1 Bakolinto 1 - Izwi lya Leza

Kulipandulula kwaka Paulu kuba Kolinto

¹ Ndime Paulu wakatewa kuba mutumwa wa Kilisito Jeso mu luzando lwa Leza. Ndili u Sositinesi mukwesu.

² Tulalembela imbungano ya Leza iili mucishi ca Kolinto. Babo boonse mbaakasala Leza kuba bakwe, kwiita mwa Jeso Kilisito. Uku banamusalazhi, antoomwi u babo boonse bali mu masena oonse bakomba mwizhina lya Mwami Jeso Kilisito, uutewa ati ngu Mwami wabo aswe antoomwi.

³ Leza Tatesu u Mwami Jeso Kilisito, bamufwile luse u kumupa luumuno.

Kulumba Leza

⁴ Lyoonse ndalumba Leza wangu ukaambo kenu, ukaambo ka luse ndumwakapewa mukukamantana u Kilisito Jeso.

⁵ Ukaambo kalukamantano lwenu u Kilisito, mulihubile munzhila shoonse. Mu kwaamba kwenu ulimwi u muluzhibo.

⁶ Nkaambo makani aamba sha Kilisito alibonya kuba meni meni akati kenu.

⁷ Ubobo umwe kwiina cipo ca luse ncimubula, ciindi nimulindila kwiza kwa Mwami wesu Jeso Kilisito.

⁸ Leza ulakamuzumya zumya mpaka kushicila ku mamanino kwaamba mutakapewa kaambo mu buzuba bwa Mwami wesu Jeso Kilisito.

⁹ Leza ulashomeka, ulimwi nguwakamwita kwaamba mube mu lukamantano u mwanakwe Jeso Kilisito Mwami wesu.

Mipampo Mipampo mu Mbungano

¹⁰ Inzho ndamukumbila nubakwesu, mwizhina lya Mwami wesu Jeso Kilisito, kwaamba noonse muteelezhanye, kutabi kwaandaana akati kenu pe. Pele amukamantane antoomwi ca kumaninina iitelaishi lyomwi, u muzeezo womwi bulyo.

¹¹ Nkaambo ndakateelela makani aahwa kumukwashi wa Kilowe, aamba ati, kuli kuzwangana akati kenu.

¹² Inzho nciŋamba ncakuti umwi uumwi wenu ulaamba shakwe mwini. Umwi ulaamba ati, “Ume ndacilila Paulu,” uumwi ati, “Ume ndacilila Apolosi,” Uumwi ati, “Ume ndacilila Kefasi,” ulimwi umwi ati, “Ume ndacilila Kilisito.”

¹³ Sa Kilisito mwaapaule? Sa Paulu nguwakakankaminwa aciciinkano ukaambo kenu? Sa mwakapapatizwa mwizhina lyaka Paulu?

¹⁴ Ndalumba Leza kwaamba kwiina naaba womwi wenu ngundakapapatiza! Cita bulyo Kilisipasi u Gayasi.

¹⁵ Ubobo kwiina ukonzha kwaamba ati wakapapatizwa mwizhina lyangu.

¹⁶ Pele atubone, ndakapapatiza ba mukwashi wa Sitivini, kunze kwa baba, nshitelaiki ati kuli uunji ngundakapapatiza pe.

¹⁷ Nkaambo Kilisito wiina naakantuma kupapatiza pe, pele kukambauka Makani Mabotu. Ubobo, ndyeelele kukambauka cakutacilila busongo bwa bantu, kutiya ati insana sha lufwu lwa Kilisito aciciinkano shitabi shabulyo.

Jeso Ninsana u Busongo bwa Leza

¹⁸ Inzho makani amba sha lufwu lwa Kilisito Jeso aciciinkano ngabulimbushi kuli babo bazhimini, pele kwesu uswe utuli munzhila ya lufwutuko, ninsana sha Leza.

¹⁹ Nkaambo kulilembelwe ati, “Ndakazonauna busongo bwa basongo, Ndakapilinganya maanu a bashiluzhibo.”

²⁰ No ninzho, ulikwi muntu musongo? Ulikwi wezo musongo? No mbalikwi bashikukazhanya ba anshi ano? Kayi nkaambo Leza watondezha ati busongo bwa anshi ano, mbulimbushi.

²¹ Ncizumu kwaamba bantu bamuzhibe Leza mu busongo bwabo. Ubobo cakamubotela Leza kwaamba afwutule babo ba shoma kwiitila mu makani ngutukambauka ngubaamba ati ngabulimbushi.

²² Nikuba ati ba Juda balazanda kubona maleele, abo ba Giliki balakapula busongo.

²³ Uswe tulakambauka sha Kilisito uwakankaminwa aciciinkano, kuba Juda aza makani ncilebyo, ako ku bantu bakunze mbulimbushi.

²⁴ Pele kuli babo mbaaketa Leza, ba Juda nibaba ba bahwa mashi, balizhi ati Kilisito ninsana u busongo bwa Leza.

²⁵ Nkaambo ceco cilibonya ukoya bulimbushi bwa Leza, mbusongo kubaala bwa bantu, aco cibonwa ukoya bufwafwalishi bwa Leza, cilikwete insana kubaala shabantu.

²⁶ Nubakwesu, amutelaike, no mwakaakuli bani ciindi Leza naakamwita? Mbashoonto akati kenu bakaakuli basongo, na bashinsana na bakaakuli balemu.

²⁷ Pele Leza mu kuzanda kwakwe, wakasala shintu nshibatelaika bantu ba anshi ano ati nshabulimbushi kwaamba abaushe insoni basongo. Ulimwi Leza wakasala shintu shiina insana sha anshi ano kwaamba abaushe insoni bantu ba shinsana.

²⁸ Ulimwi Leza wakasala shintu nshibatelaika bantu baanshi ati shiina mulimo, kwaamba shesho nshibatelaika ati shilikwete bulemu shibe shabulyo.

²⁹ Leza wakacita bobo ati, kutabi muntu naaba womwi ulisumpula kumenso akwe.

³⁰ Pele Leza wakamuswaanganya antoomwi u Jeso Kilisito kwaamba abe mbubusongo bwesu, wakatululamika kwa Leza. Twakaba bantu baleza basalala ulimwi balubushi.

³¹ Cili umbona mbucilembelwe umalembe ati, “Wezo uzanda kulikankaizha, ulyeelele kulikankainzha ceco Mwami ncaakacita.”