1 Amwene 4 - Mazu Otchena a Mulungu

Asogolrelri a mwene Salomawu

¹ Salomawu ali mwene wa aIzarayeli atene.

² Ala ba asogolrelri anna liye muwari mwa umwene waye: Azariya mwana Zadoki ali namakuta.

³ Eliyorefe na Ayiya ana Siza kali anamalremba madugumento a mwene. Jozafa mwana Ailude ali maliba lremba .

⁴ Benaya mwana Joyada ali musogolrelri mundimuwa wa anyakondo. Zadoki na Abiyatare kali anamakuta.

⁵ Azariya mwana Nata ali musogolrelri wa maadiministaradore a mmadistiritu. Eto mwana Nata mmohiwa aitaniwa Zabude ali namakuta eto ali namawelruza wa mwene.

⁶ Aizare ali mundimuwa wa mabasa matene a palasiyoni wa mwene. Adonirawu mwana Abida, ali mundimuwa wa mabasa okanyihediwa.

⁷ Mwene Salomawu ohasakulra alombwana kumi na ambinli ira kakale maadiministaradore a madistiritu matene a Izarayeli. Aliwa kogudela jodja, aliwa za nvahaga mwene, vamohi na atu atene a palasiyoni waye. Kada adiministaradore mmohi jodja jaye azana mwedi mmohi va yaka.

⁸ Mazina a maadiministaradore kumi na ambinli ale vamohi na madistiritu kalaba atu ba ala: 1. Beni-Huri: Liye asogolrelra pandi ya mwango da Efarayimi.

⁹ 2. Beni-Dekeri: Liye asogolrelra sidadi da Makazi, Salabimi, Bete-Semeji, Elomi na Bete-Hana.

¹⁰ 3. Beni-Hezede: Liye asogolrelra sidadi da Arubote na Soko vamohi na ilambo ya Eferi.

¹¹ 4. Beni-Abinadabe, wenno amutenle Tafate mwana Salomawu: Liye asogolrelra pandi datene da Dori.

¹² 5. Bana mwana Ailude: Liye asogolrelra sidadi da Tanaki, Mejido vamohi na pandi yatene ya Bete-Seya wandamelana sidadi ya Zaretani, pandi ya suli ya sidadi ya Jezereli romela sidadi ya Abeli-Meyola ante kombela ya Jokimeyawu.

¹³ 6. Beni-Jeberi: Liye asogolrelra sidadi ya Ramote-Jileyadi vamohi na tatamo da Jileyadi dedo dali da nlogo na Jayire anno kafwanyeya kagali ahima a Manasesi vamohi na pandi ya Arigobe mwilamboni mwa Bazani mwemo mwafwanyeya sidadi 60 dilukulu dawerewerihiwe na miru, vamohi na kunya da mukuwa mmilangoni muwa.

¹⁴ 7. Ayinadabe mwana Ido: Liye asogolrelra distiritu ya Mahanayimi.

¹⁵ 8. Ayimazi wenno amutenle Basemate mwana mmohiwa wa Salomawu: Liye asogolrelra pandi ya Nafitali.

¹⁶ 9. Bana mwana Huzayi: Liye asogolrelra pandi ya Azeri vamohi na sidadi ya Beyaloti.

¹⁷ 10. Jozafa mwana Paruwa: Liye asogolrelra pandi ya Isakari.

¹⁸ 11. Simeyi mwana Ela: Liye asogolrelra mwilamboni mwa Benjami.

¹⁹ 12. Jeberi mwana Uri: Liye asogolrelra ilambo ya Jileyadi wewo watongetcha Seyoni mwene wa aAmore, na Oge mwene wa Bazani. Ilambo yatene yenne ya Jileyadi asogolrelra ali liye ekave.

Ulukula wa umwene wa Salomawu

²⁰ AJuda na aIzarayeli kali oindjivetchetcha nnga miseva da mutcherelani mwa bara. Aliwa kodja, kong'wa eto kohagalala.

²¹ Salomawu aatonga amwene atene roma muhindje Eufarati ante dowa ilambo ya aFilistewu, ante dowa madilre na Ijipitu. Amwene atene anna kovelela misoko wa mwene Salomawu eto komulaba kalawo watene wa mwene Salomawu.

²² Jodja jafuna mwene Salomawu va kada siku ti ji: masakwi 80 a utu wa tirigu otchileya pama, masakwi 160 a utu wa tirigu wa palisi,

²³ ng'ombe kumi doruva pama, na ng'ombe 20 dodjihiwa mukokolani, mabila 100 na vinyama dimohi diwa dohokontariwa romela mbala, anase, anangoma, na mbalrame dimohi diwa doruva da vande.

²⁴ Tchoira Salomawu atonga pandi datene dafwanyeya mavirelo wa nzuwa wa muhindje Eufarati, romela Tifiza ante dowa sidadi ya Gaza. Amwene atene a mavirelo wa nzuwa wa muhindje Eufarati katongiwa na mwene Salomawu eto mwene Salomawu ohogarati mwa murendele na vilambo dowandamelana ahanna kondo.

²⁵ Kalawo watene wa Salomawu, aJuda na aIzarayeli kawenda mohokana ova. Eto roma ilambo ya Dani fiyeda ilambo ya Beriseba kada mutu ogarati vati va muratchi waye wa uva na mutengo waye wa mufigera.

²⁶ Mwene Salomawu ohokana makolra mwahela liye kavalo 40.000 dedo datutumula aaterelado a kondoni eto ohokana atu 12.000 owendiha kavalo.

²⁷ Eto adiministaradore a madistiritu ale, kada mutu mwedi waye afiya, ozana jodja jejo jafuna mwene Salomawu para adje vamohi na ale kadja palasiyoni waye. Adiministaradore ale tchadjombiha yengo nne imohi muwari mwa jodja jejo jafuna mwene Salomawu.

²⁸ Eto kada adiministaradore ozana sevada vamohi na mpinda, liye dowagana nimburo neno narumiwa liye, para kavalo dedo datutumula aaterelado a kondoni vamohi na kavalo dimohi diwa ira didjege.

²⁹ Mulugu ohonvaha mwene Salomawu zelru, no onelramo wohokala wa masika, na toto didjindji nnga miseva da mutcherelani mwa bara.

³⁰ Zelru da Salomawu dali zelru dokwaranya zelru da atu atene a makumelo wa nzuwa nari atu atene a Ijipitu.

³¹ Liye ali mutu oiziwetchetcha kwaranya atenene eto mukwaranya Etani nkuda Ezarayi eto mukwaranya Emani na Kalikoli na Darda anno anafwanyeya kagali ahima a Maoli. Mwa eno, nzina naye nohovweya muwari mwa malogo matene owandamelana.

³² Eto liye ohowonga vimariya 3.000 eto oholremba nyumbo dokwakwana 1.005.

³³ Liye uhuwanda wonga zela makalelo a mitengo, roma mutengo wa seduru unafwanyeya mwango wa Libano ante dowa yomela ing'onong'ono ineriwa isopo, yenno inamela vantchihini. Eto uhuwonga zela anavinyama, na mbalrame, na jomburunuwa vamohi na somba.

³⁴ Mwa enne amwene a vilambo datene kagavwile zela zelru da Salomawu, koaruma atu aliwa zaga wa liye ira kavuruwane zelru daye.