Zẹfanaya 3 - Ika

Isi Nke Ẹtọ Njọ Ndị Bi Jerusalẹm

¹ O k'a jọ ị njọ, onyẹ nnupụ-isi rụgụnị! Eje obodo mmẹgbu-mmẹgbu!

² Ara nụ ihiẹn kaka; “eze-agwalẹm” k'ọ wụ! Ara gi Osolobuẹ dọn ẹnya; ara nọkunmẹ Osolobuẹ!

³ Ndị-isi rịn'a nọhụ kẹ ẹwọrọ rị e dẹnni; ndị a hannị wẹ eṅẹn nọhụ kẹ eje-anụ e ri anụ, hụn ghalẹni a nị eki e fọnkunrun ihiẹn o gbu.

⁴ Ndị-amụma rịn'a e ku mpụ; a tụ ntụ! Ndị nchụn-ẹjan rịn'a hụ e mẹrụ ụlọ-nsọ, e gi Iwu Osolobuẹ e mẹ k'ọ sụọ wẹ.

⁵ Kanị Osolobuẹ egbehutọnị, kaka! Onyẹ ezi-omumẹ ọ wụ imẹ obodo ahụn k'ọ wụkwọ tan; ara mẹgbu ịhịan: ọ hụ a han eṅẹn ụhụọhịn ile, ara gberi ụhụọhịn. Kanị ifẹnrẹn arị emẹ ndị njọ.

Osolobuẹ Ete Chọnị N'o Tikpọ Jerusalẹm

⁶ “E tikpọgụọ m alị ndị ọzọ, obodo ndị wẹ te tụnhunmẹ mgbọn e họnrin nkpọkọ-nkpọkọ; e mẹgụọ m ọgbara-ogbe wẹ gba okpokoro onwọnzini onyẹ a ghanị wẹ; obodo ndị wẹ te bi a gbagụọ okpokoro! onwọnzini onyẹ bi ebẹhụ.

⁷ M te nọ sị enwẹn m, ‘Obodoni sikọ d'a gbaye m nụ; wẹ jẹnkọ d'a nụ ihiẹn, amamgbe m'e tikpọ a otikpọnị ile m ku,’ kanị wẹ nọ mẹsọnmẹ arụ wẹ rị e mẹ.

⁸ Gbacherikwọ nị m nwan! Ya kẹ Osolobuẹ ku; cheri ni ụhụọhịn m k'a kpa ikẹn kwarị ihiẹn m gbu. E kugụọ m'a nị m k'e wegbama alị ichẹn-ichẹn, nị m k'a kpọgbama alị-eze ichẹn-ichẹn, kẹni m mẹ wẹ ihiẹn kẹ olulu han m obi kẹni m gi okẹn iwe-lẹ-ọnụma m mẹ wẹ ihiẹn, makẹni m k'e gi ẹnya rị a fụnị m hu ọnụma m kpu wẹ ile ri nọkẹ ọkụn.

Omẹgụ, Alị Ile K'e Fe Osolobuẹ

⁹ “M k'e ye ndị alị ichẹn-ichẹn ọnụ rụlẹni, kẹni wẹ kpọkumẹ ẹfan Osolobuẹ, e gi wẹ ọnụ ohu fe ẹ.

¹⁰ Ghakwọrị alị ndị teghafe Iyi ndị rị alị Kushi kẹ ndị nke m — ụmụ ndị nke m te feyịyanị k'a gha e wẹhẹni m oyiye.

¹¹ O ru ogẹn hụ e wepụ m'ị ifẹnrẹn ihun, Jerusalẹm — ifẹnrẹn ihiẹn ile ụnụ gi nupụnị m isi. Makẹni, m k'e wepụ ndị mpache lẹ ndị e mẹkarị enwẹn wẹ, ụnụ emẹkarịkọzị enwẹn ụnụ elu Ugu nsọ m.

¹² M k'a latọnị ụnụ ndị nwọnlẹni ihiẹn wẹ kpọ wẹ lẹ ndị w'e legberi; wẹ k'e gi ẹfan Osolobuẹ dọn ẹnya.

¹³ Ndị Izrẹlụ k'a họdụnị emẹkọ eje-ihiẹn; atụkọ wẹ ntụ; anụkọ wẹ ihiẹn wụlẹni ezioku ọnụ wẹ. Wẹ rigụ, e dinẹ wẹ kẹ atụnrụn ẹhụ fu; onwọnni onyẹ k'e rọn wẹ egun.”

Izrẹlụ, Bụma Nwan Ẹbụ, Yimẹ Oro!

¹⁴ Obodo Zayọnụ, bụma nwan ẹbụ ịghọghọ! Izrẹlụ, yimẹ nwan oro ịghọghọ! obodo Jerusalẹm, shịapụchanrịn ẹfọ ṅanma!

¹⁵ Osolobuẹ a kụsịgụọ afụnfụn ahụn o te gi sọn njọ ụnụ; ọ zapụgụọ ndị-iṅẹnrẹn ụnụ. Eze Izrẹlụ wụ Osolobuẹ nọyeni ụnụ anọyeni! Atụlẹ ni egun ọdakin!

¹⁶ Ụhụọhịn hụ, wẹ k'a sị Jerusalẹm, “Zayọnụ, atụzịlẹ egun! Anịlẹ ẹka lịlọpụ ị!

¹⁷ Osolobuẹ hụn wụ Chuku ụnụ nọyeni ụnụ anọyeni! Odogun hụn a zụọnị k'ọ wụ! Yụ wụ Jerusalẹm k'a rị a sụọ a, e mẹ ẹ a ghọghọ. O k'e gi ihiẹn-ọsụsụọ a gba Jerusalẹm umẹ. O k'e gi i a ṅan, a bụshi ẹbụ elu.”

¹⁸ “M k'e wegbamazị ndị ọ rị a fụ nị arịzị wẹ e jẹn mmẹmmẹ nsọ m rị ichẹn-ichẹn, makẹni ụya kẹ o te wụ ụnụ olu.

¹⁹ O ru ogẹn hụ, m k'e mẹshi ndị rị a bịangbuni ụnụ ikẹn. M k'a zụọpụha atụnrụn m ndụn rịlẹni, e wegbama m atụnrụn m wẹ chụzịza; e wepụha m wẹ imẹ ụya wẹ rị, ye wẹ ezigbo ẹfan w'a ja mma elu ụwa ile.

²⁰ O ru ogẹn ahụn, m k'e welụa ụnụ, ogẹn ahụn m'e gi wegbama ụnụ. M k'e ye ụnụ ọghọ imẹ alị ile rị elu ụwa. Wẹ k'a gha a ja ụnụ mma Ogẹn m'e gi mẹ n'ọ rịzịnị ụnụ mma.” Ya kẹ Osolobuẹ ku.