Zẹkaraya 9 - Ika

Isi Nke Itenẹi Ihiẹn Osolobuẹ K'e Mẹ Ndị-iṅẹnrẹn Izrẹlụ Alị Aram Lẹ Hamatị

¹ Ihiẹnni kẹ Osolobuẹ sị n'o k'e mẹ alị hụ, alị Aram hụn wụ alị Hadrakị, tụmadụ isi-alị a wụ Damaskọsụ, makẹni ịhịan ile lẹ ndị Izrẹlụ rị okpuru Osolobuẹ:

² O k'e mẹshizikwọ alị Hamatị ikẹn Hamatị ya lẹ Aram nọ okẹn, ịya lẹ alị Taya lẹ Sidọnụ, ọsụọn'a nị ndị Taya lẹ Sidọnụ a waka ẹnya.

Alị Taya Lẹ Sidọnụ

³ Alị Taya a tụnhunmẹgụọ enwẹn ẹ mgbọn zegbu enwẹn ẹ; o kpọngụọ siliva kpọnjun nọkẹ ẹjan, kpọn goru kpọnjun nọkẹ ịkpọtọ rị ụzọ.

⁴ Kanị Di-nwọnni-ẹnyi k'a napụ a ihiẹn ile o nwọn, tikpọ akụ-lẹ-ụba ile ohimin e wẹhẹn'ẹ ẹ la iwi; ọkụn sikọ d'e ripụ alị Taya.

Alị Filistia

⁵ Ndị obodo Ash'kẹlọnụ k'a hụn ihiẹn mẹ Taya, egun a bịa wẹ; ndị obodo Gaza k'a hụn a, mama kpakpakpa yeni egun; ẹrịra k'ọ k'a rịzịnị ndị obodo Ẹkrọnụ, makẹni o kpuyegụọ wẹ! Nke ndị obodo Gaza, eze wẹ k'a nwụn! Obodo Ash'kẹlọnụ k'a gba okpokoro!

⁶ Obodo Ash'dọdụ k'e họnrin alị agwagwa! M k'a kụsị mbọnmẹ ndị Filistia.

⁷ M sikọ d'a napụ wẹ ẹdeke-anụ ahụn w'e ri, napụsọnmẹ wẹ ihiẹn ile rụnị w'e ri; alị Filistia k'e họnrinzịkwọ nke Osolobuẹ ẹnyi; o k'a wụrụ ẹbozo imẹ ebọn Juda, ndị Ẹkrọnụ nkẹ k'a wụrụ ndị nke m nọkẹ kẹ ndị Jebusu dọn wụ.

⁸ E weri m ọnọdị che Ụlọ m nche, a zọtịtabehi wẹ alị m; onwọnzini onyẹ k'a ghan'a n'ọ bịangbu wẹ, makẹni ẹnya m hụ a hụn ihiẹn rị e mẹni.

Eze Ndị Izrẹlụ Hụn Lalanị

⁹ Zayọnụ, ghọghọma ọda-ọda! Obodo Jerusalẹm, yi oro ịghọghọ! Lee ẹ, eze i lala d'e kunrun i! Onyẹ ezi-omumẹ lẹ onyẹ-mmẹri k'ọ wụ; o welụa enwẹn ẹ alị, nyinla okẹn jaki, nwa Jaki!

¹⁰ M k'a zapụchanrịn ụgbọ-anyịnyan ile rị alị Ifrem: zapụchanrịn ẹshin-agha rị Jerusalẹm; ụta-agha arịkọzị. Eze ụnụ ahụn k'e wẹhẹni alị ichẹn-ichẹn udọn; o k'a kị ụwa ile — gha ohimin d'e ru ohimin, gha Iyi Yufretisi d'e ru njẹndemẹ ụwa!

¹¹ Nke ụnụ Izrẹlụ, m k'e gi ufiri ẹdeke mmẹ lẹ ụnụ gi kwerigbama, gbapụha ndị nke ụnụ imẹ mgbugbu ahụn mirin rịlẹni wẹ buche wẹ.

¹² Ndị wẹ kwọndọn hụn rị e lee ẹnya nzụọpụha, kinhẹn ni nwan ezigbo ụlọ ụnụ zeni! M rị a gwa ụnụ tannị nị m k'e yekin ụnụ ihiẹn ile ụnụ tuhu, gi hụn han kẹ ịya dụnnị ụnụ ya.

¹³ Ndị Izrẹlụ rị Juda wụ ụta m — e kwọngụọ m'a; ndị Izrẹlụ rị Ifrem wụ ọbara ụta hụ e bugụọ m'a che ụta m! Zayọnụ, m k'e nu ụmụ ị d'a lụ agha; Javanị wụ Grisi, m k'e nu ụmụ Zayọnụ d'a maye ụmụ ị Filistia; gi wẹ mẹ i ihiẹn onyẹ-agha gi ọpịa-agha e mẹ.

¹⁴ Osolobuẹ k'a pụha imẹ elu azụụn nke wẹ; gbama ọbara-ụta a nọkẹ amụma! Chuku nwọn ihiẹn ile k'e gbu opi-agha, gi okẹn ufere gha ẹbamịn ọwụwa-ẹnyanwụn zụnshi agha.

¹⁵ Osolobuẹ ihiẹn ile rị okpuru ẹ k'e che wẹ nche, e mẹri wẹ ndị-iṅẹnrẹn wẹ: a zọgbu wẹ ndị a gba araba, bu wẹ ri, e yi oro-agha nọkẹ ndị manya nwunye ẹnya, ẹdeke e jun k'o jun afẹrẹ nchụn-ẹjan, jun wẹ ẹhụ nọkẹ mpịn ukpo nchụn-ẹjan.

¹⁶ O ru ụhụọhịn hụ, Osolobuẹ wụ Chuku wẹ k'a zụọpụha wẹ, kẹ igunrun atụnrụn wụ nke ẹ; wẹ k'a gha e gbuke imẹ alị a kẹ ihiẹn wẹ gi chọ okpu-eze mma!

¹⁷ Alị wẹ k'a rịchanrịn mma, a la ẹnya! Ọka k'e jun, ikorọbịa hụ e gi ẹ a ban ihiẹn; manya-vaịnị e jun, ịgbagba hụ e gi ẹ a ban ihiẹn.