1 Amwene 21 - Mazu Otchena a Mulungu

Mulombwana Naboti ohokonda muguliheda mwene Akabe munda wa uva

¹ Jeji jagaireyile, vagavirile malambo, ohokalawo nkuda Jezereli mmohi aitaniwa Naboti. Liye ohokana mundaye wa uva sidadi ya Jezereli, wandamelana palasiyo ya Akabe, mwene wa Samariya.

² Mwa enne mwene Akabe ohomuwongana mulombwana Naboti ira: <<Miyo nnavepa ira udivahe mundawo wa uva ule ira dizalegemo ja orta jaga, mwasiwa uhuwandamela vande vaga. Miyo nnouvaha munda mmohiwa wapama wa uva kwaranya wenne, owu nari, wahafune munda, miyo nnouvaha kobiri.>>

³ Mbwenye mulombwana Naboti ohomuwakulaga mwene Akabe eraga: <<Miyo nnolumbela wa Yehova ira kannawanda uvahani tereno yavahiwe ababaga.>>

⁴ Mwa enne mwene Akabe ohowelelaga vande vaye agali otakaleliwene valukulu zela mazu amuwakunle mulombwana Naboti nkuda Jezereli ule, oira: <<Miyo kannauvahani tereno yavahiwe ababaga.>> Liye agadowile vande, ohogonantigi vakamani vaye, liye ing'aniha kove yaye ntchihini eto ohokondaga jodja.

⁵ Mwa enne muhiyanaye Jezabeli ohozaga nfwanya, liye nfuka eraga: <<Kodi iireyile nni we peno kala otakaleliwene eto kondaga jodja?>>

⁶ Evale liye ohowakulaga eraga: <<Tchoira miyo dimuwongilena nkuda Jezereli unaitaniwa Naboti miyo ira: <Nnavepa udigulihede munda wawo wa uva eto wafunaga miyo nnouvaha munda mmohiwa wa uva vamalroni va munda unafuna we divaha.> Mbwenye liye wakula waye uwongile ira: <Miyo kannauvaha mundaga wa uva.> >>

⁷ Mwa enne muhiyanaye Jezabeli ule ohowakulaga eraga: <<Kodi weyo kuli mwene wa Izarayeli? Kavenya udje eto uhagalalihe murima wawo. Miyo nnouvaha munda wa uva wa mulombwana Naboti nkuda Jezereli ule.>>

Jezabeli ohompiha Naboti

⁸ Noira enne, Jezabeli ule oholrembaga makarta na nzina na Akabe, liye karimbari na karimbu ya mwene. Liye tukula makarta ale, arumiheda andimuwa na asogolrelri atene kafwanyeya sidadi yakala mulombwana Naboti.

⁹ Mukartani mule alrembilemo ira: <<Mukumihe nlamulo ira nikalewo siku nnafuna nyo jejuwari. Mwa eno, mmutukule mulombwana Naboti mmugaratihe sogolro wa atu atene kamuing'anaga.

¹⁰ Mwaira eno, mwaasakulre alombwana ambinli otakala mirima kadowe sogolro ule, kamusumele ira: <Eni weyo uhumululuviha Mulugu eto uhumululuviha mwene.> Era eno mmutukule liye, mmukumihede unde wa sidadi, mudowe mwampe na mabwe.>>

¹¹ Mwa enne andimuwa vamohi na asogolrelri a musidadi mwakala Naboti mule, kagavwile mazu anne, kohoirana nnga mwemo Jezabeli mwaarumele liye, nnga mwemo mwalrembele liye mmakartani aarumihede liye ale.

¹² Kohelavo siku na jeju, aliwa mutukula mulombwana Naboti, dowa muhela sogolro wa atu atene.

¹³ Noira enne, kohozaga alombwana ambinli otakala mirima, aliwa dowa garati sogolro wa mulombwana Naboti ule. Mwa enne alombwana otakala mirima ale kohoromaga wonga mazu abure omusumela Naboti vamentoni va atu atene keraga: <<Mulombwana Naboti uhumululuviha Mulugu eto uhumululuviha mwene.>> Mwa enne kohomudowagana unde wa sidadi, aliwa roma nvoka mabwe, liye fiyeda kwa.

¹⁴ Noira enne, kohorumihaga milanyo wa Jezabeli keraga: <<Mulombwana Naboti uhupiwa na mabwe.>>

¹⁵ Mwa enne Jezabeli agaiziwile ira mulombwana Naboti ohopiwa na mabwe, ohomuwandela Akabe eraga: <<Kavenya, udowe watukule munda wa uva wenno Naboti nkuda Jezereli akondilena liye uguliheda. Tchoira liye eni kaliwo, uhumala kwa!>>

¹⁶ Mwa enne mulombwana Akabe agavwile ira mulombwana Naboti ohokwa, ohomaruwa ira adowe mundani ule, atukule ira akale waye.

Mulugu ohomuruma Eliya ira adowe amugwihena mulandu mwene Akabe

¹⁷ Noira eno, mazu a Yehova kohozaga wa Eliya, nkuda Tijibi ira:

¹⁸ <<Uvenye udowe wanfwanye mulombwana Akabe mwene wa Izarayeli, wenno unafwanyeya Samariya. Liye eni unafwanyeya mmundani mwa uva mwa Naboti. Udowile ira atukule mundole akale waye.

¹⁹ Udowe wamuwandele ira: <Yehova unawonga ira: <<Kodi na ibaribari weyo uhumpa mulombwana Naboti, weyo tukula jaye?>> > Eto umuwandele ira: <Yehova unawonga ira: <<Nimburo neno ninyangulrile anambwa sangiri na Naboti eto anodowa nimburo nimohive kanyangulre sangiri nawo.>> > >>

²⁰ Mwa enne kagagumanne, mulombwana Akabe ohowongaga na Eliya eraga: <<We mwidanaga we, kodi uhudifwanya?>> Liye ohowakula eraga: <<Duhufwanya. Tchoira uhuvivelela ira uiregena jabure vamentoni va Yehova.

²¹ Yehova unawonga ira: <Miyo nnouzelana ubure ohokala wa masika. Nnoatolotcha muibalini mwawo alombwana atene, masiki kala muzari nari ahali muzari ira kahafwanyeye mwilamboni mwa Izarayeli.

²² Atu a muibalini mwawo nnoairana nnga daairilena miyo atu a muibalini mwa Jerobowawu mwana Nebati eto nnga dimuirilena miyo mulombwana Baaza, mwana Ayiya. Tchoira weyo uhutatamula takaleliwa waga eto uhategiha aIzarayeli.>

²³ Eto zela muhiyanawo Jezabeli Yehova unawonga ira: <Anambwa anotakuna maningo a Jezabeli muwari mwa sidadi ya Jezereli.>

²⁴ Eto atu atene a Akabe anafuna kwaga, atu anne anakwele musidadi anerege takuniwa na anambwa. Eto ale anafuna kwela mukokolani, anadjiwege na mbalrame dovava zulu!>>

²⁵ Fwanyeya ira Akabe gwatabwetchetche vivelela ira asakanyege jabure vamentoni va Yehova kwaranya amwene atene. Liye airana ejo muwari mokanyihediwa na muhiyanaye Jezabeli.

²⁶ Liye ohosakanya jabure johokala ja masika, aharaga vikwamutu josema molingana na makalelo airile aAmore, anno Yehova aavokedile liye unde wa ilambo yaye ira Ana Izarayeli kakalegemo.

Twaruwa wa Akabe

²⁷ Mwa enne mulombwana Akabe agavwile mazu matene anne zela ubure wafuna muireyela, muwari mokumbanya mwaye, ohokawulaga jowara jaye, liye wara masakwi eto ohoromaga jejuwari, liye gonelaga masakwi eto awenda pure pure pure.

²⁸ Mwa enne mazu a Yehova kohozaga wa mulombwana Eliya, nkuda Tijibi ule, amuwandelaga eraga:

²⁹ <<Kodi uhuona makalelo anaviyeviha mulombwana Akabe vamentoni vaga? Voira liye uhuviyeviha vamentoni vaga, ubure watene wafuna miyo airela akuda Akabe, kannamuirela liye, mbwenye nnamuirela mwanaye unafuna za tongaga liye agakwile!>>