Zẹfanaya 2 - Ika

Isi Nke Ẹbụọ Bihutọ Nị Ẹka; Rịọma Nị Osolobuẹ

¹ Zukwamakwọ nị! Zukwama nị d'a rịọma Osolobuẹ, ndị alịnị ifẹnrẹn ghalẹni e mẹ!

² Mẹ n'ẹ Osolobuẹ gini d'e mẹ ụnụ ihiẹn o ku; amamgbe ogẹn ụnụ e gi wanahịn a ghafe kẹ ẹfịfịa ufere bupụ; amamgbe olulu Osolobuẹ nọ kẹ ọkụn e kunrun ụnụ, amamgbe ogẹn ahụn Osolobuẹ e gi ghọsị eje-olulu ẹ e kunrun ụnụ!

³ Mẹsọnmẹ ni uche Osolobuẹ ụnụ ile hụn e welụa enwẹn wẹ alị, ụnụ ile hụn e mẹ ihiẹn Osolobuẹ ku; e mẹni uche ẹ, ewelụabehikwọlẹ ni enwẹn ụnụ alị; ikẹnkwọ Osolobuẹ a nị ụnụ wanahịn ogẹn hụ o k'a ghọsị iwe-lẹ-ọnụma a.

Ihiẹn Osolobuẹ K'e Mẹ Ndị-iṅẹnrẹn Alị Izrẹlụ Ihiẹn Osolobuẹ K'e Mẹ Ndị Alị Filistia

⁴ Obodo Gaza k'a gba okpokoro; obodo Ash'kẹlọnụ k'a gbazịkwọ okpokoro; wẹ k'a chụpụchanrịn ndị obodo Ash'dọdụ, ẹnyanwụn gini d'a kpọfe isi; wẹ k'e huepụ ndị obodo Ẹkrọnụ.

⁵ Ọ k'a jọ ụnụ njọ, ndị mkpẹnrẹn-ohimin, ndị Kẹrẹtị alị Filistia! Osolobuẹ e kuọlẹ oku i, alị Kenaanị, alị ndị Filistia, sị, “M k'e tikpọ ị, onwọnni onyẹ m k'e gbuhọdụ imẹ i.”

⁶ Mkpẹnrẹn ohiminni k'a wụrụ ogige lẹ ọfịa ẹka ndị e du atụnrụn; ebe w'a kịtọ igunrun ewu lẹ atụnrụn.

⁷ Ẹgbẹrẹ ohiminni ile k'a wụrụ nke ndị Juda k'a họdụnị, a nọ w'a a zụn atụnrụn, ọhịhị gba, a ranhịn wẹ ụlọ ndị Ash'kẹlọnụ te bi. O k'a rị ẹrịra, makẹni Osolobuẹ wụ Chuku ndị Juda k'a tụnị wẹ ụya, mẹ n'ọ rịzịnị wẹ mma.

Ihiẹn Osolobuẹ K'e Mẹ Ndị Mụabụ Lẹ Ndị Amọnụ

⁸ A nụgụọ m ọnụ ile ndị alị Mụabụ rị a kọ ndị nke m lẹ mkpari ndị alị Amọnụ rị a kpari ndị nke m lẹ isi wẹ rị a nyan nị wẹ k'e weri alị wẹ.

⁹ Mmẹ wụ Osolobuẹ ihiẹn ile rị okpuru ẹ hụn wụ Chuku ndị Izrẹlụ, sị, “Ma isi m, Mụabụ jẹnkọ d'a rị kẹ alị Sodọm, Amọnụ a nọ kẹ alị Gomora! Wẹ k'e họnrinsọnmẹ alị ogun lẹ nnu, wụsọnmẹ eje-alị ihiẹn rịn'a ghalẹni e mẹ. Ndị nke m họdụnị k'a kwarị ihiẹn wẹ; ndị alị m họdụnị k'e weri alị wẹ.”

¹⁰ Ọhụn kẹ wẹ k'e gi narịn ụgwọ mpache wẹ, makẹ ọnụ wẹ kọ, ndị nke Osolobuẹ ihiẹn ile rị okpuru ẹ, kpari wẹ.

¹¹ Osolobuẹ jẹnkọ d'e mẹshi wẹ ikẹn ọhụnma-ọhụnma; o k'a napụ mmọn ile ikẹn lẹ ọghọ wẹ; alị ndị tegbudẹ enwẹn wẹ rị mkpẹnrẹn ohimin k'a nọ alị wẹ e fe Osolobuẹ.

Ihiẹn Osolobuẹ K'e Mẹ Ndị Alị Ẹtiopịa Wụ Kushi

¹² Kẹ ụnụ ndị alị Kushi, ọpịa-agha m k'e gbu ụnụ.

Ihiẹn Osolobuẹ K'e Mẹ Ndị Alị Asiria

¹³ Osolobuẹ jẹnkọ d'a tịnpụzịkwọ ẹka mẹ ndị rị ẹbamịn-ugu ihiẹn: o k'e tikpọ alị Asiria hụn rị ebẹhụ. O k'a gba isi-alị wẹ wụ Ninivẹ okpokoro, mẹ ẹ wụrụ alị ọkpọ-nkụn nọkẹ atụ.

¹⁴ Igunrun efin lẹ atụnrụn k'a rị a kpahunmẹ imẹ ẹ; anụ ọfịa ile rị ichẹn-ichẹn k'a rị a; ozuzu k'a gha a ranhịn elu adansụn hụn rị mkpọkọ-ụlọ rị ebẹhụ; a ghasọnmẹ windo ụlọ ndị hụ e woo; Mkpọkọ ihiẹn k'e jun ọnụmụzọ rị ebẹhụ; osisi Sida wẹ te gi ma ụsụọ-ẹjan arịkọzị a.

¹⁵ Ọnwan wụ obodo Ninivẹ nwẹn te rị a ṅannị, hụn nwọnlẹni ihiẹn ọ tụ egun ẹ! Ninivẹ hụn e te sị enwẹn ẹ, “Mmẹ rọ! Onwọnni onyẹ han kẹ mmẹ!” Lee k'o gba nwan okpokoro! O họnringụọ nwan ebe anụ ọfịa e bi! Onyẹ pụha ebe Ninivẹ te rị, ọ ma ọsụọ, o be ọrịọ.