Bafilipo 1 - Izwi lya Leza

¹ Ndime Paulu u Timoti basebezhi ba Kilisito Jeso, tulalembela bana musalazhi bali mu lukamantano u Kilisito Jeso, ubali mu Filipi antoomwi u basololi ubayohwi babo mu mbungano.

² Leza Taata u Mwami Jeso Kilisito amufwile luse u kumupa luumuno.

Paulu wa Bakombela Babala

³ Ndalumba Leza wangu lyoonse niimuzhibaluka.

⁴ Lyoonse nimukombela, ndakomba calutangalo,

⁵ ukaambo ka shintu nshimwakacita nimwaakunjohwa kumwaya Makani Mabotu kuhwa nimwakaateelela kushicila bwasunu.

⁶ Ulimwi ndizhishi kwaamba wezu mulimo mubotu ngwaakakanka muli umwe Leza ulakoomaninzha mpaka mu buzuba bobo Jeso Kilisito mbwaakaazhoka.

⁷ Nceelelo kuli ume kwaamba ndukuliteelela bolya nkaambo monzo wangu uli ali umwe lyoonse, nkaambo ume nikuba ati ndili muntolongo mu maceetani, ninkwabilila u kwaazumya aza Makani Mabotu. Noonse umwe twakaabana amwe ceci coolwe ncaakampa Leza.

⁸ Leza ulizhi ati ndimufwini noonse u lufwuno luli ukoya lwa Kilisito.

⁹ Ndakomba ati mukomene, mukuzandisha kuzhiba u kuteelelesha koonse,

¹⁰ nkaambo nimukazhibisha kusala shibotu nshaazanda Leza. Ubobo mulalondoka u kubula kampenda nimulindila buzuba bwa Jeso Kilisito.

¹¹ Bumi bwenu bulatondezha incito shiluleme shihwa kwa Jeso Kilisito, kwaamba boonse bantu balemeke u kulumbaizha Leza.

Tulapona Kusebezela Kilisito

¹² Ndazanda kumuzhibya bakwesu kwaamba shesho shakancitikila shakayohwa cini cini kwaamba mulumbe wa Makani Mabotu umwaale.

¹³ Balindizhi ba ŋanda ya mwami ubamwi bulyo balizhi kwaamba ati ndyaangilwe nkaambo ndi musebezhi wa Kilisito.

¹⁴ Ukaambo kakuti ndimwaange, bakwesu banji banji ba shoma mu Mwami, cakabazumya zumya, ukukambauka mazwi a Leza cakutafwa bukandu.

¹⁵ Nkubali bamwi bakambauka makani a Kilisito ukaambo kamunyono u kuzanda kukazhanya, pele nikuba bobo nkubali bakambauka u myonzo ili kabotu.

¹⁶ Baba, mbubamukambauka ca lufwuno ulimwi balizhi ati Leza wakampa mulimo wakukambauka Makani Mabotu.

¹⁷ Bamwi tabaakambauki bweelele makani aka Kilisito. Mbubashikulizanda ulimwi balazanda bulyo kunzungila mapenzhi mubwaange bwangu.

¹⁸ Pele ciina makani nikuba ati balakambauka makani aka Jeso munzhila italuleme niiba iluleme, kufwumbwa bulyo kuti Jeso wakambaukwa ume ndaininwa.

¹⁹ Cini cini ndaakuciya bubotelwa nkaambo ndizhi ati kwiita mu kukomba kwenu u luyohwo lwa Moza Usalala ngwaapa Jeso Kilisito, ndakaangululwa.

²⁰ Ndalindila ca monzo woonse kwaamba nkwate camba ninzho u ciindi cizhiza kwaamba Kilisito apewe bulemu mulyuume naaba ati ndimumi na ndimufwu.

²¹ Ndaakupona, ndaponena kusebezela Kilisito, pele kuti ndafwa, impindu kwangu.

²² Kuti ndaakucipona ati ndayana coolwe cakusebezela bamwi. Ashintu sheshi shobile, shicizhi ncinkonzha kusala.

²³ Ndaakwata maanka-maanka. Kuzandisha kwangu nkuya kwa Kilisito nkaambo ncicibaala kubota!

²⁴ Pele ukaambo kenu bulyo, cilyeelele kwaamba ndukucipona.

²⁵ Awo nshishinshaika pe, ulimwi ndizhi ati ndaakucipona u kukala amwe noonse kwaamba lushomo lwenu lukomene ukumubotela.

²⁶ Ubobo ndakashika kwenu mulakakwata cakulyeensheensha mu bumi bwenu mu lukamantano u Kilisito ukaambo kangu.

²⁷ Inzho cintu cikando ncimweelele kuzhiba ncakuti bukale bwenu bweendelane u Makani Mabotu aamba sha Kilisito. Niinkazhiza kumubona, naa ndili kulaale, ndazanda ati nteelele ati mulikwatishe u monzo womwi. Ulimwi ndazanda ati nteelele kwaamba mulikwete muzeezo womwi ulimwi ukuti mulayohwana kulwa inkondo yakukwabilila lushomo luhwa ku Makani Mabotu.

²⁸ Mutabalekela ba shinkondonokwenu kwaamba bamukonge munzhila niiba buti. Sheshi shilatondezha kwaamba balakazonaunwa pele umwe mulakafwutulwa. Leza nguukaamucitila aza,

²⁹ nkaambo wamupa ciindi cakumusebezela u kumupengela.

³⁰ Inzho umwe mulalwa inkondo antoomwi ame. Njiyona njimwakabona ndalwa ulimwi ncilwa uninzho umbona mbumuteelele.