Baefeso 1 - Izwi lya Leza

¹ Ndime Paulu mutumwa waka Kilisito Jeso wakasalwa mu luzando lwa Leza. Ndamwaanzha nubana musalazhi numuli ku Efeso numushoma Kilisito Jeso.

² Akube luse u luumuno kuli umwe kuhwa kwa Leza Tatesu u Mwami Jeso Kilisito.

Shileleko sha Moza mwa Jeso

³ Atumulumbe Leza ushi Mwami wesu Jeso Kilisito wakatupa shileleko shoonse sha moza shikanana sha kwizeulu.

⁴ Leza wakatusala mwa Jeso Kilisito katana ukulenga inshi kwaamba tusalale u kubula kampenda ku bushu bwakwe.

⁵ Nkaambo kalufwuno wakakanzila limwi kutusala kwaamba atucite kuba banakwe mwa Jeso Kilisito.

⁶ Atutembaule luse lwakwe lwa bulemu ndwaakatupa bulyo kwiita muli wezo ngwaafwini.

⁷ Leza wakatunununa nkaambo kabulowa bwa mwanakwe, ulimwi wakatulecelela shibi shesu ukaambo ka luse lwakwe lunji lunji

⁸ ndwaakatutondezha muluzhibo umbusongo bwakwe.

⁹ Leza wakatuzubululila makanze akwe a kaakusesekelwe ngakazeeza kucita mwa Kilisito.

¹⁰ Ceco Leza ncaakaakukanzile kucita muciindi ceelele ncakuti, umwa Kilisito aswaanganye shintu shoonse sha mwizeulu u shaanshi.

¹¹ Shintu shoonse shilacitika kwiingainya umakanze aka Leza. Ulimwi wakatusala kwaamba tube bantu bakwe mwini babo mbaakakanzila limwi mu mizeezo yakwe yakucita shintu kwaamba shoonse shicitike kwiingaina u luzando lwakwe.

¹² Walo kazandisha ati uswe tubataanzhi mukulanjila Kilisito, tutembaule bulemu bwa Leza.

¹³ Amwe mwakateelela mazwi a Leza meni meni, ali ngu Makani Mabotu a lufwutuko lwenu, ulimwi mwakashoma Kilisito. Leza wakamubika citondezho cakuzhibya ati muli bantu bakwe naakamupa Moza Usalala ngwakashomezha.

¹⁴ Moza Usalala ncicitondezho cakuti tulakatambula shileleko shoonse Leza nshaakashomezha. Leza wakacita bobo kwaamba tutembaule bulemu bwakwe.

Kukomba kwa Paulu

¹⁵ Ukaambo kasheshi shintu, kuhwa indakateelela makani a lushomo lwenu mu Mwami Jeso u lufwuno lwenu ku bashomi nokwenu,

¹⁶ ndiina indakaleka kulumba Leza. Ndamutelaika lyoonse mu kukomba kwangu.

¹⁷ Ndakomba ati Leza wa Mwami wesu Jeso Kilisito, Tatesu wa bulemu amupe Moza wabusongo, umuzubulwile Leza kwaamba mumuzhibe.

¹⁸ Ndakomba ati Moza Usalala umunice mu myonzo yenu kwaamba muzhibe shesho Leza nshaakamwitila, ulimwi muzhibe shileleko shikando Leza nshaakamushomezha kupa bantu bakwe.

¹⁹ Ulimwi amuzhibe ati insana shakwe shilasebeza mulyuuswe tubashomi. Insana shesho inkando,

²⁰ Leza nshakasebezha naakabusha Kilisito ku bafwu u kumukalika kwitashi lyakwe lya ku cilyo mu busena bwa kwizeulu.

²¹ Wakamubika ezeulu lyabo boonse beendelezhi u bakando u bami, ulimwi uli ezeulu a mazhina ushuuna shoonse shili ano anshi u kwizeulu, kutaamba bulyo ciindi ceno, pele u ciindi cizhiza.

²² Leza wakabika shintu shoonse kunshi lya maulu akwe, ulimwi wakamucita kwaamba abe ngu mutwi wa shintu shoonse mu mbungano.

²³ Imbungano ngu mubili wakwe, nkukuzulila kwakwe wezo u uzwile mu shintu shoonse mu shiyanza shoonse.