Zẹkaraya 11 - Ika

Isi Nke Mmanaị Onyẹ-ndu Ndụn Gụ Lẹ Hụn Ẹnya Rịlẹni Ọrụn A

¹ Alị Lẹbanọnụ, gụnpụ ụzọ ị, kẹni ọkụn bu osisi sida jun imẹ i ri!

² Osisi saịprẹsị rị ebẹhụ, gomẹ, makẹni sida a dangụọ, makẹni okẹn osisi wụ sida a lagụọ iwi! Okẹn osisi okuu jun ẹgbẹrẹ Bashanị, gomẹ ni, makẹni e gbukpọgụọ wẹ ẹgboko ahụn kinni!

³ Ndị e du anụ rị e goo, makẹni ihiẹn wẹ gi e bi e wiwigụọ! Ẹwọrọ rị ẹgboko Iyi Jọdanị rị e dẹn, makẹni ẹgboko Iyi Jọdanị a lagụọ iwi!

Onyẹ-ndu Ndụn Gụ

⁴ Osolobuẹ wụ Chuku m sị m, “D'e dumẹ igunrun atụnrụn wẹ rị a zụn nị wẹ gbu.

⁵ W'e ṅọn wẹ e gbu, oku arịa; onyẹ re wẹ, ọ kpanmịn Osolobuẹ, sị, ‘Osolobuẹ e mẹkẹ, e higụọ m nwan ọdanfịn!’ Omikẹn wẹ arịdẹ e mẹ ndị rị e duni wẹ.

⁶ “M gi ẹ e ku ni emẹkọzị m omikẹn ndị alịnị! M k'e mẹ onyẹ-onyẹ kpaban ibe ẹ ẹka, mẹ onyẹ ọwụlẹ kpaban eze ẹ ẹka. Wẹ k'e wiwi alịnị, agbapụhakọ m'a ẹka wẹ. Ya kẹ Osolobuẹ ku.”

⁷ Ya kẹ m nọ dumẹni ndị afịa atụnrụn atụnrụn wẹ jẹnkọ d'e gbu, atụnrụn nwọnlẹni onyẹ wẹ rị mkpa. M nọ weri ọkpọ ẹbụọ m gi a kị wẹ: a kpọ m ohu “Ẹfọma”, kpọ hụn-ẹbọ “Ịrị-ohu”. M nọ dumẹ atụnrụn ndị ahụn.

⁸ Imẹ ifọn ohu, a zapụ m madụ ẹtọ hụn rị e duni wẹ, makẹni asazịnị m ẹka din wẹ lẹzi makẹni ihiẹn m asụọnị wẹ.

⁹ M nọ sị atụnrụn ndị ahụn, “Edukọzị m ụnụ. Hụn chọ n'ọ nwụn y'a nwụn; hụn wẹ k'e gbu, wẹ gbu; ndị họdụnị wẹ bu ibe wẹ ri!”

¹⁰ E weri m ọkpọ m'a kpọ “Ẹfọma”, begi ẹ, gi ọhụn ghọsị nị a kagbugụọ m ihiẹn mmẹ lẹ ndị hụ ile kwerigbama.

¹¹ Ya wụ, ụhụọhịn ahụn kẹ ihiẹn ẹnyi kwerigbama bi! Ndị afịa atụnrụn rị ebẹhụ e lee m nọ marịn nị ozi Osolobuẹ kẹ m gi ẹ zi.

¹² M nọ nwan sị wẹ, “Omẹni ọ hụghọ mma ẹnya ụnụ, kụ nị m ụgwọ ọrụn m; kanị, omẹni ọ rịnị mma ẹnya ụnụ, ụnụ a gharị.” Ya wẹ nọ ye m egho-ọrụn m, akpụrụ siliva iri kwasị ọgụn mmakalaka!

¹³ Ya Osolobuẹ nọ sị m, “Tụ egho ahụn ye ebe w'e dọnmẹ ihiẹn imẹ Ụlọ-nsọ,” egho nwẹn wẹ sị o higbu enwẹn ẹ wẹ sị wẹ k'e ṅọn m! Ya m nọ weri egho hụ, akpụrụ siliva iri kwasị ọgụn hụ, tụ a ye ebe wẹ e butọ ihiẹn imẹ Ụlọ Osolobuẹ.

¹⁴ Ya m nọzị begi ọkpọ m hụn mẹ ẹ ẹbụọ, hụn m kpọ “Ịrị-ohu”, gi ọhụn kebe ndị Izrẹlụ rị Juda lẹ umunẹ wẹ ndị Izrẹlụ Ẹbamịn-ugu.

Onyẹ-ndu Ẹnya A Rịlẹni Ọrụn A

¹⁵ Osolobuẹ nọzị sị m: Kọnrinzi n'i d'e mẹmẹmẹ nọkẹ eje onyẹ-ndu atụnrụn.

¹⁶ Makẹni, m rị nwan e wepụhanị alịnị onyẹ-ndu ọzọ, hụn nwọnlẹni ihiẹn ọ kpọ atụnrụn ndị rị a ẹka: kẹ wẹ rị a nwụn anwụn-o, ẹlẹ o k'a chọ n'ọ marịn; ẹlẹ o k'a chọ ndị kpahukọnị; ọ zụọkọ ndị rụ ẹhụ; o yekọ ndị rị ikẹn ihiẹn-oriri, kama, o bu ndị tutuni e ri, ọ fịọpụdẹ wẹ akpụkụ.

¹⁷ O k'a jọ eje onyẹ-ndu atụnrụn hụ njọ, onyẹ hụn a la igunrun atụnrụn a tọ! Ọpịa-agha ya bepụ a ẹka, gụpụ a ẹnya ẹka-nni! Ẹka ya lịlọhịchanrịn a; ẹnya ẹka-nni ẹ ya kpuchanrịn ishi!