Zẹkaraya 12 - Ika

Isi Nke Mmẹbụọ Osolobuẹ K'a Tụnị Ndị Nke Ẹ Ụya Ụhụọhịn Ọgụn

¹ Ọnwan wụ ihiẹn Osolobuẹ ku banyeni alị Izrẹlụ: “Lee ni ihiẹn Osolobuẹ ku, Osolobuẹ hụn gbama igwere, hụn ke ụwa, hụn ke mmọn rị imẹ ịhịan:

² “E lee ẹ, m'e d'e mẹ obodo Jerusalẹm wụrụ mkpu manya hụn k'a tụgbu alị ndị ọzọ ile nọhunmẹn'ẹ, ịya lẹ alị Juda ile makẹni wẹ k'e kehunmẹ Jerusalẹm lẹ Juda ile.

³ O ru ogẹn hụ, m k'e mẹ Jerusalẹm wụrụnị alị ndị ọzọ ile ọmụma nyịngbu enwẹn ẹ: ndị ile k'a chọ nị wẹ bu ẹ k'a rụ enwẹn wẹ ẹhụ. Alị ile rị elu-ụwa k'e zugbama d'a lụsọn ẹ.

⁴ Osolobuẹ sị: o ru ogẹn hụ, m k'e bu egun che ẹshin ile ẹnya, tụ ndị rị e nyinn'ẹ ẹra. Kanị, m k'e dọnrin ẹnya lepụ ndị Juda ẹnya, mẹ ẹnya kpu ẹshin-agha alị ndị ọzọ ishi.

⁵ “Ogẹn hụ, ebọn-ebọn rị Juda k'a sị enwẹn wẹ, ‘Ndị bi Jerusalẹm ze eze ghahanị eyemẹka Osolobuẹ ihiẹn ile rị okpuru ẹ hụn wụ Chuku wẹ!’

⁶ “O ru ogẹn hụ, m k'e mẹ ebọn Juda ile wụrụ ọkụn rị imẹ ikpọn-nkụn, ẹka-nkụn rị ikpọn ọka ọkpọ-nkụn; wẹ k'e bu alị ile rị wẹ ẹka-nni ripụ, bu ndị rị ẹka-ekpẹn ripụ; kanị, Jerusalẹm nkẹ k'a rịzị ọnọdị a.

⁷ “Osolobuẹ k'e yegụ Juda ile ọghọ mmẹri amamgbe ikpụlọ Defidi wụ eze lẹ ndị bi Jerusalẹm e nwọnkarị alị Juda wẹ rị imẹ ẹ ọghọ.

⁸ O ru ogẹn hụ, Osolobuẹ k'e che ndị bi Jerusalẹm nche; ndị ndụn te rịlẹni imẹ wẹ ogẹn ahụn k'e zedẹ kẹ Defidi; ebọn Defidi wụ eze k'a rị kẹ Chuku lẹ enwẹn ẹ, nọkẹ mmọn-ozi Osolobuẹ, buruni wẹ ụzọ.

⁹ O ru ogẹn hụ, m k'e dọnrin ẹnya tikpọchanrịn alị ndị ahụn ile rị a lụsọn Jerusalẹm agha.”

Wẹ K'a Kwannị Ihiẹn Wẹ Mẹ Osolobuẹ

¹⁰ M k'e hu mmọn omikẹn lẹ arịrịọ ye ebọn eze-Defidi lẹ ndị bi Jerusalẹm obi, nke wụnị, wẹ k'e lee m ẹnya, onyẹ hụn wẹ dụn ihiẹn, a kwannị w'a ẹkwan kẹ ịhịan a kwan akpụ nwa ohu ọ mụ; wẹ k'a kwangbu enwẹn wẹ nọkẹ onyẹ okẹnnyẹ ibuzọ a nwụnnahịn.

¹¹ Wẹ k'a kwan ọda-ọda imẹ Jerusalẹm ogẹn ahụn kẹ wẹ dọn kwan Josaya imẹ Hadadị-Rimọnụ hụn rị alị-aradan Mẹgido.

¹² Alịnị ile k'a kwan ẹkwan: ebọn ọwụlẹ k'a kwan nke wẹ ichẹn-ichẹn: ikẹnnyẹ ebọn eze-Defidi gha a kwan nke wẹ, inyẹnmẹ wẹ hụ a kwan nke wẹ; ikẹnnyẹ ebọn Natanị gha a kwan nke wẹ, inyẹnmẹ wẹ hụ a kwan nke wẹ;

¹³ ikẹnnyẹ ebọn Livaị ndị nchụn-ẹjan gha a kwan nke wẹ, inyẹnmẹ wẹ hụ a kwan nke wẹ; ikẹnnyẹ ebọn Shimei gha a kwan nke wẹ, inyẹnmẹ wẹ hụ a kwan nke wẹ;

¹⁴ ezi-lẹ-ụlọ ile họdụnị k'a ghazị a kwan ẹrịra: ikẹnnyẹ gha a kwan nke wẹ, inyẹnmẹ wẹ hụzị a kwan nke wẹ.