Luka 1 - Izwi lya Leza

Luka Walemba Luŋwalu kwa Teyofilasi

¹ Kuli ulemekwa Teyofilasi, nikuba ati bantu banji banji bakasoleka kulemba makani ashintu shesho shakacitika akati kesu,

² bakalemba kwiingainya umbutwakashimwinwa ubakamboni bakabona shintu shesho kuhwa ku makancilo, ulimwi kabakambauka Mulumbe wezo.

³ Inzho uulemekwa Teyofilasi, shintu shoonse sheshi ndakashibuzhabuzha kabotu kabotu mbuli mbushicilizhenye kuhwa ciindi nishakakanka kucitika, ubobo ndazanda ati nshilembe.

⁴ Ndacita bobo kwaamba uzhibe lushinizho mu twaambo toonse ntuwakayiishiwa.

Kuzhalwa kwaka Johani Kwaambilizhiwa

⁵ Ku ciindi mwami Helodi naakaakulela cishi ca Judiya, kakuli mupaizhi wakaakutewa ati Zakaliya, kali wa mukabunga ka bapaizhi kana Abija. Zakaliya katwele mukaintu uutewa ati Lizabeti wamukowa waka Aloni.

⁶ Boonse bobile kabali bantu balulami, kabeenda mu malailile u kucilila Milawo ya Leza yoonse ca kubula kampenda.

⁷ Pele kabaina mwana, nkaambo Lizabeti katazhali ulimwi boonse bobile kabali bacembele.

⁸ Bumwi buzuba, Zakaliya kali muŋanda ya Leza kucita mulimo wakwe wabupaizhi, kaambo kabuli bulizhi bwankamu yakwe.

⁹ Inzho kwiingainya uciyanza ca bapaizhi, bakasala Zakaliya kwaamba ati nguuya muŋanda ya Leza kutenta tununcilizho mu busena busalala.

¹⁰ Inkamu ya bantu keesheele ansengwe ilakomba ciindi Zakaliya naakaakutenta tununcilizho.

¹¹ Ngoonaawo Zakaliya wakabona anjelo wa Mwami, ulizhimine kuluya lwa cilyo lwa cipaililo aakaakutentelwa tununcilizho.

¹² Ceci cakamuzhinga Zakaliya, ulimwi wakatiya cini cini.

¹³ Pele anjelo wakamwaambila ati, “Utatiyi Zakaliya! Leza wateelela kukomba kwako, mwinako Lizabeti ulakakuzhalila mwana mweembezhi wezo nguukaaulika ati Johani.

¹⁴ Kulakaba kubotelwa ukutangala cini cini, u bantu banji banji balakabotelwa ukaambo kakuzhalwa kwakwe!

¹⁵ Wezu mwana ulakaba mulemu ku bushu bwa Leza, ulimwi takanwi waini pe, nishiba shimwi shikola, ulakakwata insana sha Moza Usalala kacili mwifwu lyakabaina.

¹⁶ Wezu muntu ulakacita kwaamba ba Izilaili banji banji bazhoke ku Mwami Leza wabo.

¹⁷ Inzho Johani nguukaasololela Mwami Jeso, ulimwi ulakaakukwete insana sha Moza shili ukoya shaakaakukwete mushinshimi Elaija. Ulakaleta kuteelezhanya akati kabana ubamaushabo, ulakalulamika bantu bataluleme kwaamba babe u mizeezo mibotu, ulakacita bantu ba Mwami kwaamba balibambile.”

¹⁸ Zakaliya wakamubuzha anjelo ati, “No ndazhiba buti ati ceci nciwaamba cilakacitika? Nkaambo ndakomena, aze mwinangu mucembele.”

¹⁹ Anjelo wakamwiingula ati, “Ndime Gabuliyele! Mutwanga wa Leza uuzhima ku bushu bwakwe ciindi coonse. Wantuma kwaamba nzhize nkwaambile aza makani.

²⁰ Inzho ulaba shicintaamba, ubobo tuukwaamba kushicila sheshi shintu shikacitike nkaambo wiina kwaashoma mazwi angu aza aakaacitika ku ciindi ceelele.”

²¹ Ku ciindi ceco bantu kabamulindila Zakaliya, bakakanka kubuzhanya ati, “No nkaamboonzhi wamuka kuhwa muŋanda ya Leza?”

²² Naakamuhwa, wakakacilwa kwaamba, wakakanka kutambaika matashi cakutaamba linji, ubobo bantu bakashimpikila kuzhiba ati wabona cilengaano muŋanda ya Leza.

²³ Bulizhi bwakwe bwakusebeza muŋanda ya Leza nibwakamana, Zakaliya wakaya kwakwe.

²⁴ Inzho nikwakaita mazuba, Lizabeti wakemita, amane wakaliseseka ku bantu kwa myezhi yosanwe,

²⁵ ulaamba ati, “Inzho Mwami wamfwila luse nkaambo wantaba, wankusha insoni ku bantu!”

Anjelo Gabuliyele Waamba sha Kuzhalwa kwa Jeso

²⁶ Ciindi Lizabeti naakakwanya mwezhi iili cisambomwi yakumita, Leza wakatuma anjelo Gabuliyele kuya ku Nazanleta mucishi ca Galilaya.

²⁷ Wakamutuma kunakalindu wakaakuseselwe ku mulombwana uutewa ati Jozefu wa luhubo lwa Devidi, izhina lya nakalindu wezo kali Maliya.

²⁸ Anjelo wakeza kwakwe wamwaambila ati, “Uwe umulonjezhe, Mwami Leza abe aze.”

²⁹ Maliya naakaateelela aza mazwi wakazhingwa cini cini, wakalibuzha mu monzo wakwe ati, “Anu nkwaanzha kuli buti koku?”

³⁰ Inzho anjelo wakamwaambila ati, “Utatiyi Maliya, Mwami Leza wakufwila luse.

³¹ Bona, ulakamita u kuzhala mwana mweembezhi, ulakamuulika izhina lya Jeso.

³² Ulakaba mulemu, ulakaakutewa ati Mwanakwe Namakungwe Mutalabala. Mwami Leza ulakamupa bwami buli ukoya mbwaakaakubele Devidi ushi,

³³ ulakaba muleli wamushobo wa Izilaili shikwense uushikwense, bulelo bwakwe tabukamana!”

³⁴ Inzho Maliya wakamubuzha anjelo ati, “No ceci cilakonzha kuba buti kwangu ume iintezhi mulombwana?”

³⁵ Anjelo wakamwiingula ati, “Moza Usalala ulakeza alyuuwe, iinsana sha Leza wamwizeulu shilakakuhumba. Wezo nguukaazhala Usalala ulakaakutewa ati Mwanakwe Leza.

³⁶ Sa ulamuzhibaluka Lizabeti musazhinoko welya ngubakaakwaamba ati tazhali? Inzho ulimishi mwana mweembezhi mu bucembele bwakwe. Mwezhi weno ngwacisambomwi.

³⁷ Nkaambo kwiina cikaka kwa Leza.”

³⁸ Maliya wakaamba ati, “Ume ndimuzhike wa Mwami, acibe kwangu mbubona mbuwaamba.” Ngoonaawo anjelo wakamushiya.

Maliya waya Kuswaya Lizabeti

³⁹ Kwiite mazuba mashoonto, Maliya wakabweza lweendo cakubindaana kuya ku munzhi uuli mu mapili mucishi ca Judiya.

⁴⁰ Wakaya kunjila muŋanda yaka Zakaliya, wakamwaanzha Lizabeti.

⁴¹ Inzho Lizabeti nakateelela kwaanzha kwaa Maliya, mwana wakaakuli mwifwu lyakwe, wakasamba ca kubotelwa. Ngoonaawo Lizabeti wakeendelezhewa u Moza Usalala,

⁴² wakapozomoka ati, “Ulikwete coolwe uwe akati kabakaintu boonse, u mwana ngukaazhala ulikwete coolwe!

⁴³ Anu ndime ni iinkonzha kuswayiwa kwa baina Mwami wangu?

⁴⁴ Mbuwaŋanzhizha bulyo, aze mwana uuli mwifwu wasamba ca kubotelwa.

⁴⁵ Ulikwete coolwe nkaambo wakashoma ati, makani a Leza nguwakaambilwa alishinizhe alakacitika.”

Lwiimbo lwa Maliya Lwakutembaula

⁴⁶ Maliya wakaamba ati, “Ndakulumba Mwami mu monzo wangu.

⁴⁷ Moza wabotelwa cini cini kaambo ka Leza mufwutuli wangu,

⁴⁸ ukuti wazhibaluka kulicesha kwangu, ume ndimuzhike wakwe. Inzho mazhalane oonse alakenta ati, uli ucoolwe,

⁴⁹ nkaambo Leza shinsana shoonse wancitila shintu shikando, nkaambo kezhina lyakwe lilasalala.

⁵⁰ Wakatondezha luse ku bantu boonse bamulemeka, kukancila kwizhalane limwi kushicila kuli limwi.

⁵¹ Wakacita shintu shizoosha iitashi lyakwe, ukwaandaanya bantu bakwete mizeezo yamatunta mu myonzo yabo.

⁵² Wabakusha baleli bashinsana mu shuuna shabo ukusumpula balibonzha.

⁵³ Bafwile inzala bekuta shintu shibotu, bahubi wabatanda cinkambaminwe.

⁵⁴ Wacibamba cishomezho ncaakashomezha kuli ba shaakale besu, ulimwi wamuyohwa Izilaili musebezhi wakwe.

⁵⁵ Wazhibaluka kuba shiluse kwa shaakale wesu Abulahamu ukuluhubo lwakwe luzhiza shikwense u shikwense.”

⁵⁶ Maliya wakakala u Lizabeti kwa myezhi iitiikabe yotatwe, amane wakapiluka kwakwe.

Kuzhalwa kwa Johani Mupapatizhi

⁵⁷ Ciindi nicakashika caka Lizabeti cakutumbuka, wakazhala mwana mweembezhi.

⁵⁸ Bashimukobonina ubasazhiina nibakateelela Mwami mbwaakatondezha luse kwa Lizabeti, boonse bakasekelela antoomwi.

⁵⁹ Inzho mwana naakakwanya mazuba ali lusele, bakeza kwaamba bamupalule. Kabazanda kumuulika izhina lya ushi, ati ngu Zakaliya.

⁶⁰ Pele baina wakaamba ati, “Pe pe! Izhina lyakwe ngu Johani.”

⁶¹ Bantu bakaamba ati, “Kwiina musazhinoko naaba womwi uukwete izhina leli.”

⁶² Ngoonaawo bakatambaika matashi kwa ushi, kumubuzha izhina ndyazanda kuulika mwanakwe.

⁶³ Ngoonaawo Zakaliya wakalomba shakulembela kwiita mukutambaika matashi amane walemba ati, izhina lyakwe ngu Johani. Inzho bantu boonse bakazhingwa.

⁶⁴ Mbwaakamanina bulyo kulemba, Zakaliya wakakanka kwaamba ulimwi ukutembaula Leza.

⁶⁵ Beenzhiina boonse bakatiya cini cini, u makani aza akayeempuwo mucishi coonse ca mapili a Judiya.

⁶⁶ Boonse babo bakateelela sheshi shintu bakashibika mu myonzo yabo, bakaabuzhanya ati, “Anu wezu mwana ulakaba muntu uuli buti?” Nkaambo cakalibonya kwaamba ati, insana sha Leza kashilyaaze.

Kushinshima kwaka Zakaliya

⁶⁷ Zakaliya ushi Johani, wakeendelezhewa u Moza Usalala, wakashinshima ati,

⁶⁸ “Atembaulwe Mwami Leza wa Izilaili, nkaambo weza kuyohwa ukunununa bantu bakwe.

⁶⁹ Wakatupa mufwutuli shinsana kwiza kutufwutula, wakahwa muluhubo lwaka Devidi.

⁷⁰ Umbona mbwaakaamba kwiita mu bashinshimi bakwe ku mazuba a kale kale basalala.

⁷¹ Wakaamba ati, ulakatufwutula kuhwa mu matashi a bashinkondonokwesu, u babo batuswile.

⁷² Wakaamba ati ulakabacitila luse baushesu bakale kale, ulimwi takaluba cihuminano cakwe cisalala.

⁷³ Ncakapinga kwa ushesu Abulahamu, ukutushomezha ati,

⁷⁴ ulakatuhuna kumatashi a bashinkondonokwesu kwaamba ati tukamusebezele cakubula bukandu,

⁷⁵ ukweenda cabusalazhi ubululami, kwaamba tube basalazhi ubalulami ku mazuba oonse a bumi bwesu.

⁷⁶ Uwe u mwanangu ulakatewa ati, mushinshimi wa Namakungwe Mutalabala, ulakasololela Mwami kumululamicila inzhila yakwe.

⁷⁷ Ulakazhibya bantu bakwe kwaamba balakafwutulwa u kulecelelwa shibi shabo.

⁷⁸ Lufwutuko lwa Mwami lulakeza kulyuuswe kuhwa kwizeulu, ukoya mumuni wezuba kumahwilo,

⁷⁹ ulakamunikila bantu boonse bashite mu mushinze umucinhule ca lufwu, ukutusololela muluumuno.”

⁸⁰ Inzho Johani wakakomena ku mubili uku Moza. Wakaakukala mulukula kushikila kubuzuba naakakanka milimo yakwe ya buleya mu Izilaili.