1 Amwene 7 - Mazu Otchena a Mulungu

Salomawu ohomanga Palasiyo

¹ Salomawu ohomala yaka kumi na taru amangaga nyumba daye, nyumba dile, aliwa mala mangiwa.

² Muwari mwa nyumba daye dile, liye ohomanga Nyumba ya Guguru ya Libano. Nyumbele molapela muwa ali mameturu 45. Eto rambalala uwa ali mameturu 22 na meya eto regama uwa ali mameturu 13 na meya. Nyumbele yamangiwe vazulu va malinya mannayi a mizati da seduru eto vazulu va mizati dile vagali miranda da seduru.

³ Eto vazulu va miranda vale kohelavo matabwa a seduru. Fwanyeya ira miranda dile kagaratile vazulu va mizati. Miranda dile kafwanyeya kagali 45 motandeya malinya 3, kada linya nanna miranda 15.

⁴ Eto kohokalawo maandare mararu otandana. Kada andare anna linya nimohi na majanela, kala malinya mararu a majanela. Kada janela naing'anana na janela nfwaye kwakwanelaga ndendende.

⁵ Eto misuwo datene dene lapa uwa no rambalala uwa wokwakwanela. Sawasawa majanela atene lapa uwa no rambalala uwa wokwakwanela. Majanela ale kafwanyeya na malinya mararu; atene kwakwanelaga ndendende.

⁶ Noira enne, Salomawu ohosakanyaga Sala ya Mizati. Lapa uwa ali mameturu 22 na meya eto rambalala uwa ali mameturu 13 na meya. Sala ile yohokana eto nikonde sogolro uwa, naganna mambozo malukulu.

⁷ Ohosakanyaga eto sala yaitaniwa Sala ya Mpando wa Umwene, nari Nimburo Notonga, vevo Salomawu atongetcha liye. Sala ile yasakanyiwe na matabwa a seduru kuma vati fiyeda zulu.

⁸ Eto nyumbaye mwakala liye, amangile muwari mwa ntando neno nafwanyeya hela wa Nimburo Notonga nne. Nyumbaye ile yasakanyiwe na makalelo mamohive nnga Nimburo Notonga. Eto Salomawu ohomusakanyela muhiyanaye wenno ali mwana Farawu nyumba yolingana na Nimburo Notonga nne.

⁹ Eto mabasa matene omanga ale, ohononga kobiri idjindji mwasiwa alabilena mabwe apama ogwadiwa mopimiwa pama eto okwakwanelihediwa pama unde na muwari, kuma vati varomile imetchiwa aliserisi fiyeda mulringotini eto kuma unde fiyeda muwari mwemo mwafwanyeya ntando nlukulu.

¹⁰ Eto maaliserisi ale kohononga kobiri idjindji, mwasiwa kasakanyiwe na mabwe apama, mabwe malukulu, mabwe okana mameturu mararu na meya na mameturu mannayi na meya agali molapela muwa.

¹¹ Eto vazulu va aliserisi vale voheliwa mabwe apama ogwadiwa kagapimile pama vamohi na miranda da seduru.

¹² Eto ohokalawo muru awerewera ntando na nyumba ya Salomawu vamohi na muru mmohiwa awerewera ntando na Nyumba ya Yehova vamohi na muru mmohiwa awerewera nikonde nafwanyeya vasogolro va Nyumba ya Yehova. Miru damiraru dene dasakanyiwe na malinya mararu a mabwe, amala linya nimohi na miranda da seduru, amala malinya mararu a mabwe, amala linya nimohi na miranda da seduru, gwelagave eno fiyeda mala.

Mabasa a mulombwana Hirawu

¹³ Eto mwene Salomawu ohorumihaga milanyo ira kamudowele mulombwana mmohi aitaniwa Hirawu, nkuda Tiru.

¹⁴ Mulombwana Hirawu babaye ali nkuda Tiru mmohi akwile wanle wenno ali maliba iziwa pama labana mukuwa. Eto mmaye ali makwele wa nlogo na Nafitali. Mulombwana Hirawu ali mutu oiziwetchetcha manga pama eto wa toto eto oonelramo mabasa olabana mukuwa. Evale agaitaniwile, ohodowaga liye laba mabasa matene anfunana mwene Salomawu.

¹⁵ Mulombwana Hirawu ohosakanyaga mambozo menli a mukuwa. Kada nimbozo lapa uwa para zulu ali mameturu matanu na mararu.

¹⁶ Eto ohonyungulrutcha mukuwa, liye sakanya matimwati ira kaheliwe vazulu va mambozo ale, kada ntimwati nanna mameturu menli na meya.

¹⁷ Eto kada ntimwati neno nakala vazulu va nimbozo, nohoriyihiwa na ntavi na mukuwa vamohi na makurenti a mukuwa.

¹⁸ Liye eto ohotukula mukuwa, liye sakanya jofwalrafwaniha ja jovaha ja mutengo wa romaya. Liye garatiha malinya menli a jovaha jile vazulu va kada ntimwati na nimbozo.

¹⁹ Matimwati a mambozo kafwanyeya munikondeni mule, ali jokala nnga folori da liriyo, eto lapa uwa ali wandamelana mameturu menli.

²⁰ Matimwati ale aliwa kohodowaga, aliwa hela vazulu va mambozo. Eto vati va ntavi na mukuwa vale, va kada magomelo wa nimbozo morungunuwa wohokala malinya menli a jofwalrafwaniha ja jovaha ja romaya jasakanyile atu na mukuwa. Kada linya nohokana jofwalrafwaniha jokwakwana 100 jahenle atu, va malinya menli kala 200.

²¹ Mulombwana Hirawu oimetchaga mambozo menli a mukuwa ale va mavolowelo va Nyumba ya Yehova vale. Nimbozo nafwanyeya pandi ya suli, liye avahile nzina na Jakimi eto nimbozo nimohi niwa na pandi ya norti nne naitaniwa Bowazi.

²² Vazulu va mambozo vale vafwanyeya jofwalrafwaniha ja folori da liriyo jile. Mwa enne mabasa matene a mambozo ale kohomala.

Tanki ya mukuwa

²³ Mulombwana Hirawu ohosakanyaga eto tanki yorungunuwa. Asakanyedile muwari momiminela mukuwa muforumani. Diha wa tanki ile ali mameturu menli na masentimeturu 20 eto rambalala uwa ali mameturu mannayi na meya. Eto werewera uwa ali mameturu kumi na mararu.

²⁴ Eto vati va milomo da tankile vohokala malinya menli a mangu a mukuwa anno kasakanyediwe vamohi na tanki ile tempu yamiminela atu mukuwa muforumani mule. Va kada meyu meturu, kohelavo mangu kumi anno kasakanyediwe muwari mwa foruma ile, aliwa kala pesa imohive na tankile.

²⁵ Tankile yagaratihiwe mmitanani mwa ng'ombe kumi na mbinli da mukuwa. Ng'ombe taru daing'anile pandi ya norti, taru pandi ya suli, taru pandi ya makumelo wa nzuwa eto taru mavirelo wa nzuwa, matawo matene a ng'ombe dile kera ing'anana.

²⁶ Eto indivala wa tanki ile ali jibuno nnayi. Eto milomo da tanki ile darungunuwele unde nnga mmilomoni mwa kopo, owu nari nnga folori da liriyo. Tanki ile mahindje kayamo ali okwakwana nnga malituru 40.000.

Karinya da mukuwa

²⁷ Mulombwana Hirawu ohosakanya eto karinya kumi da mukuwa. Kada karinya molapela muwa no rambalala uwa ali wandamelana mameturu menli. Eto lapa uwa dowa zulu ali meturu imohi na meya.

²⁸ Karinya dile sakanya uwa kairana eni. Kohosakanyeda maxapa a mukuwa mannayi, aliwa agumaniha pandi dannayi dene na mukuwa mmohiwa.

²⁹ Maxapale koholrembiwa jofwalrafwaniha ja apodogoma, ng'ombe vamohi na akerubi. Eto vazulu va jofwalrafwaniha ja apodogoma na ng'ombe dile vamohi na vati viwa vohokala jolremba joluweya.

³⁰ Eto va kada karinya yohokana maroda mannayi a mukuwa vamohi na mawenxo a mukuwa. Eto mmwendoni mwannayi mwene mohokala pinyingalra da mukuwa ira kagaratihegemo basiya. Eto pinyingalra dile dohomala riyihiwa na jolremba joluweya.

³¹ Eto muwari mwa karinya ile mohokala nimburo nowerewera, diha uwa ali masentimeturu 45. Eto rambalala uwa ali masentimeturu 70. Eto unde uwa ule wohokala jonyungulutcha ja jengo jafwanyeya mwemule. Maxapa a mmambalo mwa karinya ile kafwanyeya kagali a kwadaradu hiya kala orungunuwa.

³² Maroda a karinya ale ulukula uwa ali masentimeturu 70 eto kafwanyeya vati va karinya, eto mawenxo a karinya ile, kasakanyile muwari moira ikale pesa imohive na karinya ile.

³³ Maroda ale kasakanyiwe nnga maroda aaterelado. Eto mawenxo, na kubu, na majanti vamohi na marayiliwa ali osakanyiwa na mukuwa onyungulrutchiwa.

³⁴ Eto wohokala jolimbihana nnayi jafwanyeya mmwendoni vati va kada karinya. Kada kanto yohokana yolimbihana imohi. Jolimbihana jile jasakanyediwe nnga pesa imohive na karinya ile.

³⁵ Eto wohokala sintu na mukuwa narungunutchile atu mmilomoni mwa basiya nafwanyeya mukarinyani mule. Sintu niwa regama uwa ali masentimeturu 22 kuma muwari mwa karinya mule. Jolimbihana jile vamohi na maxapa ale, jatene jadowa vamohi limbaga nnga pesa imohive.

³⁶ Eto kohosemamo jofwalrafwaniha ja akerubi na apodogoma, vamohi na minazi vazulu va jolimbihana jile vamohi na vamaxapani va mukuwa vale. Jofwalrafwaniha jile johorungunuwihiwa na jolremba joluweya.

³⁷ Ala ali makalelo asakanyile liye karinya kumi dile. Karinya datene dedile ulukula uwa na makalelo matene dera kwakwanela, mwasiwa dasakanyiwe na mukuwa onyungulrutchiwa molabana na mpimo mmohive na foruma imohive.

³⁸ Eto noira enne mulombwana Hirawu ohosakanya mabasiya kumi a mukuwa. Kada basiya kayamo malituru okwakwana 800. Rambalala uwa ali meturu imohi na masentimeturu 80. Kada karinya yatukula basiya nimohi.

³⁹ Liye tukula karinya tanu dowa hela pandi ya suli ya Nyumba ya Yehova eto karinya dimohi diwa tanu dile liye hela pandi ya norti. Mbwenye tanki ile ahenle pandi ya suli, vamwendoni afwanyeya makumelo wa nzuwa.

⁴⁰ Eto ohosakanya panela diwa, na paya diwa vamohi na mabasiya amohiwa mang'ining'ini. Mwa enne mulombwana Hirawu ohomariha mabasa matene anno avahediwe liye na mwene Salomawu zela ja Nyumba ya Yehova.

⁴¹ Mabasa matene mulombwana Hirawu alabile liye ba ala: Mambozo menli, na matimwati menli orungunuwa a vazulu va mambozo vale, na jengo jimohi jiwa jafwanyeya vazulu va matimwati a mambozo ale, vamohi na matavi menli anno kawerewerihiwe matimwati a mambozo ale,

⁴² na jofwalrafwaniha ja romaya jokwakwana 400, liye dowa hela vamatimwatini va mambozo vale wu 200 wu 200, malinya menli va kada ntimwati na nimbozo.

⁴³ Ohosakanya eto karinya kumi vamohi na mabasiyiwa kumi,

⁴⁴ tanki vamohi na ng'ombe kumi na mbinli vati viwa,

⁴⁵ vamohi na panela diwa na paya diwa vamohi na mabasiya amohiwa. Jengo jatene jeji mulombwana Hirawu ohosakanya mokwakwanela na mwemo mwanvepile mwene Salomawu ira jidowe jalabe mabasa a vaNyumbani va Yehova. Jatene jejile jasakanyiwe na mukuwa ojerimela pama.

⁴⁶ Nnga mwemo mwarumiwele atu na mwene Salomawu, aliwa kohodowa ilambo yotandeleya ya Jordawu, vari va Sukoti na Sarita wewo uli ulongo, aliwa tukula ulongo ule sakanyedana maforuma, nyungulrutcha mukuwa, aliwa helaga mmaforumani mule, sakanyedaga jatene ejile.

⁴⁷ Fwanyeya ira mwene Salomawu kapimile jatene jejile mwasiwa indjiva wa mukuwa ali ohokala wa masika fiyeda hawandeyaga pimeya.

⁴⁸ Hiya jejive bahi, mwene Salomawu eto ohosakanyiha jengo jimohi jiwa ji ira jilabege muwari mwa Nyumba ya Yehova: Ibuwa ya oru, meza ya oru vevo vakaletcha pawu dotchenihiwa dedo nnatapulela ira Yehova uli vamohi na atwaye,

⁴⁹ johelavo panti kumi jejo jasakanyiwe na oru ohogumanihiwa na yengo imohiwa, jejo jakala sogolro wa Nimburo Notchenetchetcha, tanu pandi ya suli, tanu pandi ya norti. Ohosakanyiha eto mafolori, panti, vamohi na maalikati a oru,

⁵⁰ makopo, jengo jotimihana panti, mabasiya, matijela ohelamo jonukela jatumeya atu, matijela otukulana makalra ohinda kagali a oru ohogumanihiwa na yengo imohiwa, na madoburadisa para milango da vasala yafwanyeya muwari ku wonga Nimburo Notchenetchetcha eto para musuwo wa vamulangoni vovolowela dagali eto da oru.

⁵¹ Mwa enne mabasa matene anno mwene Salomawu alabile liye vaNyumbani va Yehova kohomala. Evale Salomawu ohodowelaga jatene jejo javelela babaye wa Yehova, liye zana hela munyumbani dokoyamo jengo jafwanyeya vaNyumbani va Yehova vale, romela parata na oru vamohi na jolabana jatene.