Zẹkaraya 5 - Ika

Isi Nke Isẹn Ọhụn Nke Isin: Ibe Ẹkụkwọ Rị E Fe Imẹ Elu

¹ M nọzị lee ẹnya elu, hụn ẹkụkwọ wẹ fịfịma fekọnị.

² Mmọn-ozi hụ nọ sị m, “Kị ị rị a hụn?” M nọ za, sị, “M rị a hụn ẹkụkwọ wẹ fịfịma fekọnị; usue ẹ wụ ụbụkụ iri-kwasị-ọgụn, ụshịa a wụ ụbụkụ mmisẹn.”

³ Ya ọ nọ sị m, “Ọnwan wụ ọnụ-ẹsọn ichẹn-ichẹn hụn pụkọ d'e fegbarị alịnị: onyẹ zun ohin, ndị rị azụụn ohu a nọ isi ẹ bụn, gbupụ a; onyẹ kun ẹfan Osolobuẹ tụ ntụ ndị rị azụụn hụn-ẹbọ a nọ isi ẹ bụn, gbupụ a.

⁴ Osolobuẹ nwọn ikẹn ile sị, ‘M zikọ a d'a banyesọnmẹ iwe onyẹ ọwụlẹ e zun ohin lẹ onyẹ e kun ẹfan m a tụ ntụ. O jẹnkọ d'a nọbie iwe ẹ, tikpọ a ru alị, kẹ osisi kẹ blọkụ lẹ ẹjan.’ ”

Ọhụn Nke Ẹsa: Okpoho Ahụn Rị Imẹ Ụkpalị

⁵ Ya mmọn-ozi hụn mmẹ lẹ ịya gba e ku nọ pụha ihun d'e kunrun m, sị m, “Lee ẹnya elu n'ị hụn ihiẹn rị a pụhanị.”

⁶ M nọ sị, “K'ọ wụ?” Ọ sị, “Ụkpalị pụlanị rọ.” Ọ nọzị sị, “Ọnwan wụ njọ wẹ rị e mẹ imẹ alịnị ile.”

⁷ Ya wẹ nọ kpupụ okun-ite-igwe nyịngbu enwẹn ẹ wẹ gi kpumẹ ẹ: e lee m ẹnya m nọ hụn okpoho nọdị alị imẹ ụkpalị hụ!

⁸ Mmọn-ozi hụ nọ sị, “Okpohoni wụ Eje-obibi.” Ya ọ nọ nukin ẹ imẹ ụkpalị ahụn, nu okun ite-igwe ahụn nyịngbu enwẹn ẹ nukin ụkpalị hụ.

⁹ E lee m ẹnya elu, m nọ hụn ikpoho ẹbụọ nwọn nku felanị: wẹ shịapụ nku wẹ tọnị ufere; nku wẹ rịsọnmẹ kẹ nku nnụnụ uku wụ stọkụ. Wẹ ẹbụbụọ nọ buru ụkpalị hụ feshi imẹ-elu.

¹⁰ Ya m nọ sị mmọn-ozi hụ mmẹ lẹ ịya gba e ku, “Elebe wẹ bukọ ụkpalị hụ?”

¹¹ Ọ nọ sị m, “Wẹ bukọ a alị Shina wụ Babilọnụ d'a tụnn'a ụlọ-mmọn; wẹ tụngụ a, a dọ w'a ye elu ukpo-mmọn wẹ k'a nọ e fe ẹ.”