Samuẹlụ Nke Ẹbụọ 5 - Ika

Isi Nke Isẹn Defidi E Họnrin Eze Izrẹlụ Ile

¹ Ebọn ile rị Izrẹlụ nọ bịa Hibrọnụ d'e kunrun Defidi, sị a, “Ẹnyi lẹ ịyụ wụ umunẹ.

² Kẹ ogẹn Sọlụ gidẹ wụ eze ẹnyi, ịyụ wụ onyẹ hụn e du Izrẹlụ e jẹn agha. Osolobuẹ a sịgụọ ị, ‘Ịyụ jẹnkọ d'e du ndị nke m wụ Izrẹlụ nọkẹ onyẹ-ndu atụnrụn; ịyụ jẹnkọ d'a kị wẹ.’ ”

³ Ogẹn ndị-ichẹn Izrẹlụ ile gi bịagụ d'e kunrun Eze wụ Defidi imẹ Hibrọnụ, wẹ lẹ eze nọ kwerigbama ihun Osolobuẹ, wẹ nọ kin Defidi eze Izrẹlụ ile.

⁴ Defidi rị nwa ahụa iri-kwasị ọgụn k'o ri eze, ọ nọ kị ahụa ọgụnnaị.

⁵ Ọ nọ Hibrọnụ kị Juda ahụa ẹsa lẹ ifọn isin, nọ Jerusalẹm kị Izrẹlụ ile lẹ Juda ahụa mmẹtọ-kwasị ọgụn.

Kẹ Defidi Dọn Weri Jerusalẹm

⁶ Eze wụ Defidi nọ duru ndị-agha shi Jerusalẹm d'a maye ndị Jebusu bi ebẹhụ ọgụn. Ndị Jebusu nọ sị Defidi, “Y'a s'ẹka banhan ebeni — ndị ẹnya-ishi lẹ ndị ngụrọ k'e gbọndọndẹ i.” Wẹ sị enwẹn wẹ nị “Defidi as'ẹka banhan ebeni.”

⁷ K'osilẹrị, Defidi nọ mẹri wẹ, weri Ugu Zayọnụ hụ a fụgbu enwẹn ọrụn ọbanye wẹ gi e che ẹhụ, hụn w'a kpọ nwan Obodo Defidi.

⁸ Defidi e kuọl'ẹ ụhụọhịn ahụn, sị, “Onyẹ chọ n'ọ maye ndị Jebusu sikọ d'a gharịrị ebẹhụ wẹ gu hụn mirin gha a banye obodo hụ, ọ banye d'a maye ndị ngụrọ lẹ ndị ẹnya-ishi hụ wụ ẹṅẹnrẹn Defidi.” Ihiẹnni haịn wẹ gi a sị, “Ndị ngụrọ lẹ ndị ẹnya-ishi abankọ Ụlọ Osolobuẹ hụ.”

⁹ Defidi nọ biri ebẹhụ jẹn elu fụ ọrụn ọbanye, kpọ a Obodo Defidi. Ọ nọ tụn ebe ile nọhunmẹn'ẹ ọhụnma — gha mkpọnyin rị ukun ẹ bidọn.

¹⁰ Defidi hụ e kẹnrẹn, e kẹnrẹnwaye, makẹni Osolobuẹ, Chuku ihiẹn ile rị okpuru ẹ nọyen'ẹ.

¹¹ Hiram wụ eze Taya nọ bu ogwe osisi sida yesọnmẹ wẹ jẹnni Defidi — wẹ lẹ ndị a ma ụlọ lẹ ndị gi ọmụma e dọn ụlọ, wẹ nọ tụnnị Defidi obi-eze.

¹² Defidi nọ marịn nị Osolobuẹ e yegụọ a Izrẹlụ ile kị lẹni o gigụọ ufiri ndị nke ẹ wụ Izrẹlụ bushi alị-eze ẹ elu.

¹³ Ogẹn Defidi gi ghagụ Hibrọnụ bịa Jerusalẹm, ọ nọzị nọ imẹ Jerusalẹm nwọnrinsọnmẹ mgba cheni, lụrụzị inyẹnmẹ cheni, mụzị ikẹnnyẹ lẹ ikpoho cheni ndị ọ mụ mbụ.

¹⁴ Ndịnị wụ ẹfan ụmụ ọ mụ imẹ Jerusalẹm: Shamụa, Shobabụ, Natanị, Solomọnụ,

¹⁵ Ib'ha, Ẹlishụa, Nẹfẹgi, Jafia,

¹⁶ Ẹlishama, Ẹliada lẹ Ẹlifẹlẹti.

Kẹ Defidi Dọn Mẹri Ndị Filistia

¹⁷ Ogẹn ndị Filistia gi nụ nị e kingụọ wẹ Defidi eze Izrẹlụ, wẹ nọ kịrị ndị-agha wẹ ile d'a chọ a. Defidi a nụ a, ọ nọ banye ebẹhụ jẹn elu ọ nọ e che ẹhụ.

¹⁸ Ndị Filistia a pụhagụọ, werisọnmẹ ọnọdị agha imẹ Ọdanmgbugbu ndị Rẹfa;

¹⁹ Ya kẹ Defidi nọ jụ Osolobuẹ, “Nị m jẹn d'a lụsọn ndị Filistia ọgụn? N'i bu wẹ che m ẹka mẹri?” Osolobuẹ nọ sị a, “Jẹn; m k'e burịrị ndị Filistia che i ẹka mẹri.”

²⁰ Defidi nọ shi Baalụ-Pẹrazim, nọ ebẹhụ mẹri wẹ. Ọ nọ sị, “Osolobuẹ e gigụọ ikẹn wapụha kẹ mirin dọn a wapụha d'e mẹshi ndị-iṅẹnrẹn m ikẹn.” Ya wẹ nọ kpọma ebẹhụ Baalụ-Pẹrazim hụn wụ “Di-nwọnni ẹnyi hụn e gi ikẹn a pụha.”

²¹ Ndị Filistia nọ gba mmọn ndị wẹ buhẹ agha tọ ebẹhụ, Defidi lẹ itu ẹ nọ kpọnrin mmọn ndị ahụn.

²² Omẹgụ, ndị Filistia nọ bịazị, werizi ọnọdị agha imẹ Ọdanmgbugbu ndị Rẹfa;

²³ Defidi a jụma Osolobuẹ, ọ nọ sị a, “Aghalẹ ni wẹ ihun, ka ghahunmẹ ni, gha azụụn maye wẹ, nchetarị ihun ebẹhụ osisi basam ndị hụ rị.

²⁴ Hụn i gihụ nụ nkiti-ụkụ elu osisi basam ndị ahụn, ụnụ e buli ozigbo, makẹni, ya wụnị Osolobuẹ e burugụọnị ụnụ ụzọ d'e gbu ndị-agha Filistia.”

²⁵ Defidi nọ mẹ kẹ Osolobuẹ dọn gwa a, ọ nọ saẹka ghakwọrị Gẹba gbusọnmẹ ndị Filistia d'e ru Gẹza.