1 Amwene 3 - Mazu Otchena a Mulungu

Salomawu ohomutela mwana Farawu

¹ Mwene Salomawu ohomutela mwana mwene Farawu, liye roma wandana na Farawu mwene wa Ijipitu. Agamutenle ohomuzana sidadi ya Davi, fiyeda mariha manga nyumbaye vamohi na Nyumba ya Yehova, vamohi na muru owerewera sidadi ya Jeruzalemu.

² Fwanyeya ira mwa tempu yenne atu kavelelaga mikuto diwa wa Yehova, kadowetcha kuta mamburo otama ovelela mikuto. Mwasiwa mwa malambo anne yali yahanamangiwe nyumba para nzina na Yehova nitamaleliwegemo.

³ Fwanyeya ira mwene Salomawu omuziveliwetcha Yehova, liye haraga mangano a babaye Davi. So mbwenye odowetcha mamburo otama ovelela mikuto, liye velelaga mikuto da Yehova eto liye tumeyaga jonukela mwemule.

⁴ Salomawu ohodowa Jibeyawu ira avelele mikuto, mwasiwa nimburo nenne ku wewo wafwanyeya ibuwa indimuwa yovelelavo mikuto. Liye ohotumeya evale anavinyama 1.000, liye velela wa Mulugu nnga vairetcha liye.

Salomawu ohonvepa Mulugu zelru

⁵ Salomawu agali Jibeyawu, Yehova Mulugu ohozaga wa liye na mahiyu muwari moroha, liye ira: <<Kadivepe inafuna we ira miyo duvahe.>>

⁶ Evale Salomawu ohowakulaga eraga: <<Yehova nyo mwanna muoniha babaga Davi namalaba wenyu zivela wenyu ulukulu mwasiwa liye ali mutu ororomeleya eto awenda na makalelo apama, eto ali mutu owongowa murima vamentoni venyu. Nyo mohokalelave muoniha zivela wenyu ulukulu eto muhufiyeda nvaha mwanaye mmohi ira agarati vampandoni vaye fiyeda peno.

⁷ Nyo so Yehova Mulugu waga muhuwanda dihiya miyo namalaba wenyu ira dikale mwene vamalroni va babaga Davi namalaba wenyu. Miyo eto dili mwana muzombwe eto kadiiziwile makalelo ofwanela ira diiregena.

⁸ Miyo namalaba wenyu nnafwanyeya vari va atu enyu anno mwaasakunlre nyo ira kakale enyu, anno anafwanyeya kagali atu oindjivetchetcha, anno kahanawanda kontareya.

⁹ Mwa eno, miyo kannafuna yengo imohiwa. So nnafuna mudivahe zelru ira diwandege atonga atwinyu oindjivetchetcha mwapama eto diwandege hiyanihavo yapama na yabure. Kodi bani unawande atonga atwinyu oindjiva eni, ahakale nyo munvaha zelru?>>

¹⁰ Evale Yehova ohoziveliwa yovepa ya mwene Salomawu.

¹¹ Mwa enne Mulugu ohomuwandela eraga: <<Voira weyo uvepile zelru ira uwandege tonga na makalelo apama hiya vepa ira ingumi yawo igonele mwilamboni ya vati, nari jorayela, nari ira amwidanawo kakwe, uhusakanya pama.

¹² Miyo nnouvaha yenno ivepile we. Nnouvaha zelru no onelramo wewo uli wahanababihege kana atu amohiwa a ilambo ya vati eto kalivo unafuna za kana sogolro.

¹³ Eto hiya yenno ivepile we bahi, miyo nnouvaha jengo jimohi jiwa jahavepile we. Nnouvaha jorayela vamohi na undimuwa, fiyeda ira kalawo wawo watene kaza akalawo mwene olingana na weyo.

¹⁴ Eto weyo wawenda na ndila daga, uharihaga jofuna jaga na malamulo aga matene nnga jairile babawo Davi, miyo nnowendjeda malambo a ingumi yawo mwilamboni ya vati.>>

¹⁵ Noira enne, mwene Salomawu agarurumuwile, ohoonelramo ira Mulugu ohowonga na liye muwari moroha. Mwa enne ohodowaga Jeruzalemu, liye dowa sogolro wa Kaxa ya Yopangana ya Yehova, liye velela wa Yehova mikuto dotumeya na jovelela ja murendele. Noira eno, ohosakanyaga pwando para anamalabaye atene.

Mwene Salomawu ohotonga mulandu orutcha

¹⁶ Siku nimohi ahiyana ambinli aputa kohozaga wa mwene Salomawu, aliwa za imela vamentoni vaye.

¹⁷ Kagazile, muhiyana mmohi ohoromaga wonga eraga: <<Mbwiyeni so mwene, miyo na muhiyana nfwagola, nnakala vande vamohive. Miyo dohombala mwanaga wa mwanapongwe, nfwagola agali vamohi na miyo.

¹⁸ Siku naneraru na nfwaga wenna tambe ohombala mwana waye wa mwanapongwe. Mbwenye jatene jejo jiireyaga, vande vale nalivo ambinlive, nne kavali mutu mmohiwa.

¹⁹ Siku nimohi na mahiyu nigonaga, nfwagola muwari motalatala, ohonfinya mwanaye, fiyeda mwanayele kwa.

²⁰ Mwa enne ohovenyaga na mahiyu evale miyo namalaba wenyu digonaga dahaonagawo, liye mutukula mwanaye ule, za mugonantiha vamirimani vaga. Eto liye mutukula mwana waga dowa mugonantiha vamirimani vaye.

²¹ Mmetcheloni muwa na mabebehene dagavenyile ira dimuwamwihe mwanaga, dinfwanyile uhukwa. Mbwenye unde wagatchile dagamuing'anile pama, dimuonile ira mwanole kahi waga.>>

²² Mwa enne muhiyanole awongagave, nfwaye ohomugwadelaga, liye kwi: <<Unanama we. Mwana ukwile gwawo, uliwo gwaga!>> Evale muhiyana oroma wongamo ule ohowakulaga eraga: <<Unanama. Mwana okwa gwawo, mwana uliwo gwaga!>> Mwa enne kohoromaga kangana vamentoni va mwene evale.

²³ Noira enne, mwene Salomawu ohowongaga eraga: <<Mutu mmohi unawonga ira: <Mwana uliwo gwaga, mbwenye ukwile gwa nfwagola!> Eto nfwaye uni: <Nari. Mwana uliwo gwaga, mbwenye ukwile gwawo!> >>

²⁴ Mwa enne mwene Salomawu oharumaga atu ira kadowele supada. Evale kohodowelaga supada nne, aliwa zana vamentoni vaye.

²⁵ Kagazilena, mwene Salomawu ohowongaga eraga: <<Mmugwade vari mwana okalawo ula, pandi imohi munvahe nfwaye, pandi imohiwa munvahe nfwaye!>>

²⁶ Mwene Salomawu agawongile enne, mwana okalawo ule mmaye wa ibaribari agavwile mazu anne, ohomuwendelaga tangaranga mwanaye ule, liye kwi: <<Nari. Nnauvepani mbwiyeni, mwanagola kamumpe. Mutukuleni munvahede muhiyana nfwagola!>> Mbwenye muhiyana mmohiwa ule ohowongaga eraga: <<Iyaa, kamugwadeni vari ira ahakale waga nne ahakale waye. Atene nipuzeye.>>

²⁷ Evale mwene Salomawu ohowongaga kwi: <<Kamumpe mwanoyo! Mmutukule munvahede muhiyana oroma ule, mwasiwa mmaye gwenno!>>

²⁸ Jagaireyile enne, aIzarayeli atene kohovwaga zela makalelo atongile mwene Salomawu mulandu wenne. Mwa enne kagavwile, kohoroma muriheda valukulu, tchoira kohowanda ona ira Mulugu uhunvaha zelru ira awandege tonga mwa ibaribari.