Zẹkaraya 1 - Ika

Isi Nke Ohu Osolobuẹ Sị Ndị Nke Ẹ Bihutọ Ẹka

¹ Ifọn nke ẹsatọ imẹ ahụa ahụn mẹ ẹ ẹbụọ eze-kanị wụ Dariọsụ kịma kẹ Osolobuẹ gwa onyẹ-amụma wụ Zẹkaraya nwa Bẹrẹkia nwa Ido oku, sị,

² “Iwe ndị nẹdi ụnụ kanị we Osolobuẹ ọda-ọda.

³ Sị nwan ndị nke ụnụ, ‘Osolobuẹ ihiẹn ile rị okpuru ẹ sị: Kinhẹn ni nwan ebe m rị, nị m kinhẹn ebe ụnụ rị. Ya kẹ Osolobuẹ ihiẹn ile rị okpuru ẹ ku.’

⁴ “Anọkwọlẹ ni kẹ ndị nẹdi ụnụ kanị hụn ndị-amụma mbụ gwa oku, sị, ‘Osolobuẹ ihiẹn ile rị okpuru ẹ sị: Bibehi ni eje-obibi ụnụ rị e bi, ụnụ e mẹbehi eje-ihiẹn ụnụ rị e mẹ.’ Kanị, anụnị we, emẹni wẹ ihiẹn m sị wẹ mẹ. Ya kẹ Osolobuẹ ihiẹn ile rị okpuru ẹ ku.

⁵ “Elebe kẹ ndị nẹdi ụnụ ahụn rị nwan? Elebe kẹ ndị-amụma ahụn rị nwan? A tọghọ wẹ jẹnrin ejẹn?

⁶ Kanị, ihiẹn ile m zi idibo m ndị-amụma d'a gwa ndị nẹdi ụnụ nị m k'e mẹ wẹ e mẹghọ wẹ, ẹlẹ ya? Ya kẹ ndị nẹdi ụnụ nọ nwan rohutọ, sị, ‘Ihiẹn ahụn Osolobuẹ wụ Chuku ẹnyi sị o k'e mẹ ẹnyi makẹ eje-omumẹ ẹnyi lẹ eje-ihiẹn ẹnyi mẹ k'o mẹ nwan ẹnyi.’ ”

Ọhụn Ibuzọ Zẹkaraya Hụn: Ndị Rị Elu Ẹshin

⁷ Hụn mẹ akpọhịn ẹnọ-kwasị-ọgụn imẹ ifọn nke mmanaị wụ Shẹbatị, imẹ ahụa ahụn mẹ ẹ ẹbụọ eze-kanị wụ Dariọsụ kịma, Osolobuẹ nọ gwa onyẹ-amụma wụ Zẹkaraya nwa Bẹrẹkia nwa Ido oku imẹ ọhụn. Zẹkaraya sị,

⁸ “M hụn ọhụn imẹ uhinhin, hụn okẹnnyẹ ohu rị elu ẹshin ododo hụn wuzo alị osisi mẹtụlụ rị imẹ ọdanmgbugbu. Ẹshin ododo ọzọ lẹ ẹshin ụda lẹ ẹshin ọchan rị okẹnnyẹ hụ azụụn.

⁹ “Ya m nọ sị, ‘Diọkpa, kị wụ ndịnị?’ Mmọn-ozi ohu nọ shịarị m, sị, ‘M sikọ d'a ghọsị ị ihiẹn wẹ wụ.’

¹⁰ Ya okẹnnyẹ hụ wuzo alị osisi mẹtụlụ nọ za, sị, ‘Uwẹ kẹ Osolobuẹ zi d'a ghahunmẹ elu ụwa, e lee kẹ ihiẹn nọ.’

¹¹ Ya ndị rịsọnmẹ elu ẹshin ndị hụ nọ ye ọnụ, sị mmọn-ozi Osolobuẹ hụn wuzo alị osisi mẹtụlụ, ‘Ẹnyi a ghahụnmẹgụọ elu-ụwa; ẹhụ fu ndị ile rị elu ụwa.’

¹² “Ya mmọn ozi Osolobuẹ nọ sị, ‘Euu Osolobuẹ nwọn ikẹn ile, nanị y'e biehan d'e mẹ omikẹn Jerusalẹm lẹ obodo ndị ya lẹ wẹ rị imẹ Juda, ndịnị ị rị e buni olulu ọrọgbọ ahụa iri kwasị ọgụn-ẹtọnị?’

¹³ Ya kẹ Osolobuẹ nọ gi oku rị mma lẹ oku a rọkọ obi za mmọn-ozi ahụn rị a gwa m oku.

¹⁴ Mmọn-ozi hụn rị a gwa m oku nọ sị m, ‘Gwa wẹ ihiẹnni: Ọnwan wụ ihiẹn Osolobuẹ ihiẹn ile rị okpuru ẹ ku: ezioku-ezioku, ọ rị a dụ m nị m dọnzi Jerusalẹm lẹ Zayọnụ; ọ rị a dụ m ọda-ọda,

¹⁵ kanị iwe alị ndị ọzọ ndịnị ẹhụ fu rị e we m, makẹni e gigụọ wẹ ẹkẹrẹ olulu m te rị e buni ndị nke m mẹ wẹ eje-ihiẹn.’

¹⁶ “Osolobuẹ nọ nwan sị: ‘M k'e mẹni nwan Jerusalẹm omikẹn; wẹ sikọ d'a tụndọnzi Ụlọ-nsọ m imẹ ẹ. Ya kẹ Osolobuẹ ihiẹn ile rị okpuru ẹ ku. Wẹ sikọ d'a rụnzị ụlọ imẹ Jerusalẹm, nọzị imẹ e setịnpụ eriri ndị a tụn ụlọ.

¹⁷ “ ‘Gwazịkwọ wẹ ọnwan: Ihiẹn rị mma sikọ d'e junzi obodo m ndịnị; Osolobuẹ jẹnkọ d'e mẹni Zayọnụ omikẹn; o sikọ d'a họrịzị Jerusalẹm.’ ”

Ọhụn Nke Ẹbụọ: Mpịn Ẹnọ Lẹ Ndị A Kpụ Ụzụn

¹⁸ E lee m ẹnya, m nọ hụn mpịn ẹnọ.

¹⁹ M nọ jụ mmọn-ozi ahụn mmẹ lẹ ịya gba ku oku, sị, “Kị wụ ihiẹn ndịnị?” Ọ nọ za m, sị, “Ndịnị wụ mpịn ndị hụn sụnyịya Juda lẹ Izrẹlụ lẹ Jerusalẹm.”

²⁰ Ya Osolobuẹ nọ ghọsị m madụ ẹnọ a kpụ ụzụn.

²¹ M nọ sị, “Kị wẹ lala d'e mẹ?” Ọ nọ za, sị, “Kẹ m dọn gwa ị, ndị ibuzọnẹi wụ mpịn sụnyịya Juda nke wụnị onwọnni onyẹ saẹka nyọnpụha isi; kanị ndịnị a kpụ ụzụn bịa nwan nị wẹ bu egun che ndị hụ wụ mpịn ẹnya — ya wụ, nị wẹ kụgi mpịn ndị alị ọzọ hụn gi mpịn wẹ bunụmanị alị Juda kẹni wẹ chụzịza ndị Juda.”