Ele Hiburu 3 - Tẹsitamenti Ikne n'Ọnu Ikwere

Jizọsi kakwo Mozizi

¹ Kam kpayarụ, rụmu nda m, ele zị nsọ, ele vu osukwu ikwu oligwe, anụ rị ọriri nhne gbasịri Jizọsi, nye izi, nụ nye risi arịohna ke ọkwnata ovu aị.

² Ọ bụ nye kwesiri ọkwnata ovu nyee nye họhiaru a, lele kpa Mozizi bụri nye be tụkwasiri ovu nụ kpakara ẹrnu a n'ọro Chiokike.

³ Jizọsi kwesiri o nwe igwugwu ke kakwo igwugwu Mozizi lele kpa nye wuru ọro nwernu igwugwu karụ ọro o wuru.

⁴ Kwnornu nụ kpakara ọro nwernu nye wuru a, kọvu Chiokike wuru kpakara nhne.

⁵ Mozizi, lele nnwọ izi be kwesiri ọ tụkwasi ovu nụ kpakara ọro a, gbarụ akebne nhne be jookwu nụ ruwhnu.

⁶ Kọvu Karaịsi kwesiri ọkwnata ovu lele nnwọ n'ọro Nda a. A bụ ọro a, ọ bụru a bịta mkpọma siri rikne aị, gwuzosi masị rikne nụ nhne a neele anya a.

Ozukwa inwe ke rụmu Chiokike

⁷ Lele kpa Enine Nsọ karụ, “Tna, ọ bụru nụ anụ nụrnu nkọli a,

⁸ anụ mée ovu anụ si rikne, lele kpa ele Izirẹli mernu nga be gwuzogidnernu Chiokike, ige ọrnurna n'ẹli-ịkpa.

⁹ Nga ele nda anụ ọknani kparụ m iru, kpahịa m, be whnụrnu ẹrnu m nri awha ẹno.

¹⁰ Ovu weru m ẹhni kwnornu ebiri kam, m kaa, ‘Mkpọma be noowhu apna, be kwége ọ bịta iwu m.’

¹¹ Kam kpayarụ, m ji m ovu owe ẹhni dụ risi, kaa, ‘Be jáabna hne me jeenye be ozukwa inwe.’ ”

¹² Rụmu nda m, anya dụ anụ ẹli, ọ zá nye ọbula n'esilawụru anụ ke jeenwe ovu mmehie ke kwé ekwe ke jeeme a ọ whọga nụ hne Chiokike ke zị bụdnu zị.

¹³ Kọvu anụ kwnagidne ibne anụ hnebụko ọbochi be kwuru “Tna.” Ọ zá nye kwe aghịgho ke mmehie mee ovu a si rikne megidne Chiokike.

¹⁴ Kwnornu nụ ọ bụru a jidne ọkwnata mkpọma a nwernu nụ mbọm dụ okwukwo, aị nụ Karaịsi jeekekọ nhne.

¹⁵ Lele kpa be gbarụ n'ọkwukwo nsọ, “Tna, ọ bụ nụ anụ nụrnu nkọli a, anụ mékọ ovu anụ si rikne lele kpa ele Izirẹli mernu nga be gwuzogidnernu Chiokike.”

¹⁶ Ndaa ele nụrnu nkọli Chiokike mee risi rikne? Ọ bụ́o ele Mozizi hiri n'ẹli Ijipiti duhịa sa?

¹⁷ Ndaa ele Chiokike wesanụ ovu ẹhni nri awha ẹno? Ọ bụ́o ele mehieru, bụ ele iznu be dnarnụ n'ẹli-ịkpa?

¹⁸ Ndaa ele Chiokike dụru risi nụ be jáabna nụ hne o jeenye be ozukwa inwe? Ọ bụ́o ele bnóge nsnị?

¹⁹ A whnụrnu nụ be bnáge hne o jeenye be ozukwa inwe kwnornu nụ ókwe ekwe be.