Incito 1 - Izwi lya Leza

¹ Teyofilasi, mwibuka lyangu lya kutaanguna ndakakulembela makani aka Jeso u shintu nshaakacita shoonse u kuyiisha kuhwa ku makancilo,

² mpaka kushicila ciindi naakatolwa kwizeulu. Pele katana kutolwa kwizeulu, wakapa malailile kwiita mu Moza Usalala ku batumwa bakwe mbaakasala.

³ Amane kufwa u kubuka, wakalitondezha nkubabele munzhila shishiyene shiyene. Wakalibonya ukubandika abo makani a bwami bwa Leza kwa mazuba ali makumi one.

⁴ Ulimwi nibakaakubungene antoomwi, wakabapa mulawo wakuti, “Mutamuhwi mu Jelusalemu, pele mulindile cipo ceco Taata ncaakamushomezha, ncindakamwaambila kale.

⁵ Nkaambo Johani wakapapatiza u meenzhi, pele umwe mulakapapatizwa u Moza Usalala kwakaita mazuba mashoonto bulyo.”

Jeso waya Kwizeulu

⁶ Inzho batumwa nibakaakubungene atoomwi u Jeso, bakamubuzha ati, “Mwami, sa ninzho ukalababweezhezha bwami ba Izilaili?”

⁷ Jeso wakabaambila ati, “Tacili cenu cakuzhiba shiindi nishikaacitika nkaambo shili munsana sha Taata.

⁸ Pele Moza Usalala akeza ali umwe mulakatambula insana, mulaaba bakamboni bangu mu Jelusalemu umu Judiya moonse, ulimwi umu Samaliya, ukumamanino anshi.”

⁹ Amane kwaamba bobo, wakatolwa kwizeulu boonse balimulanjilile. Ngoonaawo ikumbi lyakabashinkila bakaleka kumubona.

¹⁰ Inzho kabacilanjile mwizeulu, ndilyona kwakeza balombwana bobile bakaakusamine shisani shituba, beza kuzhima afwaafwi.

¹¹ Balombwana babo bakaambila ba shiciiya ati, “Umwe nubantu bamu Galilaya, ncinzhi ncimuzhimine awa ukulyaalala mwizeulu? Wezu Jeso watolwa mwizeulu, ulakeza ulimwi munzhila njiyona njimwamubona ulaya kwizeulu.”

Wakalya Izhina lya Judasi

¹² Inzho batumwa bakabweela ku Jelusalemu kuhwa ku lupili lwa masamu a Oliva. Mushinzo wakuhwa ku Jelusalemu kuya koko kooli mufwaafwi cini cini.

¹³ Bakenjila mu Jelusalemu, bakaya kuŋanda koko nkubakaakukala. Batumwa baba kabali ba, Pita u Johani, u Jemusi, u Andulu, u Filipo, u Tomasi, u Batolomeyo, u Matayo, u Jemusi mwanakwe Alufayasi, u Saimoni mulondo, u Judasi mwanakwe Jemusi uunji.

¹⁴ Baba boonse kabalyaabile kukomba ca monzo womwi, antoomwi u Maliya baina Jeso, u banina Jeso u bakaintu bamwi.

¹⁵ Nikwakaita mazuba mashoonto kwakaba muswaangano wa babo ba bunina mwa Jeso, boonse antoomwi kabatandila kumwaanda u makumi obile. Inzho Pita wakazhimuka

¹⁶ waamba ati, “Bakwesu, kasheelele kucitika shesho shakaambwa mu maŋwalu shizeeme ku makani aka Judasi. Moza Usalala wakaamba kwiita mwa Devidi, ushaawezo wakasololela babo bakamukwata Jeso.

¹⁷ Judasi kali umwi wesu, aze kasalilwe kwaamba asebeze antoomwi aswe.”

¹⁸ Mali ngakayana Judasi kumulimo wakwe wa cibi ngwaakacita, wakaula muunda. Momo mwaakawila kusolozha mutwi anshi, waanduka efwu, shoonse shamwifwu lyakwe shakahwa shawila anshi.

¹⁹ Bantu boonse bakala mu Jelusalemu bakaateelele makani aza. Ubobo mucaambo cabo bakaulika muunda wezu ati “Akelidama,” cipandulula ati, “Muunda wabulowa.”

²⁰ Inzho Pita wakaamba ati, Cililembelwe mwibuka lya ntembauzho ati, “Iŋanda yakwe alikabe itongo. Kutabi muntu ukala mo pe!” Ulimwi kulilembelwe ati, “Muntu uunji akabweze busena bwamulimo wakwe!

²¹ “Ubobo atusale muntu unji, akati kababo mbutwaakuli abo ciindi Mwami Jeso naakaakuli aswe.

²² Kukancila ciindi Johani naakakambauka makani a lupapatizo kuya kushika kubuzuba nitwakaandaana u Jeso nakatolwa kwizeulu. Nkaambo ulyeelele kupa bumboni antoomwi aswe bwakuti Jeso wakabuka ku bafwu.”

²³ Ubobo bakanoma mazhina abantu bobile, ba Jozefu waakutewa ati Basabasi ulimwi kaakutewa ati Jasitasi, u Matiyasi.

²⁴ Inzho bakakomba ati, “Mwami ulizhi myonzo ya bantu boonse, tutondezhe na nguni abantu baba bobile nguwasala

²⁵ kwaamba abweze wezu mulimo wa butumwa mu busena mbwakashiya Judasi ciindi naakaya kubusena bumweelele.”

²⁶ Bamane kukomba bakawaala cisolo, inzho wakasalwa ngu Matiyasi. Ubobo wakazunjilwa abatumwa bali ikumi uutwesha womwi.