2 Timoti 1 - Izwi lya Leza

¹ Ndime Paulu, mutumwa waka Kilisito Jeso, wakatumwa kukambauka bumi bwakashomezhewa mbutukwete mukukamantana u Kilisito Jeso.

² Ndakwaanzha Timoti mwanangu unakufwunwa. Leza Taata u Kilisito Jeso mwami wesu bakufwile luzhalo u luse ukupa luumuno.

Kulumba Leza u Kuzumya zumya Timoti

³ Ndapa kulumba kwa Leza walo ngwinsebezela ca monzo ushitikile usalala, umbona bwakacita ba shaakale bangu. Ndamulumba lyoonse ninkutelaika mu kukomba u mipailo yangu mashiku u muunza.

⁴ Ndeezhibaluka misozhi yako ulimwi ndazandisha ati tukabonane aze kwaamba nkaininwe cabulowe.

⁵ Ndaluzhibaluka lushomo lwabwini nduukwete, ndashoma ati ulikwete lushomo ndwaakaakukwete nkaakaako Loyisi u banoko Yunisi.

⁶ Ubobo ndakuzhibalusha kwaamba ubike maanu kucipo cakakupa Leza indakakwaampa matashi cihwilime ukoya mulilo.

⁷ Nkaambo Moza ngwaakatupa Leza tootupi bukandu, pele wezu Moza Leza ulatupa insana, lufwuno u kulikwata.

⁸ Utaakufwa insoni kuba kamboni wa Mwami wesu na kufwa insoni ukaambo kangu ndimwaange wakwe Kilisito. Inzho atupenge aze ukaambo ka Makani Mabotu kwiita munsana sha Leza.

⁹ Wakatufwutula amane watwita kwaamba tube bakwe, kutali ukaambo ka shintu nshitwakacita, pele nkaambo kamuzeezo wakwe u luse lwakwe. Wakatupa lolu luzhalo kwiita mu lukamantano u Mwami kaatana kushika malenjelo anshi,

¹⁰ pele ninzho twazubululilwa kwiza kwa Mufwutuli wesu Kilisito Jeso. Wakashimana insana sha lufwu ulimwi kwiita mu Makani Mabotu twakazubululilwa bumi butamana.

¹¹ Leza wakampa mulimo wa butumwa u bwiiyi kwaamba nkambauke Makani Mabotu,

¹² nciceco ncimpengela bolya. Pele ncikwete lushomo luzwile nkaambo ndimwizhi ngundakashoma, ubobo nshifwi insoni nkaambo ndishinizhe kwaamba uleembela ncindakapewa kushicila mu buzuba bobo nakaazhoka Kilisito.

¹³ Akwatishe mazwi a lushinizho ngu ndakakuyiisha kwaamba ube cikozhano nguuyelele kucilila, ulimwi kakatila kuba mu lushomo u lufwuno luli mwa Kilisito Jeso.

¹⁴ Kwiita munsana sha Moza Usalala, walo upona mulyuuswe, shibambe shintu shibotu nshiwakapewa.

¹⁵ Ulizhi kale ati boonse bali mu Ezha bakanshiya, kubicilizha u Figelusi u Hemogenesi.

¹⁶ Mwami abafwile luse ba mukwashi waka Onesifolasi, nkaambo mu shiindi shinji shinji nguumanya bwiimbi. Wiina kufwa insoni ukaambo kakuti ndakaakuli muntolongo,

¹⁷ pele mbwaakashicila bulyo mu Loma, wakankapula kushicila wakanjana.

¹⁸ Mwami akamupe luse mu buzuba bolya! Ulizhi kabotu nshaakancitila mu Efeso.