Samuẹlụ Nke Ẹbụọ 9 - Ika

Isi Nke Itenẹi Defidi Lẹ Mẹfiboshẹti Nwa Jonatanị

¹ Defidi sị, “O nwọnghọdẹ onyẹ rị ndụn ikpụlọ Sọlụ, kẹni m mẹn'ẹ ihiẹn run'ẹ rịkẹ onyẹ nke Jonatanị?”

² O nwọn odibo Sọlụ ohu rịnị hụn ẹfan a wụ Ziba. Wẹ nọ kpọ a d'a hụn eze wụ Defidi; eze nọ sị a, “Ịyụ wụ Ziba?” Ọ nọ sị a, “Mmẹ odibo i rọ.”

³ Eze nọ sị a, “Onwọnni onyẹ họdụ ikpụlọ Sọlụ, hụn m k'e mẹni ọhụnma Chuku?” Ziba nọ sị a, “O nwọnghọ okẹnnyẹ ohu họdụnị imẹ ụmụ Jonatanị; ụkụ ẹbụbụọ nwụnhụn a.”

⁴ Eze nọ jụ a sị, “Ebe ọ rị?” Ziba nọ sị a, “Ọ rị iwe Makiri nwa Amiẹlụ imẹ Lo-Dẹba.”

⁵ Ya Eze wụ Defidi nọ zi wẹ, wẹ nọ gha iwe Makiri nwa Amiẹlụ rị Lo-Dẹba welụa a.

⁶ Ogẹn Mẹfiboshẹti nwa Jonatanị nwa Sọlụ gi ru ebe Defidi rị, ọ nọ hulụa isi gbaye ẹ. Defidi nọ sị, “Mẹfiboshẹti!!” Ọ nọ sị, “E lee m mmẹ odibo i.”

⁷ Defidi nọ sị a, “Atụlẹ egun, m jẹnkọ d'e mẹ i kẹ onyẹ nke m makẹ Jonatanị nẹdi i. M k'e yekinchanrịn ị alị nẹdi i kanị wụ Sọlụ; ị k'a gha e sọn m e ri ihiẹn ogẹn ile.”

⁸ Mẹfiboshẹti nọ hulụa isi, sị, “Kịnị kẹ mmẹ wụ odibo i wụ i gi lepụha nkitẹ nwụnhụnnị nọkẹ mmẹ?”

⁹ Ya eze nọ kpọ Ziba, odibo Sọlụ, sị a, “E wegụọ m nwan ihiẹn ile wụ nke Sọlụ di-nwọnni i lẹ ikpụlọ a ye Mẹfiboshẹti nwa-nwa a.

¹⁰ Ịyụ lẹ ụmụ ị lẹ idibo i k'a gha a rụnnị Mẹfiboshẹti alị ndị hụ, e welụa ihiẹn ụnụ rụnpụha, nị nwa-nwa di-nwọnni i hụn ụzọ e nwọnhẹn ihiẹn o gi e bi. Mẹfiboshẹti nkẹ k'a gha e sọn m e ri ihiẹn-oriri.” (Ziba nwọn ụmụ-ikẹnnyẹ mmisẹn lẹ idibo ọgụn.)

¹¹ Ya Ziba nọ sị eze, “Mmẹ wụ odibo i k'e mẹ ihiẹn ọwụlẹ eze nwọnni m sị odibo ẹ mẹ.” Ya Mẹfiboshẹti nọ rimẹ ihiẹn-oriri ebe Defidi nọ e ri, rịkẹ nwa eze.

¹² Mẹfiboshẹti mụ nwata okẹnnyẹ ohu ẹfan a wụ Mika. Ụhụọhịn ahụn kẹ ndị ile rị ezi-lẹ-ụlọ Ziba họnrin idibo Mẹfiboshẹti.

¹³ Mẹfiboshẹti nọ biri imẹ Jerusalẹm, makẹni ebe eze nọ e ri ihiẹn-oriri kẹ ịya nwẹn nọ e ri ogẹn ile. Ụkụ ẹbụbụọ nwụnhụn Mẹfiboshẹti.