Zẹkaraya 2 - Ika

Isi Nke Ẹbụọ Ọhụn Nke Ẹtọ: Okẹnnyẹ Gi Eriri Wẹ Gi A Ma Ihiẹn

¹ E lee m ẹnya, m nọ hụn okẹnnyẹ gi eriri wẹ gi a ma ihiẹn.

² Ya m nọ sị a, “Elebe k'i jẹnkọ?” Ọ nọ za m, sị, “M sikọ d'e gi eririni ma Jerusalẹm, nị m hụn k'ọ shịahan lẹ k'o suehan.”

³ Ya kẹ mmọn-ozi ahụn mmẹ lẹ ịya gba ku nọ jẹnpụha, mmọn-ozi ọzọ nọ jẹn d'e kunrun ẹ,

⁴ sị a, “Ọsọ, d'a sị okorọbịa hụ, ‘Jerusalẹm k'a wụ alị nwọnlẹni mgbọn makẹni ịhịan lẹ anụmanụ k'a barahị,

⁵ mmẹ nwẹn k'a wụrụ mgbọn rị e nwun ọkụn, fihunmẹ ẹ. Mmẹ k'a wụzịkwọ ọghọ a. Ya kẹ Osolobuẹ ku.’ ”

Osolobuẹ Sị Ndị Wẹ Kpụnshi Alị Ọzọ Lụaha

⁶ Lihi ni! Lihi ni! Gha nị alị ahụn rị ẹbamịn-ugu gbapụ, ọsụọn'a nị e te feyịyagụọ m ụnụ nọkẹ ufere ye ẹbamịn ẹnọ rị ụwa! Ya kẹ Osolobuẹ ku.

⁷ Lihi ni! Gbashi ni Jerusalẹm, ụnụ ndị bi nwan obodo Babilọnụ.

⁸ Makẹni, Osolobuẹ ihiẹn ile rị okpuru ẹ hụn gi ufiri ọghọ a zi m, e kuọlẹ oku ndị hụn gbu ụnụ kwarị ihiẹn ụnụ. Ọ sị nị onyẹ ọwụlẹ mẹtụ ụnụ ẹka mẹtụ nwa-ẹnya a ẹka!

⁹ Ọ sị, “Lee ẹ, m sikọ nwan d'a tịnpụ ẹka mẹshi wẹ ikẹn, ụnụ ndị wẹ te gi họnrin igbọn k'a kwanarịn wẹ ihiẹn wẹ!” Ogẹn hụ, ụnụ a marịn nị Osolobuẹ lẹ enwẹn ẹ, onyẹ hụn ihiẹn ile rị okpuru ẹ, zi mmẹ wụ Zẹkaraya.

¹⁰ Osolobuẹ sị, “Ndị Zayọnụ, bụma nị ẹbụ, ghọghọma nị, nị m lala d'e biri imẹ igunrun ụnụ. Ya kẹ Osolobuẹ ku.

¹¹ O ru ogẹn hụ, alị bu ọda jẹnkọ d'a banyeni mmẹ wụ Osolobuẹ, e họnrin wẹ ndị nke m — e sọn m ụnụ biri.” Ogẹn hụ, ụnụ a marịn nị Osolobuẹ ihiẹn ile rị okpuru ẹ lẹ enwẹn ẹ zi mmẹ wụ Zẹkaraya d'a gwa ụnụ oku.

¹² Osolobuẹ jẹnkọ d'e gi Juda họnrin azụụn nke ẹ imẹ alị a nị rị nsọ; o k'e gizi Jerusalẹm họnrin ihiẹn ẹ pụ-ichẹn.

¹³ Ịhịan ile, gba nị nkịtịn ihun Osolobuẹ, makẹni ọ ghagụọ Ụlọ a rị nsọ lihi d'a ghọsị ẹka a.