Samuẹlụ Nke Ibuzọ 1 - Ika

Isi Nke Ohu A Kọ Wẹ Hana Ọnụ-nwa

¹ O nwọn okẹnnyẹ ohu w'a kpọ Ẹl'kana, onyẹ ikpụlọ Zufu, ndị alị Rama hụn rị elu òke Ifrem. Ẹl'kana nị wụ nwa Jẹroham nwa Ẹlihu nwa Tohu nwa Zufu onyẹ Livaị alị Ifrem.

² Ẹl'kana nwọn inyẹnmẹ ẹbụọ. Ẹfan ohu wụ Hana. Ẹfan hụn ẹbọ wụ Pẹnina. Pẹnina mụ ụmụ, kanị Hana amụnị.

³ Ahụa-Ahụa, Ẹl'kana e jẹn Shilo d'e fe ofufe, a chụnyeni Osolobuẹ Ihiẹn Ile rị okpuru ẹ ẹjan. Ogẹn hụ, ụmụ Ẹlaị ẹbụọ wụ Hof'ni lẹ Finẹhasị, ndị nchụn-ẹjan Osolobuẹ, rị ọrụn imẹ Shilo.

⁴ Wẹ ru ebẹhụ, n'o ru ụhụọhịn Ẹl'kana k'e gi chụn ẹjan, o ye Pẹnina nwunyẹ ẹ lẹ ụmụ a anụ ohu-ohu.

⁵ Kanị o ye Hana ụzọ ẹbụọ makẹni ihiẹn Hana sụọ a ọda; kanị, Osolobuẹ kpọkin Hana ẹkpa-nwa.

⁶ Pẹnina nwunyẹ-di Hana hụ a kọ a ọnụ ọda-ọda makẹni Osolobuẹ kpọkin ẹ ẹkpa-nwa, a kọ a ya hụn e gbu mmọn a.

⁷ Ẹrịra k'o mẹ gha ahụa d'e ru ahụa. Ogẹn ọwụlẹ Hana gi jẹn Ụlọ Osolobuẹ, Pẹnina sikọ d'a kọrịrị a ọnụ d'e runi Hana a kwan ẹkwan, jụ ihiẹn-oriri.

⁸ O ru, Ẹl'kana di ẹ hụ a sị a, “Hana, k'ị rị a kwannị? Kị haịn i gilẹni e ri ihiẹn-oriri? Kị ize rị e zen'i? Akanị m'ị mkpa karị ụmụ-ikẹnnyẹ iri?”

Kẹ Hana Dọn Rịọ Chuku Nwa-okẹnnyẹ

⁹ Ụhụọhịn ohu, ebe wẹ rịzị Shilo, e rigụ wẹ ihiẹn-oriri ragụ, Hana nọ lihi. Ẹlaị wụ onyẹ nchụn-ẹjan nọdị alị elu oche ẹ hụn rị ụsụọ ọnụmụzọ Ụnọ Osolobuẹ.

¹⁰ Hana hụ e gi ụya rị a obi a kwan ezigbo ẹkwan, a kpọku Osolobuẹ.

¹¹ Ọ nọ kwe Osolobuẹ nkwa, sị, “Osolobuẹ Ihiẹn ile rị okpuru ẹ, dodo, omẹni y'e mẹ omikẹn lee ụfụ rị odibo i obi, nyanhan m, omẹni y'a zọnị odibo i, nị y'e ye m okẹnnyẹ, m sikọ d'e yekin y'ẹ; ọ k'a wụchanrịn nke i o we nwụn; onwọnni ogẹn w'e gi kọ a ntutu.”

¹² Ẹlaị hụ e lee ẹ ebẹhụ ọ rị e mẹ ekpere.

¹³ Hana hụ e mẹ ekpere imẹ obi ẹ, ụgb'ọnụ a hụ e mẹhunmẹ bụ arị wẹ a nụ olu ẹ; Ẹlaị nọ nwan ro ni manya rị a tụ a.

¹⁴ Ọ nọ sị Hana, “K'ị ranị nwan manya a tụ? Y'a rabehikọ manya tụ?!”

¹⁵ Ọ nọ sị a, “Mba-o, Diọkpa! M rị e ri ụya; aranị m manya ọwụlẹ: kẹ hụn a tụnị kẹ hụn ghalẹni a tụ! Kama, m rị a gwa Osolobuẹ k'ọ rị m.

¹⁶ Dodo erokwọlẹ nị nwa ị wụ eje-okpoho! Ekpere kẹ m rị e mẹ ebeni yeni okẹn-ụfụ lẹ ụya rị m obi.”

¹⁷ Ẹlaị nọ sị “Lama nwan, ihiẹn emẹ i. Osolobuẹ ndị Izrẹlụ ya mẹni i ihiẹn ị rịọ a.”

¹⁸ Hana nọ yi oro sị, “Euu Diọkpa, y'e mẹkẹni odibo i!” Ọ nọ jẹnmẹ; ọ nọ ri ihiẹn-oriri; o rọnmẹzini ihun.

Ọmụmụ Samuẹlụ

¹⁹ Ogẹn eki gi fọn, ikpụnọ hụ ile nọ zọtẹnhin, e jẹngụ wẹ d'e fe Osolobuẹ ofufe kẹ wẹ e mẹ mbu, ya wẹ nọ lakin Rama. Ẹl'kana lẹ Hana a ranhịn, Osolobuẹ nọ nyanhan Hana.

²⁰ O mẹgụ, Hana nọ tụrụ imẹ, mụ okẹnnyẹ. Ọ nọ gụn a “Samuẹlụ”, sị, “M rịọnarịn Osolobuẹ ya.”

²¹ Ahụa a bọ, Ẹl'kana lẹ ikpụlọ a ile nọ jẹnmẹzi nị wẹ d'a chụnyeni Osolobuẹ ẹjan nke ahụa ahụn lẹzi n'o d'e mẹzu nkwa o kwe Osolobuẹ.

²² Kanị Hana ejẹnni. Ọ sị di ẹ, “Nwatanị karayezi hachanrịngụ ẹran, e jẹn m; e weri m'ẹ jẹn ihun Osolobuẹ d'e gi ẹ kwanị Osolobuẹ — ọ nọdịchanrịn ebẹhụ.”

²³ Ẹl'kana nọ sị a, “Mẹ hụn ọwụlẹ ka mma ẹnya ị. Nọdị nwan n'ị hagụ a ẹran. Osolobuẹ ya dodo yeni i ẹka mẹzu nkwa ị.” Ya Hana nọ nọdị ụlọ zụn nwata ahụn d'e ru mgbe ọ ha a ẹran.

²⁴ Ogẹn nwata hụ gi hagụ ẹran, Hana nọ weri ẹ, k'o mẹhanlẹ nwata, werizi efin ahụa ẹtọ lẹ manya lẹ ọka-witi wẹ gweriẹn k'e jun adana ẹtọ lẹ mkpikpi, wẹhẹ ẹ Ụlọ Osolobuẹ imẹ Shilo.

²⁵ E gbugụ wẹ efin hụ gi chụnyeni Osolobuẹ ẹjan, wẹ nọ wẹhẹni Ẹlaị nwata hụ.

²⁶ Hana nọ sị a, “Diọkpa, mmẹ nwa ị rọ! Ma isi i, mmẹ wụ okpohonẹi wuzo ebeni ogẹnnẹi e mẹ ekpere a rịọ Osolobuẹ.

²⁷ M rịọ Osolobuẹ nwanị; o yegụọ m nwan ihiẹn m rịọ a.

²⁸ M rị nwan e we ẹ e ye Osolobuẹ; nke Osolobuẹ k'o k'a wụ o we nwụn.” Wẹ nọ nọ ebẹhụ fe Osolobuẹ ofufe.