Samuẹlụ Nke Ẹbụọ 4 - Ika

Isi Nke Ẹnọ E Gbu Wẹ Ish'boshẹti Nwa Sọlụ

¹ Ogẹn Ish'boshẹti nwa Sọlụ gi nụ nị Abna a nwụntọ Hibrọnụ, ndụn a gụ a, obi eruzini Izrẹlụ ile alị.

² Ish'boshẹti nwọn madụ ẹbụọ a kịn'a ndị a maye ndị alị ọzọ a kwahan'a ihiẹn wẹ. Ẹfan ohu wụ Baana, ẹfan hụn ẹbọ wụ Rekabụ. Wẹ ẹbụọ wụ ụmụ Rimọnụ onyẹ Biẹrọtụ ebọn Bẹnjamini. Wẹ a gụn Biẹrọtụ e ye imẹ Bẹnjamini

³ makẹni ndị Biẹrọtụ gbashi Gitaim d'e biri; wẹ bihụ ebẹhụ nọkẹ abịamabịa d'e ru tannị.

⁴ (O nwọn nwa Jonatanị nwa Sọlụ ohu ụkụ ẹbụbụọ nwụnhụn. Kẹ nwata hụ rị nwa ahụa isẹn kẹ ozi gha Jezriẹlụ bịa nị Sọlụ nẹdi ẹ kanị lẹ Jonatanị nẹdi ẹ a nwụnhụn. Hụn a pan'a nọhụ parị a n'ọ gbama ọsọ, kanị ebe ọ rị a hụhụ n'ọ gbapụ, ọ nọ dannahịn a, dan ngụrọ. Ẹfan nwatanị wụ Mẹfiboshẹti).

⁵ Omẹgụ, Rekabụ lẹ Baana ụmụ Rimọnụ onyẹ Biẹrọtụ hụ nọ shi iwe Ish'boshẹti; ogẹn anwụn gi e kẹnrẹn kẹ wẹ gi ru ebẹhụ, ogẹn Ish'boshẹti gi rị e zu ikẹn efinnaị.

⁶ Ya wẹ nọ banye imẹ-imẹ ụlọ Ish'boshẹti nọkẹsị wẹ chọha ọka-witi, wẹ nọ zu ẹ agbada ẹfọ, gepụ.

⁷ Imẹ ụlọ ebe Ish'boshẹti dinẹ elu-bẹdi kẹ wẹ banye d'e kunrun ẹ. E zugụ w'a ọpịa-agha ẹfọ, gbugụ a, wẹ nọ bepụ a isi. Ya wẹ nọ buru isi ẹ, gi abalị hụ ile ghashi ụzọ Ọdanmgbugbu Araba, fetu.

⁸ Wẹ nọ buhẹni eze wụ Defidi isi Ish'boshẹti imẹ Hibrọnụ, sị eze, “Lee isi Ish'boshẹti nwa eṅẹnrẹn i wụ Sọlụ hụn te nwan ikẹn ẹ n'o gbu i. Eze nwẹni m, Osolobuẹ e mẹgwarịgụọ Sọlụ lẹ ụmụ a tannị ihiẹn wẹ mẹ i.”

⁹ Kanị Defidi nọ sị Rekabụ lẹ Baana nwẹnẹ ẹ, ụmụ Rimọnụ onyẹ Biẹrọtụ, “Ma Osolobuẹ, hụn zụọpụha m imẹ nsọngbu m ile,

¹⁰ ogẹn okẹnnyẹ ohu gi bịa d'e kunrun m imẹ Zik'lagị, sị m, ‘Sọlụ a nwụnhụn,’ e ro n'o wẹhẹni m ozi rị mma, e kwọndọn m'ẹ, gbu ẹ. Ịya kẹ m gi kụ a ụgwọ ozi ẹ!

¹¹ Ọrịwụzị ụnụ, ndị eje-ịhịan gbu onyẹ nwọnlẹni ihiẹn o mẹ tọ iwe ẹ, ebe ọ rị elu-bẹdi ẹ — achọkọ m nwan ẹdeke ẹ ẹka ụnụ, wepụ ụnụ elu ụwa?!”

¹² Ya Defidi nọ sị ndị-agha a gbu wẹ, wẹ nọ gbu wẹ. Japụ wẹ ẹka lẹ ụkụ, kọn ẹhụ wẹ ye elu, mkpẹnrẹn mirin Hibrọnụ. Wẹ nọ buru isi Ish'boshẹti li ẹ ye ili Abna imẹ Hibrọnụ ebẹhụ.