1 Amwene 6 - Mazu Otchena a Mulungu

Mwene Salomawu ohomanga Nyumba ya Yehova

¹ Vagamanle yaka 480 Ana Izarayeli vakumile atu Ijipitu, mwene Salomawu agamanle kala mwene yaka nnayi, agafiyile mwedi wa Zive wenno unafwanyeya agali mwedi wanembinli, mwene Salomawu ohoroma manga Nyumba ya Yehova.

² Nyumba mwene Salomawu yammangela liye Yehova lapa uwa ali mameturu 27, rambalala uwa ali mameturu matanu na mannayi eto regama uwa ali mameturu 13 na meya.

³ Sogolro wa Nyumba ya Yehova kohomangawo nikonde. Nikonde nne molapela muwa ali mameturu matanu na mannayi nnga rambalala wa Nyumba ile, eto morambalala muwa kuma Nyumba ya Yehova dowaga sogolro ali mameturu mannayi na meya.

⁴ Salomawu ohosakanyela nyumbele majanela opurana unde uwa, mbwenye kagali orambalala muwari muwa.

⁵ Eto ohomangela kwartu dimohi diwa, liye bandiha na unde wa ntchihi na nyumbele wu na wu na unduli uwa.

⁶ Kwartu ya andare oroma wa vati rambalala uwa ali mameturu menli na masentimeturu 25. Kwartu ya andare wanembinli rambalala uwa ali mameturu menli na masentimeturu 70. Eto andare waneraru wenno afwanyeya agali ogomiheda anna mameturu mararu na masentimeturu 15. Kada andare, miranda dile tchapovonle matchihi a Nyumba ya Yehova, aliwa kuma oneyaga muwari, nari. Tchoira kada ntchihi unde uwa kohiya malro ikukuru imohi ira miranda dile kagaratigi vazulu viwa. Mwa eno, matchihi a kwartu ya vazulu kali mang'ining'ini hiyaniha na matchihi a kwartu ya vati.

⁷ Nyumba ya Yehova ile yamangiwa na mabwe anno kamanle sakanyediwa wanle mabweni wewo wakumilena atu ira tempu yomanga Nyumbele, wahavweyege martelo, mbazo nari yengo ili yatene ya momba.

⁸ Mulango ovolowela wa andare wa vati afwanyeya pandi ya suli ya Nyumba ya Yehova ile. Eto wohokala masikada ogwelana andare wanembinli na andare waneraru.

⁹ Mwa enne mwene Salomawu ohomariha mabasaye omanga matchihi a Nyumba ya Yehova ile. Vazulu va Nyumba ile, liye afungilevo na matabwa a seduru.

¹⁰ Maandare mararu anno asakanyile Salomawu, miranda diwa dasamela vantchihini va Nyumba ya Yehova ile. Miranda diwa ali a seduru. Kada andare regama uwa ali mameturu menli na masentimeturu 20.

¹¹ Mwa enne mazu a Yehova kohozaga wa Salomawu ira:

¹² <<Zela nyumba inamanga we, nnafuna diwonge eni. Weyo wawendaga na mangano aga eto uiragana jotonga jaga jatene eto uharaga malamulo aga, wawendagana jatene jejo, miyo nnoirana wa weyo yenno yalumbenle miyo na babawo Davi.

¹³ Miyo eto nnerege kala vari va atwaga aIzarayeli eto kadiza daanyanyala.>>

Salomawu ohomariha sakanyeda muwari mwa Nyumba ya Yehova

¹⁴ Mwa enne Salomawu ohomariha manga Nyumba ya Yehova.

¹⁵ Mmba mule, matchihi matene a Nyumba ya Yehova ile kohomala heliwa matabwa a seduru romela vati ante dowa fiya zulu. Eto vati vonyingala kahenlevo matabwa a faya.

¹⁶ Muwari mwa nyumba ile kohogwadamo mameturu matanu na mannayi, ira ikale sala imohiwa yaitaniwa Nimburo Notchenetchetcha. Ntchihi nagwada sala yenne, namangiwe na matabwa a seduru romela vati ante zulu.

¹⁷ Sala yoroma yafwanyeya sogolro wa Nimburo Notchenetchetcha nne yaitaniwa Nimburo Notchena. Lapa wa sala ya Nimburo Notchena nne ali mameturu 18.

¹⁸ Eto matabwa a seduru anno kakunenlena atu ntchihi muwari mule, kohomala riyihiwa na jengo joriya jasemilemo atu jolingana na mangu vamohi na folori dotapuwa. Pandi ya muwari yatene ya Nyumba ya Yehova ile kohomala helamo matabwa a seduru fiyeda mabwe kamangilena atu matchihi ale aliwa haoneyaga.

¹⁹ Muwari mwa Nyumba ya Yehova mule Salomawu ohosakanyelamo Nimburo Notchenetchetcha ira nikale nimburo nohelamo Kaxa ya Yopangana ya Yehova.

²⁰ Eto Nimburo Notchenetchetcha nne lapa uwa vamohi no rambalala uwa vamohi no regama uwa ali mameturu matanu na mannayi. Matchihi matene a Nimburo Notchenetchetcha nne vamohi na ibuwa ya matabwa a seduru yafwanyeya mwemule, liye ohomala kunela na oru ohogumanihiwa na yengo imohiwa.

²¹ Pandi ya muwari mwa Nyumba ya Yehova ile Salomawu ohokunela na oru ohogumanihiwa na yengo imohiwa eto va mulango ovolowela Nimburo Notchenetchetcha, ohelavo makurenti a oru.

²² Muwari mwa Nyumba ya Yehova jatene liye ohokunela na oru. Fwanyeya eto liye ohokunela na oru ibuwa yafwanyeya sogolro wa Nimburo Notchenetchetcha.

²³ Eto Salomawu ohasakanya akerubi ambinli a matabwa a mitengo da azeti, anno kaheliwe Nimburo Notchenetchetcha. Kada kerubi lapa uwa ali mameturu mannayi na meya.

^24-25 Akerubi ambinli ale maulukuleluwa ali mamohive eto makaleluwa mamohive. Kada kerubi ohokana mapepelo menli eto kada nipepelo lapa uwa ali mameturu menli na masentimeturu 25. Eto lapa uwa kuma nipepelo nimohi dowa ante magomelo wa nipepelo nimohi niwa ali mameturu mannayi na meya.

²⁶ Kada kerubi lapa uwa ali mameturu mannayi na meya.

²⁷ Akerubi ambinlene Salomawu aahenle muwari mwa Nimburo Notchenetchetcha. Aliwa kali otapulene mapepelo ewa, nipepelo nimohi na kada kerubi nofwanya ntchihi eto nipepelo nimohi niwa nohala nne kohotapulelana mmohi na nfwaye ante aliwa fwanyagana, nipepelo na nfwaye aliwa gumana na nipepelo na nfwaye.

²⁸ Akerubi ambinlene kohomala akunela na oru.

²⁹ Matchihi matene a muwari romela Nimburo Notchena na Nimburo Notchenetchetcha kohomala sema na makalelo oriya ofwalrafwaniha akerubi na minazi na mafolori otapuwa.

³⁰ Eto muwari mwa mamburo amenlene, nimburo na muwari na nimburo na unde, vati viwa kohokunelavo na oru.

³¹ Va mulango va Nimburo Notchenetchetcha vale kohosakanyelavo misuwo minli da matabwa a mitengo da azeti. Vamulangoni vale ulukula uwa watamangela mameturu menli.

³² Eto vamisuwoni vale kohoriha na jengo joriya jasemilemo atu ja akerubi, minazi na mafolori otapuwa. Misuwo dile, na akerubi ale na minazi dile, jatene ejile liye ohomala kunela na oru.

³³ Eto va mulango va Nyumba ya Yehova ohosakanyelavo kaxilu da mitengo da azeti. Vamulangoni vale ulukula uwa ali mameturu menli na mwana meya.

³⁴ Liye ohosakanyaga misuwo minli na matabwa a mutengo eriwa faya. Kada musuwo kasakanyile na misuwo minli, aliwa gumaniha vari na madoburadisa, aliwa gumaniha na kaxilu.

³⁵ Eto vamisuwoni vale ohomala semavo akerubi na minazi vamohi na mafolori otapuwa. Jatene ejile liye mala kunela na oru na makalelo oira jejo jasemilevo atu jile jioneyege unde ule.

³⁶ Eto ohosakanyaga muru wa ntando. Muruwa kamangile na malinya mararu a mabwe, amala linya nimohi na miranda da seduru, amala malinya mararu a mabwe, amala linya nimohi na miranda da seduru, gwelagave eno fiyeda mala.

³⁷ Maaliserisi a Nyumba ya Yehova ile kamangiwe mwedi wa Zive yaka yanennayi yatonga mwene Salomawu.

³⁸ Mbwenye yaka yanekumi na imohi yatonga mwene Salomawu, mwedi wa Buli wenno unafwanyeya agali mwedi wanetanu na miraru, Nyumba yatene yenne yohomalaga nnga mwafuna atu mangiwa. Salomawu amanle yaka tanu na mbinli ira amange Nyumba yatene yenne.