Taitasi 1 - Izwi lya Leza

¹ Ndime Paulu musebezhi waka Leza mutumwa waka Jeso Kilisito. Ndakasalilwa kuzumya lushomo lwabasale baka Leza ukubasolelela mu lushinizho lweelele kubatola ku bumi bubotezha Leza.

² Ceci cili abulanjizhi bwa bumi butamana bobo mbwaakashomezha kale-kale Leza uutabeyi.

³ Ubobo muciindi ceelele waka cizubulula ceci cishomezho mu mazwi akwe. Inzho ume ndakambauka aza mazwi mbuli mbundakatumwa u kulaililwa kwa Leza Mufwutuli wesu.

⁴ Ndakulembela Taitasi u mwanangu mwini mwini mu lushomo ndutukwete. Leza Taata u Kilisito Jeso Mufwutuli wesu bakufwile luse u kukupa luumuno.

Milimo yaka Taitasi ku Kiliti

⁵ Ndakakushiya ku Kiliti kwaamba ubambulule shoonse shitali kabotu u kusala bakando ba shikombelo u minzhi yoonse mbubona mbundakakulailila.

⁶ Mukando wambungano abe muntu wiina kampenda, utwele mukaintu womwi bulyo. Banakwe baakuli bashomi, batali balwati na bapapyu.

⁷ Mweendelezhi mbwaali mubanzhi wa Leza, ulyeelele kubula kampenda. Teelele kuba shilusunsu na ufwambaana kulemana, teelele kuba cakolwa, na shimanyongwe, naa kuzandisha impindu.

⁸ Ulyeelele kuba muntu utacimwa beenzu, uzandisha kucita shibotu, ushicamba, ululeme, usalala, shikulikwata.

⁹ Ulyeelele kwaakwatisha cini cini makani a lushinizho mbubona mbuli mbwiibele injiisho, kwaamba acikonzhe kupa malaile a luleme u kwaamba akonzhe kubazunda babo bashikazha.

¹⁰ Nkaambo nkubali bantu banji banji bayina bubule, u baamba mazwi a bulyo alucengo, kwaambisha ba Juda babo basanduka kuba Bakilisito.

¹¹ Kukambauka kwa baba bantu kulyeelele kuleshewa, nkaambo balanyonganya mikwashi kwiita mu kuyiisha injiisho shakuzanda kuhubila ngawo.

¹² Umwi mushinshimi wabo beni wakaamba ati, “Bakiliti lyoonse mbabeshi, mbabiyabi ukoya banyama, mbakata ulimwi mbalyato.”

¹³ Azo makani meni meni. Ubobo ubatapatile ca nsana kwaamba bazume mu lushomo,

¹⁴ kutali bulyo kuteelela twaano u tunshiyanshiya twaba Juda u milawo ya bantu bakaka sha lushinizho.

¹⁵ Ku basalali shoonse shintu shilasalala, pele ku bantu basofweele batashomi, kwiina cintu cisalala niciba comwi pe, nkaambo mizeezo yabo u manjezheezha abo alisofweele.

¹⁶ Balaamba ati balimwizhi Leza bamana balamutama kwiita u milimo yabo. Mbantu basesemya, batateeleli, batalozha kucita milimo mibotu niiba buti.