Timoti Ibuzọ 3 - Ika

Isi Nke Ẹtọ Ndị-isi Ụka

¹ Ezioku kẹ wẹ ku, nị, “Onyẹ chọ n'ọ wụrụ onyẹ-isi ụka chọkọ n'ọ rụn ọrụn rị mma.”

² Ya wụ, onyẹ-isi ụka k'a wụrịrị onyẹ nwọnlẹni nkọrịanị. O k'a wụrịrị onyẹ nwọn nwunyẹ ohu sụọ; onyẹ e kwọndọn enwẹn ẹ; onyẹ nwọn uche; onyẹ furu w'a gbaye, onyẹ ma nabanhan ọbịa; onyẹ ma kuzi nkuzi.

³ O mẹkọ onyẹ-manya mọbụ onyẹ ẹka-ikẹn, kanị onyẹ e mẹ jụụ; ẹlẹ onyẹ ikpe-lẹ-ọgụn mọbụ onyẹ egho a sụọ.

⁴ Ọ k'a wụrịrị onyẹ hụn a s'ẹka a kị ikpụlọ a ọhụnma, a hụn a nị ụmụ a hụ e humẹ isi, a gbaye ẹ ogẹn ile.

⁵ Makẹni, omẹni ịhịan a sanị ẹka kị ikpụlọ a, nanị k'o dọn lepụ ụka Osolobuẹ ẹnya?

⁶ Ọ wụkọ onyẹ sọnmẹ Kraịstị nke ọhụn, amamgbe isi e bumẹ ẹ, ikpe ma Ekwensụ a ma ya nwẹn.

⁷ O k'a wụrịrị onyẹ ndị rị ogbe e ku oku ẹ ọhụnma, amamgbe ọ fa, danban ọnyan Ekwensụ,

Ndị-ọrụn Ụka

⁸ Ẹrịrazịkwọ, ndị-ọrụn ụka k'a wụrịrị ndị furu w'a gbaye; awụkọ wẹ ndị irenaị; awụkọ wẹ ndị okẹn-manya mọbụ ndị ẹkpịrị-egho.

⁹ Wẹ k'a wụrịrị ndị e kwọnkẹnmẹ ihiẹn-omimi rị ofufe Kraịstị, ndị e dọnmẹ obi wẹ ọchan.

¹⁰ Wẹ k'e lelegụrịrị wẹ. Omẹni enwọn wẹ nkọrịanị, wẹ rụnmanị ụka ọrụn.

¹¹ Ẹrịra k'ọ rịzịkwọ ikpoho, wẹ k'a wụrịrị ndị furu w'a gbaye; awụkọ wẹ ndị e kuja oku ịhịan. Wẹ k'a wụrịrị ndị ẹnya dọn, e wetu obi alị; wẹ k'a wụrịrị ndị wẹ gi e dọn ẹnya imẹ ihiẹn ile.

¹² Ndị-ọrụn ụka k'a wụrịrị ndị nwọn nwunyẹ ohu sụọ; ndị a kị ụmụ wẹ lẹ ikpụlọ wẹ ọhụnma.

¹³ Ndị hụn rụn ọrụn-ụkanị ọhụnma e nwọnrin ezigbo ẹfan, obi e rukẹnmẹ wẹ alị imẹ ofufe Kraịstị Jizọsị.

Okukwe Ẹnyi E Mikẹ!

¹⁴ M bu ẹ obi nị m lala d'a hụn ị ẹgwa. Kanị, m rị e deni i ihiẹn ndịnị

¹⁵ kẹni, omẹni m bie d'a bịa, n'ị marịn k'o furu nị ịhịan e bi ikpụlọ Osolobuẹ, hụn wụ ụka Osolobuẹ, Chuku hụn rị ndụn. Ụka a nị wụ iyetọ lẹ adansụn ezioku.

¹⁶ W'a rụ ụka a, ihiẹn-omimi rị ofufe Osolobuẹ e hikẹ — nị O gi ẹhụ pụha, Mmọn-nsọ a ghọsị nị ịya rọ nke-esi; ndị mmọn-ozi a hụnghọ a. Ịhịan e zisọnmẹgụọ ozi ẹ alị ichẹn-ichẹn; e kwerigụọnị w'a imẹ ụwa. O gi ọghọ lashi elu-igwee.