Zẹkaraya 4 - Ika

Isi Nke Ẹnọ Ọhụn Nke Isẹn: Obu-ukpẹ Goru lẹ Osisi Olivu Ẹbụọ.

¹ Mmọn-ozi hụn mmẹ lẹ ịya gba e ku oku nọ bịazị, kpọtiẹn m kẹ w'a kpọtiẹn onyẹ rị ụran.

² Ọ nọ sị m, “Kị ị rị a hụn?” M nọ sị a, “M rị a hụn obu-ukpẹ wẹ gi goru kpụ lẹ afẹrẹ rị a ibe-elu. Ukpẹ ẹsa rị obu-ukpẹ hụ. Ukpẹ ẹsa ndị hụ nwọnsọnmẹ ọnụ wẹ e buche oruru-ukpẹ.

³ Osisi olivu ẹbụọ nọkunmẹ obu-ukpẹ hụ: ohu rị a ẹka-nni, ohu rị a ẹka-ekpẹn.”

⁴ M nọ sị mmọn-ozi hụ mmẹ lẹ ịya gba e ku, “Diọkpa, kị wụ ihiẹn ndịnị?”

⁵ Ọ nọ sị m, “Y'a marịn ihiẹn wẹ wụ?” M nọ sị a, “Mba, Diọkpa.”

⁶ Ọ nọ sị m, “Lee ozi Osolobuẹ sị wẹ zi Zerubabẹlụ: Ẹlẹ akwanran mọbụ ikẹn kẹ w'e gi mẹ ẹ, kanị Mmọn m. Ya kẹ Osolobuẹ ihiẹn ile rị okpuru ẹ ku.

⁷ “Ihiẹn ọwụlẹ ị wụ, uguni jẹngbu enwẹn elu, i k'e ziẹnkpọ ihun Zerubabẹlụ, họnrin alị aradan. Zerubabẹlụ gha a tụngụ ụlọnị, ịhịan ile k'a rị e yi, ‘Ẹfọma rọ; ẹfọma rọ!!’ ”

⁸ Ya kẹ Osolobuẹ nọzị gwa m oku, sị m,

⁹ “Ẹka Zerubabẹlụ gbe iyetọ Ụlọnị; ẹka a sikọ d'a tụnchanrịn a. Ogẹn hụ kẹ ụnụ e gi marịn nị Osolobuẹ lẹ enwẹn ẹ hụn ihiẹn ile rị okpuru ẹ zi m d'a gwa ụnụ oku.

¹⁰ “Onyẹ rị nwan e lelịa ihiẹn ndịnị ogẹnni wẹ mẹ ẹkẹrẹ? Ịghọghọ jẹnkọ d'a rị ogẹn wẹ e gi hụn kẹ Zerubabẹlụ tụngụ a, kwọndọn plọmụ wẹ gi e lele k'o zinghọ. “Ukpẹ ẹsa ndị hụ ị hụn wụ ẹnya Osolobuẹ hụn rị e lehunmẹ ụwa ile.”

¹¹ M nọ nwan sị a, “Kị wụ osisi olivu ẹbụọ ndịnị rị obu-ukpẹ hụ ẹka-nni lẹ ẹka-ekpẹn?”

¹² M nọzị jụ a, “Kị wụ agalaba olivu ẹbụọ hụ nọkunmẹ amị (paịpụ) goru ẹbụọ ndị hụ, hụn ofigbọn-olivu rị e nwun goru-goru rị a gha imẹ wẹ e hupụha?”

¹³ Ọ nọ sị m, “Y'a marịn ihiẹn ihiẹn ndịnị wụ?” M nọ sị, “Mba, Diọkpa.”

¹⁴ Ya ọ nọ sị m, “Ndịnị wụ madụ ẹbụọ ahụn Osolobuẹ gi udẹn ẹ tumẹ, madụ ẹbụọ wẹ lẹ Onyẹ ahụn nwọn ụwa ile gba a rụn ọrụn.”