Zẹkaraya 7 - Ika

Isi Nke Ẹsa Osolobuẹ Sị Ẹlẹ Ibu-ọnụ Ka A Mkpa

¹ Hụn mẹ ẹ ahụa ẹnọ eze-kanị wụ Dariọsụ kịma, nke akpọhịn ẹnọ imẹ ifọn nke itenẹi wụ Kislẹvụ, Osolobuẹ gwa mmẹ wụ Zẹkaraya oku.

² Ndị Bẹtẹlụ zihẹ Sharẹza lẹ Rẹgẹm-mẹlẹki lẹ ndị nke wẹ d'a jụ Osolobuẹ uche ẹ,

³ wẹ jụ ndị nchụn-ẹjan rị Ụlọ-nsọ Osolobuẹ ihiẹn ile rị okpuru ẹ lẹ ndị-amụma ajụjụ, sị, “Nị ẹnyi a kwan, e bu ọnụ ifọn nke isẹn kẹ ẹnyi dọn e mẹ kete ahụa ole-lẹ-ole yeni otikpọ wẹ tikpọ Jerusalẹm?”

⁴ Ogẹn hụ kẹ Osolobuẹ ihiẹn ile rị okpuru ẹ gi gwa m oku hụ, sị m:

⁵ “Sị ndị alị Juda ile lẹ ndị nchụn-ẹjan nị m sị: ‘Ogẹn hụ ụnụ gi rị e bu ọnụ hụ, a kwan ẹkwan ifọn nke isẹn lẹ nke ẹsa, ọrọgbọ ahụa iri-kwasị ọgụn-ẹtọnị, mmẹ kẹ ụnụ bun'ẹ?

⁶ Ogẹn ụnụ gi e ri, a ra, ẹlẹ ẹfọ ụnụ kẹ ụnụ e riye ẹ? Ẹlẹ ẹfọ ụnụ kẹ ụnụ a raye ẹ?

⁷ “ ‘Ẹlẹ okuni wẹ rị a gwa ụnụ kẹ Osolobuẹ gi ndị-amụma mbụ ku, kẹ wẹ kelẹni tikpọ Jerusalẹm? Ogẹn ahụn Jerusalẹm lẹ obodo ndị nọhunmẹn'ẹ gi rị e bi udọn-lẹ-ndọnkwa, ogẹn ahụn ịhịan bizi imẹ Nẹgẹvụ rị ẹbamịn ndịdan-mirin ọda-ọda lẹ imẹ Shẹfẹla rị nkpọtu òke ibẹka ọdịdan-ẹnyanwụn.’ ”

⁸ Osolobuẹ nọ nwan sị Zẹkaraya:

⁹ Osolobuẹ ihiẹn ile rị okpuru ẹ sị: “Han nị ezigbo eṅẹn; e gi ni ẹfọma lẹ omikẹn e sọn ibe ụnụ;

¹⁰ abịangbulẹ ni ikpoho di wẹ nwụn, ndị nwọnlẹni nẹdi, abịamabịa lẹ ndị igbẹnnyẹ; amamalẹ ni ni ibe ụnụ eje-ihiẹn.”

¹¹ Kanị ndị nẹdi ụnụ egọnni ntịn. A gbama wẹ isi-akwanran, kụkin ntịn wẹ amamgbe w'a nụ;

¹² a kpọkinkẹnmẹ wẹ obi wẹ amamgbe w'a nụ Iwu lẹ oku ndị hụn Osolobuẹ ihiẹn ile rị okpuru ẹ gi Mmọn-nsọ a zihẹni wẹ ghahanị ndị-amụma mbụ. Ịya haịn Osolobuẹ ihiẹn ile rị okpuru ẹ gi gi okẹn iwe-lẹ-ọnụma tikpọ wẹ.

¹³ Ebe o mẹni azanị wẹ m kẹ m kpọ wẹ oku, a kpọ wẹ m, m nọ jụ n'a zakọ m wẹ. Ya kẹ mmẹ wụ Osolobuẹ ihiẹn ile rị okpuru ẹ ku.

¹⁴ E gi m ndị-iṅẹnrẹn feyịya wẹ kẹ okẹn ufere dọn e feyịya ihiẹn, fe wẹ ye alị ndị ọzọ wẹ marịnlẹni. Ẹrịra kẹ alị wẹ dọn gba okpokoro, onwọnzini onyẹ a gha a e jẹn, onwọnzini onyẹ a gha a a la; alị ọma nwẹn nọ gba okpokoro.