1 Amwene 10 - Mazu Otchena a Mulungu

Muhiyana atonga ilambo ya Saba ohoza mpanda mwene Salomawu

¹ Mwene wa muhiyana atonga ilambo ya Saba ohovwaga zela makalelo avweyile mwene Salomawu muwari mwa nzina na Yehova. Mwa enne ohovenyaga adowaga Jeruzalemu ira adowe amuxixe mwene Salomawu na jofuka jorutcha.

² Liye adowilege Jeruzalemu wewule na nikuru nlukulu na anamalabaye vamohi na akamelo ohokala a masika anno katukunle jonukela na oru mudjindji ohokala wa masika na mabwe ofuneyetchetcha. Mwa enne liye agafiyile wa mwene Salomawu, ohonfuka jatene janna liye mmirimani mwaye.

³ Mwa enne mwene Salomawu ohomuwakula jofuka jaye jatene. Kilivo nne yengo yamurutchile wakula uwa.

⁴ Mwa enne mwene wa muhiyana wa Saba ule, agaonne zelru datene da Salomawu vamohi na nyumba ya umwene yenno yamangile liye,

⁵ vamohi na jejo jadja liye vameza vaye, vamohi na nyumba mwakala andimuwaye atene, na mabasa kahinda anamalabaye atene, vamohi na jowara jiwa jatene, vamohi na aliba musakanyela jong'wa jaye, vamohi na mikuto dotumeya dedo daveleletcha atu muNyumbani mwa Yehova, liye agaonne jatene jejile ohotikiniheyaga valukulu.

⁶ Mwa enne ohowonga na mwene eraga: <<Mazu davwile miyo dagali ilambwaga zela makalelo enyu vamohi na zelru denyu, ali mazu a ibaribari.

⁷ Mbwenye miyo dagavwile kadaroromela. Nona dihifiyeda za uno. Va mbwenye dihiona na meso aga. Aliba diwandela ale jowonga jiwa nne metadi kajafiyile. Tchoira nyo so mwene muhukwaranya zela jejo javwile miyo zela zelru denyu vamohi na jorayela jenyu.

⁸ Orelihiwa ba alombwana enyu atene vamohi na anamalaba enyu ala anafwanyeya na nyo malambo matene, anno anavwa zelru denyu.

⁹ Otamaleliwa akale Yehova Mulugu wenyu, wenno uuziveliwileni, auhelani vampandoni votonga va Izarayeli. Yehova uhuusakanyani mwene ira muwandege tonga na matongelo a ibaribari eto apama, mwasiwa Yehova unoazivela aIzarayeli malambo a mukalakala.>>

¹⁰ Mwa enne ohonvaha mwene Salomawu kilu 4.000 da oru, vamohi na jonukela johokala ja masika, vamohi na mabwe ofuneyetchetcha. Fwanyeya ira kunababihege za akoka jonukela joindjiva na makalelo nnga jaindjivile jonukela jejo mwene wa muhiyana wa Saba anvahile liye mwene Salomawu.

¹¹ Eto mwadeya da Salomawu dedo dasogolrelriwa na atu a mwene Hirawu, ora yazilena atu oru okumela Ofiri, dohozana eto viga da alimuge vamohi na mabwe ofuneyetchetcha okumela Ofiri wewo.

¹² Viga da alimuge dile, mwene Salomawu ohosakanyagana jolimbihana mmambalo mwa masikada a Nyumba ya Yehova vamohi na Nyumba ya umwene, vamohi na joimbana jinaitaniwa lira vamohi na arpa para aliba imba. Fwanyeya ira viga da alimuge dokala ha dedile kannaze akoka eto kannaoneye fiyeda siku na peno.

¹³ Mwene Salomawu ohonvaha mwene wa muhiyana wa Saba ule jatene jejo jafunne liye vamohi na jatene javepile liye hiya jengo jimohi jiwa janvahile liye mofuna mwaye ahanvepileve. Noira enne, muhiyanole vamohi na anamalabaye, kohowelelaga mwilamboni mwewa.

Jorayela ja mwene Salomawu

¹⁴ Va kada yaka mwene Salomawu komuzelana oru mudjindji okwakwana kilu 23.000,

¹⁵ hiya misoko dedo daveleletcha aliba sakanya malronda, vamohi na aliba kana joguliha jiwa, vamohi na jovelela ja amwene atene a Arabiya, vamohi na asogolrelri a mwilamboni mule.

¹⁶ Mwene Salomawu ohosakanyaga defeza dilukulu 200 da oru ohaniwa. Ira asakanye kada defeza yanongile kilu tanu na mbinli da oru.

¹⁷ Eto ohosakanya defeza dimohi diwa ding'ining'ini dokwakwana 300. Kada defeza asakanyilena kilu mbinli da oru. Noira enne, mwene Salomawu ohotukulaga defeza dile, liye dowa hela Nyumba ya Guguru ya Libano.

¹⁸ Eto mwene Salomawu ohosakanya mpando mundimuwa wa umwene, agali wa manyanga a tembo, liye mukunela na oru wapama.

¹⁹ Mpandole ohokana sikada niwa nanna monyingala tanu na imohi. Eto mpandole pandi yosameliha muru wali worungunuwa. Pandi dambinli dene da mmambalo mosameliha miwono mohokala jofwalrafwaniha ja apodogoma kaimenlemo, mmohi wu, mmohiwa wu.

²⁰ Eto mmambalo mwa kada vonyingala va sikada nne mohokala jofwalrafwaniha ja apodogoma wu na wu. Ku wonga va monyingala tanu na imohi, apodogoma atene a sikada nne kali kumi na ambinli. Fwanyeya ira kaliwo mwene mmohiwa wa ilambo ili yatene ababihile kana mpando wa umwene wa makalelo anne.

²¹ Kopo datene dong'wana da mwene Salomawu vamohi na jolabana jatene jafwanyeya muwari mwa Nyumba ya Guguru ya Libano jali ja oru ohogumanihiwa na yengo imohiwa. Fwanyeya ira kwaali yengo nne imohi yasakanyiwe na parata, tchoira tempu ya Salomawu parata ali yengo yohokana tima.

²² Mwasiwa mwene Salomawu ohokana nikuru na mwadeya dadowetcha Tarisi dakaletcha vamohi na nikuru na Hirawu. Va kada yaka taru mwadeya dile dodowa Tarisi, aliwa tukulaga oru, parata, manyanga a tembo, minyani, vamohi na mbalrame doriyetchetcha daitaniwa pavawu.

²³ Mwene Salomawu oakwaranya amwene atene a mwilamboni ya vati zela rayela waye na zelru daye.

²⁴ Atu a mwilamboni ya vati yatene kazetcha wa Salomawu kanvepaga ira kavuruwane zelru dedo danvahile Mulugu.

²⁵ Yaka datene kada mutu azaga ozana yonvaha yaye. Salomawu ovahiwa jolabana ja vande josakanyiwa na parata vamohi na josakanyiwa na oru, vamohi na jowara, na jowanana kondoni, jonukela, kavalo vamohi na akavaru.

²⁶ Noira enne, Salomawu ohogumanihaga aterelado aye vamohi na aliba wendiha kavalo aye atene a kondoni. Fwanyeya ira Salomawu anna aterelado a kondoni okwakwana 1.400 vamohi na atu 12.000 owendiha kavalo. Mwa enne ohogawaga, aterelado a kondoni amohiwa na aliba wendiha kavalo amohiwa, liye dowa ahiya sidadi mwakala aaterelado a kondoni eto amohiwa kakala na liye muJeruzalemu.

²⁷ Eto mwene Salomawu ohozalihaga muJeruzalemu mule parata nnga mabwe eto ohozalihagamo matabwa a seduru kalaga nnga mitengo da nantambu nnafwanyeya ilambo ya mikuma ding'onong'ono da Juda.

²⁸ Kavalo danna mwene Salomawu, dakumetcha Ijipitu na Silisiya. Anamalaba a mwene Salomawu, kodowa, aliwa gula na peresu yapangana atu, aliwa dowagana wa mwene Salomawu.

²⁹ Aterelado a kondoni ale kagulaga Ijipitu ule, aterelado mmohi kagula na kobiri da parata 600 eto kavalo imohi kagula na kobiri da parata 150. Mwa makalelo anne anamalaba a mwene Salomawu kowanda gula ejile, aliwa dowa agulihedaga amwene a aEti vamohi na akuda Siriya.