nabwiya wa hiyo eto uli Nabwiya wa atu amohiwa atene anno anamuitana.

³ Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

Pawulo omutamalela Mulugu na mwasa wa aKorinto omuroromela Yesu

⁴ Miyo nnomutamaleletcha Mulugu waga na mwasa wa nyo zela sayi datene Mulugu duireleni liye muwari mwa Yesu Kiristu.

⁵ Tchoira muwari mwa liye, Mulugu uwanda urelihani na makalelo matene ira muwandege wonga jowonga jaye jatene eto muwandege onelramo jatene.

⁶ Nona muhufiyeda kana ibaribari zela jatene jene jinalaleya hiyo zela Kiristu.

⁷ Muwari mwa sayi da Mulugu, kilivo yolemelela Mulugu yahauvahileni liye. So malambwala munnana dediha za wa Nabwiya wehu Yesu Kiristu

⁸ wenno unafuna aukoyeni fiyeda magomelo wa jatene ira siku nnafuna za Nabwiya wehu Yesu Kiristu nyo mwahafwanyeyena mulandu vamentoni va Mulugu.

⁹ Wenno uitanileni ira muze muwandane na Mwanaye Nabwiya wehu Yesu Kiristu, gu Mulugu ororomeleya.

Pawulo ohawandela aKorinto ira kahiye makalelo ogawaneya kanna atu

¹⁰ Miyo abalaga, nnoukokomezani nyo mwatene na nzina na Nabwiya wehu Yesu Kiristu ira inafwanela nyo mwatene muvwananege. Kavikale gaweya muwari mwa nyo. Inafwanela mukayena joumbuwela jimohive na mirima dimohive.

¹¹ Ira diwonge eno, tchoira kohokalawo atu kadifwannye kakumile mwa nyo vande va Kolowe, aliwa diwandela jinereya muwari mwa nyo abalaga ira muhuroma haraharana.

¹² Haraharana unawongiwa, ku wonga nyo muhuroma gaweya malogo, malogo. Nnovwa ira ukala nlogo nimohi nnawonga ira: <<Miyo dili wa Pawulo.>> Nlogo nimohi nnawonga ira: <<Miyo dili wa Apolo.>> Nlogo nimohi nnawonga ira: <<Miyo dili wa Peduru.>> Nlogo nimohi nnawonga ira: <<Miyo dili wa Yesu Kiristu.>>

¹³ Kodi Kiristu uhugaweya? Nari, kagaweyile. Nnga nyo ukwenleni gu miyo Pawulo? Nari. Owu hehi kodi mubatiziwe na nzina naga? Nari.

¹⁴ Miyo nnomutamalela Mulugu mwasiwa dagali na nyo kadaabatizile atu oindjiva. Dimbatizile Kirisipu na Gayo bahi.

¹⁵ Ihikala pama mwasiwa kalivo unafuna wonga ira: <<Miyo dibatiziwe na nzina na Pawulo.>>

¹⁶ Miyo eto nnoumbuwela ira dohabatiza atu a vande va Estefano. Hiya atu anne, akala dahabatiza atu amohiwa, kannawanda umbuwela.

¹⁷ Tchoira Kiristu adirumaga, ilukuluwa kadirumile ira daabatizege atu mbwenye adirumile ira dilaleye Muselu Wapama. Muwari molaleya mule, kadirumiwe ira dilaleye na zelru doriya da atu ira atu kazaga, kaharege zelru dile. Dahalaleyege na mazu oriya, yakalege nnga muselu wa ukwa wa Kiristu kanna kopolo doavulusa atu.

Zelru da atu a mwilamboni kadinna mabasa

^18-19 Tchoira atu anne anadowa matolotchiwelo kavwa muselu wa ukwa wa Kiristu vamuradini anaona nnga uzimora. Jejo jinafwalrafwana na mazu a Mulugu kalrembiwe mMazuni oira: <<Miyo nnoza dinonge zelru da atu anne anna zelru. Miyo nnoirana ira aliba onelramo kahawande onelramo.>> Mbwenye hiyo atu nnavulusiwa, naumbuwela zela muselu wa ukwa wa Kiristu, nnowanda iziwa ira ukwa wa Kiristu ti kopolo da Mulugu dedo nnanivulusana liye.

²⁰ Mwilamboni muno mukala aliba toto, aliba fundjiha malamulo, aliba wanela mazu. Nnga atu anno mwaaona ante peno kagomele avi? Kinna mabasa. Mwasiwa Mulugu uhusandutcha zelru da ilambwela ira dahakayena mabasa.

²¹ Tchoira Mulugu na zelru daye kafunne ira atu kaiziwe ibaribari mwa zelru dewa da ilambo ya vati. Evale Mulugu opiya zelru ira aavuluse atu anaroromela muselu unalaleya hiyo, muselu wenno atu a mwilamboni anaona atu nnga uzimora.

Ona wa atu ohomuroromela Yesu na omuroromela Yesu zela kwa wa Yesu

²² Tchoira aJudewu ira karumele yengo, anafuna nnga iireye ionihedo. Eto atu ohokala aJudewu ira karumele yengo, anafuna karome vwa zelru da ilambo ya vati.

²³ Mbwenye hiyo nnalaleya muselu wa ukwa wa Yesu bahi. AJudewu kavwa muselu wa Kiristu, para aliwa inakala nnga nigodo nnafuna atu gwagwaduwana. Eto atu ohokala aJudewu kavwa muselu wa Kiristu, anaumbuwela nnga uzimora.

²⁴ Mbwenye zela aJudewu nari atu ohokala aJudewu anne aasakunlre Mulugu, naalaleya ukwa wa Kiristu, Kiristu unafwanyeya agali kopolo da Mulugu eto unafwanyeya agali toto da Mulugu.

²⁵ Tchoira toto da Mulugu dedo nnaona atu nnga uzimora ti zelru dokwaranya zelru da atu. Eto kopolo da Mulugu dedo nnaona atu nnga dovuta ti kopolo dokwaranya kopolo da atu.

²⁶ Abalaga kaumbuwelani, Mulugu auitanagani ira muvulusiwe, nyo mwali avi? Oindjiva mwa nyo kamwali atu okana zelru da ilambo ya vati, nne oindjiva kamwali atu okana izo, nne oindjiva kamwali atu obaliwa muzizani mwa andimuwa a ilambwela.

²⁷ Mulugu mbwenye ohosakulra jengo jejile jinalramwisa atu nnga jengo johokana zelru ira ejo jaanyaswihege ale anaviona nnga a zelru. Mulugu ohosakulra yengo inalramwisa atu nnga yengo yovuta ira yengo yenno inyaswihege ejo jaona atu nnga ti jengo ja kopolo.

²⁸ Mulugu ohosakulra jengo jing'ining'ini, ejo jinalramwisa atu, ejo jinaona atu nnga jengo johokana mabasa ira muwari mwa jing'ining'ini jile awande nonga mabasa matene a atu.

²⁹ Mulugu airagana eno ali ira ahakalevo mutu owanda vititimiha vamentoni vaye.

³⁰ Zela nyo mbwenye, Mulugu uhuvahani ingumi muwari mougumanihani na Yesu Kiristu. Mulugu eto usakanya ira Kiristu akale zelru dehu na upama wehu, nitchenihiwe muwari mwa liye eto niwomboliwe muwari mwa liye.

³¹ Nona mutu unafuna hiyo mutitimiha gu Kiristu bahi. Kalaga nnga ilrembiwe mMazuni ira: <<Inafwanela wenno unafuna vititimiha, avititimihe muwari mwa Nabwiya.>>