Timoti Nke Ẹbụọ 2 - Ika

Isi Nke Ẹbụọ Onyẹ-agha Kraịstị Furuni

¹ O mẹ nke i nwa m, gi ẹfọma hụ Osolobuẹ mẹni ẹnyi imẹ Kraịstị wụ Jizọsị e zekẹnmẹ.

² Weri ihiẹn ndị hụ ị nụsọnmẹ ọnụ m idẹnya ndị bu ọda kuzi ndị furu wẹ gi e dọn ẹnya, ndị jẹnkọ d'a s'ẹka kuzizi ndị ọzọ ya.

³ Du ẹnyi ta afụnfụn nọkẹ ezigbo onyẹ-agha Jesu Kristi.

⁴ Onwọnni onyẹ-agha e kọn ẹka e ye oku-elu, makẹni onyẹ-agha k'e mẹrịrị ihiẹn a sụọ onyẹ-isi agha ọ rị okpuru ẹ ụsụọ.

⁵ Onwọnni onyẹ e mẹrini imẹ egumegu hụn wẹ e tu ugọn mmanị o sọn iwu rịn'a.

⁶ Onyẹ-ugbo hụn a rụnshi ọrụn ikẹn furu hụn e buzọ e ri ihiẹn-ugbo rịn'a.

⁷ Romi ihiẹnni m ku, nị Di-nwọnni-ẹnyi mẹghọ ị ghọta ihiẹn ile.

⁸ Nyanhan Jizọsị wụ Kraịstị hụn Osolobuẹ gha ọnwụn weli, hụn wẹ mụye ikpụlọ Defidi. Ọhụn wụ oziọma m rị e zi,

⁹ hụn m gi ufiri ẹ a ta afụnfụn d'e ru nwan ebe wẹ nọ kpọma m ẹgan nọkẹ eje-ịhịan, kanị oku Osolobuẹ arị ẹgan.

¹⁰ Ya haịn m gi e dingbuchanrịn ihiẹn ile makẹ ufiri ndị Osolobuẹ họrị, kẹni wẹ nwẹn nwọnhẹnzi nzụọpụha rị imẹ Kraịstị wụ Jizọsị lẹ ọghọ itẹbitẹ rịn'a.

¹¹ Ihiẹnni w'e ku wụ ezioku: “Omẹni ẹnyi e sọngụọ a nwụnhụn, ẹnyi k'e sọnzi ẹ rị ndụn;

¹² omẹni ẹnyi e din ndidin, ẹnyi k'e sọnzi ẹ kị; omẹni ẹnyi a jụ a, ya nwẹn k'a jụzị ẹnyi;

¹³ ẹnyi wụbehi ndị wẹ gi e dọn ẹnya, ya nwẹn k'a wụsọnmẹ onyẹ wẹ gi e dọn ẹnya, makẹni ọ saẹka jụ enwẹn ẹ.”

¹⁴ A nyanhan nị wẹ ihiẹnni; e gi ẹfan Chuku a gba wẹ mkpịnsịn-ẹka ẹnya. Sị wẹ adọzịlẹ akpụrụ oku, nị ara ye ẹka, o wiwihụ ndị a nụn'a.

Onyẹ-ọrụn Hụn A Sụọ Osolobuẹ

¹⁵ A lịlịma n'ị y'a ghọsị n'ị wụ onyẹ Chuku kwadọn; onyẹ-ọrụn nwọnlẹni ihiẹn ifẹnrẹn e gi mẹ ẹ, hụn marịn ẹnya oku-Chuku oku ahụn wụ ezioku, a kuzi ẹ ọhụnma.

¹⁶ Latọ oku nwọnlẹni-isi ghalẹni e yeni ịhịan ẹka e fe Osolobuẹ, makẹni o mẹ ịhịan a latọkẹnmẹ ihiẹn Osolobuẹ.

¹⁷ Ihiẹn ndị rị imẹ ẹ rị a kuzi a bagbarị kẹ ẹtẹ rị a banị. Himẹnusu lẹ Filetọsụ rị imẹ wẹ.

¹⁸ Madụ ẹbụọnị a ghaọlẹ imẹ ezioku kpapụ: wẹ rị a sị nị Osolobuẹ e weligụọlẹ ndị nwụnnị. Wẹ rị e gi ihiẹnni e wiwi okukwe ụfọdụ ndị kwerini.

¹⁹ Kanị iyetọ Osolobuẹ turuhụkwọ ebe ọ rị; ihiẹn wẹ deye ẹ wụ: “Di-nwọnni-ẹnyi a marịnghọ ndị wụ ndị nke ẹ” lẹ “Onyẹ ọwụlẹ hụn a kpọku ẹfan Di-nwọnni-ẹnyi ya la njọ tọ.”

²⁰ Imẹ ụlọ iwe okẹn-ịhịan, ẹlẹ arịa goru lẹ siliva sụọ kẹ w'a hụn, w'a hụnzịkwọ arịa wẹ gi osisi tụ lẹ ndị wẹ gi ụrụa kpụ. Ndị wẹ gi e mẹ ihiẹn-ọghọ hụ a, ndị wẹ gi e gbu alị hụzị a;

²¹ onyẹ chanchanpụ nwan enwẹn ẹ ihiẹn nwọnlẹni ọghọ, ọ wụrụ arịa nwọn ọghọ, arịa wẹ dọnmẹ ichẹn, hụn a bannị onyẹ nwọn ụlọ erere, arịa w'e gi mẹ ihiẹn ile rị mma.

²² Jụchanrịn ihiẹn a la ikorọbịa lẹ ịgbagba ẹnya; chụma ezi-omumẹ, okukwe, ihiẹn-ọsụsụọ lẹ udọn, e sọn ndị gi obi rị ọchan a kpọku Di-nwọnni-ẹnyi.

²³ Adọlẹ ndọndọ nwọnlẹni isi ndị marịnlẹni ihiẹn wẹ rị e ku a dọ, ebe o mẹni y'a marịnghọ ni ikpe k'o buhẹ,

²⁴ bụ odibo Di-nwọnni-ẹnyi awụkọ onyẹ ikpe; kanị onyẹ gi ẹfọma e sọn onyẹ ọwụlẹ, onyẹ a kuzini, onyẹ ndidin,

²⁵ e gi nwayọ a kọwanị ndị ghalẹni e kweyen'ẹ, makẹni Osolobuẹ nwọn ikẹn mẹ wẹ rogharị, bịa d'a marịn ezioku,

²⁶ ẹnya e fọn wẹ, a wanahịn wẹ ọnyan Ekwensụ te gi kwọndọn wẹ nị wẹ e mẹ uche Ekwensụ.