Zẹfanaya 1 - Ika

Isi Nke Mbụ

¹ Ọnwan wụ ozi Osolobuẹ zi Zẹfanaya nwa Kushi. Kushi wụ nwa Gẹdalia nwa Amaria. Nẹdi Amaraya wụ Hezikaya hụn kị alị Juda mbụ. Ogẹn Josaya nwa Amọnụ gi rị a kị Juda kẹ Osolobuẹ gi zi Zẹfanaya ozini.

Ozi Osolobuẹ Zi Zẹfanaya

² Osolobuẹ sị, “M jẹnkọ d'a zapụchanrịn ihiẹn ile rị elu ụwa;

³ m k'e tikpọchanrịn ịhịan lẹ anụmanụ; m k'e tikpọchanrịn nnụnụ e feni lẹ azụn rị imẹ ohimin lẹ ihiẹn ndị hụ ndị njọ gi rị a kpọgburu. M k'a zapụchanrịn ịhịan elu ụwa. Ya kẹ mmẹ wụ Osolobuẹ ku.

⁴ M k'a tịnpụ ẹka mẹ alị Juda ihiẹn, ịya lẹ ndị ile bi isi-alị wẹ wụ Jerusalẹm. M sikọ d'a zapụchanrịn mmọn Baalụ lẹ ihiẹn ile gbashịarịn'a ebeni, a zapụ m ndị ihẹnrẹn-mmọn Baalụ, anyanhankọzị wẹ wẹ!

⁵ M k'e gbuchanrịn ndị ile a nọ elu ụlọ wẹ a rụa kokisẹ, ifọn lẹ ẹnyanwụn; ndị a kụnị Osolobuẹ isi alị e kun Osolobuẹ, e kunzikwọ mmọn wụ Molẹkị,

⁶ uwẹ lẹ ndị hụ ghazịlẹni e sọn Osolobuẹ — ndị ghazịlẹni a nọkunmẹ ẹ mọbụ a jụ a uche ẹ.”

⁷ Gba nị nwan nkịtịn ihun Osolobuẹ-nwọnni-ẹnyi, nị ogẹn okinkin-ikpe Osolobuẹ a rịgụọ nsue! Osolobuẹ a kwademẹgụọ n'o mẹ ndị alị Juda ihiẹn w'e mẹ anụ wẹ gi chụn ẹjan; Ọ họtọgụọ ndị o wela d'e ri ndị Juda kẹ w'e ri anụ.

⁸ Osolobuẹ sị: “Ụhụọhịn hụ m jẹnkọ d'e gbu ndịnị kẹ anụ wẹ gi chụn ẹjan, m k'e mẹshi ndị-isi lẹ ikpụlọ eze ikẹn, ndị ile hụn e yi ẹkwa ndị alị ọzọ.”

⁹ Osolobuẹ sị, “O ru ogẹn ahụn, m k'e mẹshi wẹ ikẹn ndị ile e ṅọnghafe ụzọ kẹ ndị a rụa mmọn, lẹ ndị a tụnarịn, a zụọnarịn ndị ọzọ ihiẹn wẹ, e kpọnjun ụlọ onyẹ wẹ rị e fe.”

¹⁰ Osolobuẹ sị, “O ru ogẹn hụ, oro ẹkwan k'a pụ ibẹka Ọnụ-mgbọn Azụn; ịya lẹ olu rị ibẹka Ogbe-ọhụn e goo; wẹ k'a nụ okẹn ụzụn ihiẹn rị elu ugu a dankpọ.

¹¹ Ụnụ ndị bi ibẹka afịa, gomẹ ni nwan, makẹni wẹ k'e gbuchanrịn ndị afịa! Ndị ile gi egho a chọ egho.

¹² O ru ogẹn hụ, m k'e gi ukpẹ gwalọ imẹ Jerusalẹm, m k'e ye ndị hụn nwọnzilẹni ihiẹn wẹ kpọ eje-ihiẹn afụnfụn, ndị hụn nọ nwan kẹ manya dọnni, hụn rị a sị enwẹn wẹ, ‘O nwọnni ihiẹn Osolobuẹ k'e mẹ kẹ mma kẹ njọ.’

¹³ Wẹ k'a kwanarịn wẹ akụ-lẹ-ụba wẹ, tikpọchanrịn ụlọ wẹ. Wẹ k'a tụn ụlọ, kanị ebikọ w'a; wẹ k'a rụn alị vaịnị, kanị arakọ wẹ manya a.

Osolobuẹ Wela Afụnfụn

¹⁴ “Eje-ogẹn hụ Osolobuẹ k'e gi ye afụnfụn a rịgụọ nsue! Ọ rịgụọkwọ nsue; ọ lala ẹgwa! Wẹ k'a kwan eje ẹkwan ogẹn hụ! Nke wụnị ndị-agha k'a ghadẹ a kwan ụya imẹ ọgbọ-agha.

¹⁵ “Osolobuẹ jẹnkọ d'a ghọsị iwe-lẹ-ọnụma a ogẹn hụ: o k'a wụ ogẹn nsọngbu lẹ afụnfụn; ogẹn ntikpọ lẹ mwiwi; ogẹn ishi lẹ ụya; ogẹn igwere jẹnkọlẹni d'e fọn.

¹⁶ O jẹnkọ d'a wụ ogẹn opi-agha lẹ oro-agha hụn agha k'e gi lụ obodo ndị wẹ tụnhunmẹ okẹn mgbọn lẹ ụlọ-nche ndị hụ zegbu enwẹn wẹ.

¹⁷ M k'e wẹhẹni ịhịan nsọngbu, e bisọnmẹ wẹ ẹka e jẹn nọkẹ ndị ẹnya-ishi, makẹni e mẹọlẹ wẹ Osolobuẹ njọ. Ẹdeke wẹ k'a gba kẹ mirin ogẹn hụ; ozun wẹ k'e retọ alị kẹ nsịn efin.

¹⁸ Egho wẹ lẹ ihiẹn ile wẹ nwọn azụọpụhakọ wẹ ogẹn hụ Osolobuẹ k'e gi ghọsị iwe-lẹ-ọnụma a. O k'e gi iwe-lẹ-ọnụma bu elu-ụwa ile ri kẹ ọkụn dọn e bu ihiẹn e ri.”