Timoti Ibuzọ 6 - Ika

Isi Nke Isin

¹ Ndị ile rị okpuru ịhịan wẹ yechanrịn wẹ mgbaye kẹ ndị furu w'a gbaye, makẹ ịhịan gha e kuja oku ẹfan Osolobuẹ lẹ ihiẹn ẹnyi rị a kuzi.

² Omẹni onyẹ kwerini kẹ ịhịan rị e fe, y'e gilẹ ufiri nị wẹ wụ umunẹ imẹ okukwe legberi ẹ. Kama, ya fedẹ ẹ karị, makẹni onyẹ rị e ri erere ọrụn a wụ onyẹ kwerini lẹ onyẹ rị Osolobuẹ obi. A kuzi wẹ ihiẹn ndịnị, e nu wẹ e mẹ wẹ.

Eje-nkuzi Lẹ Ihiẹn E Buhẹn'ẹ

³ Omẹni ịhịan rị a kuzi ihiẹn ọzọ, a jụ ezigbo nkuzi Onyẹ-nwọnni-ẹnyi wụ Jesu Kristi lẹ nkuzi furu ofufe Osolobuẹ,

⁴ ọ rịhụ a pache; onwọnni ihiẹn ọ marịn; ndọndọ a sụọka a, ọ dọsọnmẹ akpụrụ oku. Eje-ndọndọnị e buhẹ iwe-ẹnya, ikpe, ikuja oku ịhịan lẹ ibuo-ofo

⁵ lẹ ịdọ-ndọndọ ndị uche wẹ rịlẹni mma a dọ, ndị ezioku nahịngụ, ndị weri ife-Osolobuẹ kẹ ihiẹn wẹ gi e hi ọdanfịn. [Esọnkwọlẹ ndị nọ ẹrịra].

Ezigbo Akụ-lẹ-ụba

⁶ Ife Osolobuẹ wụ erere hi-ogbe nke-esi omẹni ịhịan a nị ihiẹn o nwọn jun ẹ ẹfọ.

⁷ Makẹni, onwọnni ihiẹn ẹnyi wẹhẹ imẹ ụwa, onwọnzikwọnị ihiẹn ẹnyi jẹnkọ d'e weri imẹ ẹ ẹnyi pụkọnị.

⁸ Ẹnyi nwọnọlẹ ihiẹn-oriri lẹ ẹkwa lẹ ebe ẹnyi e buche isi, ya jun ẹnyi ẹfọ.

⁹ Ndị rị a chọ nị wẹ hi ọdanfịn a danban ọnwụnwan lẹ ọnyan lẹ ẹgụn rị ichẹn-ichẹn nwọnlẹni isi a rụ ịhịan ẹhụ, e wiwi ịhịan, e tikpọ a.

¹⁰ Makẹni, ẹkpịrị-egho wụ mkpọgụn ụdị eje-ihiẹn ile gha a suepụha. O nwọngụọ ndị latọ ofufe-Kraịstị ebe wẹ rị a chọ nị wẹ hi ọdanfịn, mẹsọnmẹ ihiẹn bu ọda obi gi e gbu wẹ mgbu.

Ihiẹn Onyẹ-ọrụn Osolobuẹ A Chụ

¹¹ Kanị, ịyụ, onyẹ nke Osolobuẹ, gbanị ihiẹn ndịnị ile ọsọ. Chụma ezi-omumẹ, ife-Chuku ọhụnma, okukwe, ihiẹn-ọsụsụọ, ndidin lẹ imẹ-jụụ.

¹² Lụ ezigbo ọgụn ahụn okukwe ẹnyi chọ; kwọnkẹnmẹ ndụn itẹbitẹ hụn Osolobuẹ gi ufiri ẹ kpọ ị, hụn i gizi ufiri ẹ nọ idẹnya ndị bu ọda ku ẹ n'i kwerichanrịnnị Jizọsị.

¹³ Idẹnya Osolobuẹ hụn e ye ihiẹn ile ndụn lẹ Jizọsị Kraịstị hụn nọ idẹnya Pọntius Paịleti ku ezioku, ku ẹ n'ọ wụ Onyẹ ahụn ọ wụ, m sị ị

¹⁴ dọnmẹchanrịn iwuni; enwọnkwọlẹ ntụpọ mọbụ ihiẹn w'e gi kọrịanị ị imẹ ẹ d'e ru ọbịbịa Onyẹ-nwọnni-ẹnyi wụ Jesu Kristi.

¹⁵ Ọbịbịa a hụn Chuku jẹnkọ d'e wẹhẹ ogẹn ẹ ru. Chuku, Onyẹ hụn furuchanrịn w'a ja mma ile, Onyẹ ya sụọ wụ Eze nke-esi, Eze ndị-nze lẹ Nna ndị wụ nna;

¹⁶ Ịya sụọ wụ onyẹ ghalẹni a nwụnhụn; Onyẹ hụn bi imẹ ukpẹ wẹ ghalẹni a s'ẹka a nọkunmẹ; Onyẹ ịhịan leghatulẹni hụn ịhịan jẹnkọlẹni d'a s'ẹka legha! Mgbaye lẹ ọkịkị itẹbitẹ wụ nke ẹ jẹnrin ejẹn! Isẹẹ.

Ihiẹn Wẹ K'a Kuzi Ndị-ịdanfịn

¹⁷ Nke ndị wụ ọdanfịn elu ụwanị, gba wẹ mkpịnsịn-ẹka, sị wẹ apachelẹ mọbụ gi ẹfe (akụ-lẹ-ụba) ụwanị ghalẹni a tọ dọn ẹnya. Kama, wẹ gi Osolobuẹ dọn ẹnya, onyẹ hụn e yechanrịn ẹnyi ihiẹn ile e yekwasị kẹni ẹfọ a sụọ ẹnyi ụsụọ.

¹⁸ Sị wẹ e mẹ mma, a wụ ndị ịdanfịn ebe ịrụn ọrụn-ọma rị; wẹ a ha ẹka, a hụn a nị ihiẹn wẹ e ruzi ndị ọzọ ẹka ọhụnma —

¹⁹ e gi ụzọnị a kpatọnị enwẹn wẹ akụ-lẹ-ụba wụ akụ-lẹ-ụba nke-esi, gi kwademẹni ogẹn lalanị, kẹni wẹ kwọndọn ndụn ahụn wụ ndụn nke-esi.

²⁰ Euu, Timoti, kwọnkẹnmẹkwọ ihiẹn wẹ buche i ẹka; latọkwọ oku ndị ahụn nwọnlẹni erere ọ bannị ihiẹn Osolobuẹ lẹ oku zulẹni oke wẹ rị a kpọ, “Amamihiẹn” bụ ẹlẹ ya.

²¹ Makẹni, o nwọngụọ ndị latọ ofufe-Kraịstị ebe wẹ rị e sọn ya wụ ihiẹn. Ẹfọma Osolobuẹ ya rịnị ụnụ ile.