Zẹkaraya 3 - Ika

Isi Nke Ẹtọ Ọhụn Nke Ẹnọ: Onyẹ-ọrụn Osolobuẹ Ẹkwa A Ru Unyin

¹ Osolobuẹ ghọsị m onyẹ-isi nchụn-ẹjan wụ Joshụa k'o turu ihun mmọn-ozi Osolobuẹ; Ekwensụ wuzo ẹka-nni ẹ n'o kpe ẹ ikpe.

² Ya kẹ Osolobuẹ nọ sị Ekwensụ, “Ịyụ wụ Ekwensụ, Osolobuẹ a jụgbọ ị! Osolobuẹ hụn gi ẹka a họrị Jerusalẹm a jụgbọ ị! Ẹlẹ nkụn wẹ gha ọkụn lọpụha kẹ okẹnnyẹni wụdẹ?”

³ Joshụa nkẹ yihụ ẹkwa ru unyin ebẹhụ o turu ihun mmọn-ozi Osolobuẹ.

⁴ Mmọn-ozi ahụn nọ sị ndị turu ihun ẹ, “Gbụpụ n'a ẹkwa ndị hụ ru unyin.” Ọ sị Joshụa, “Lee ẹ, e wepụgụọ m njọ ị; m jẹnkọ nwan d'e yimẹ i ẹwuru rị mma.”

⁵ Ya m nọ sị, “Bu ni nwan okpu nwunni che ẹ isi.” Ya wẹ nọ bu okpu nwunni che ẹ isi, yimẹ ẹ ẹwuru. Mmọn-ozi Osolobuẹ turuhụkwọ ebẹhụ ogẹn hụ.

⁶ Ya mmọn-ozi Osolobuẹ nọ gwapụ Joshụa oku, sị a,

⁷ “Osolobuẹ ihiẹn ile rị okpuru ẹ sị, ‘Omẹni y'e sọn ụzọ m, kwọnkẹnmẹ ihiẹn m ku, i sikọ d'a kị Ụlọ-nsọ m, lepụ ezi-ọgwa m ile ẹnya, e mẹ m'i sọn ndịnị turu ebeni a pụ, a banhan.

⁸ Gọn nwan ntịn Joshụa, onyẹ-isi ndị nchụn-ẹjan, ịyụ lẹ ndị nchụn-ẹjan ibe i hụn a rụn okpuru i, makẹni ụnụ wụ ihiẹn-ahịma m gi a ghọsị ihiẹn jẹnkọ d'e mẹni: M sikọ d'e wẹhẹ odibo m wụ Agalaba.

⁹ E butọgụọ m ọmụma ihun Joshụa; akpụ-ọmụma ohu hụn nwọn ihun ẹsa. M sikọ d'e deye ihiẹn ẹhụ a kẹ w'e deye ihiẹn elu ọmụma: M k'e gi akpọhịn ohu wepụ njọ alịnị mẹ. Ya kẹ Osolobuẹ ihiẹn ile rị okpuru ẹ ku.

¹⁰ O ru ogẹn ahụn, onyẹ-onyẹ imẹ ụnụ k'e nwọnrin alị vaịnị lẹ figi, a kpọdẹ ibe ẹ d'e du ẹ ri, ra.’ Ya kẹ Osolobuẹ ihiẹn ile rị okpuru ẹ ku.”