Samuẹlụ Nke Ẹbụọ 3 - Ika

Isi Nke Ẹtọ

¹ Ndị nọyeni ikpụlọ Sọlụ lẹ ndị nọyeni ikpụlọ Defidi lụbie agha. Defidi hụ e kẹnrẹn, e kẹnrẹnwaye; ikpụlọ Sọlụ nkẹ hụ a lụa azụụn, a lụawaye.

Ikẹnnyẹ Defidi Mụ K'ọ Rị Hibrọnụ

² Ndịnị wụ ikẹnnyẹ Defidi mụ k'ọ rị Hibrọnụ: nwa ibuzọ a wụ Amnọnụ nwa Ahinụam onyẹ Jezriẹlụ;

³ nke ẹbụọ wụ Kilịabụ nwa Abigẹlụ hụn te wụ nwunyẹ Nabalụ onyẹ Kamẹlụ nị Nabalụ d'a nwụn; nke ube ẹtọ wụ Absalọm nwa Maaka nwa-okpoho Tal'maị eze Gẹshọ.

⁴ Hụn mẹ wẹ ẹnọ wụ Adonija nwa Hagiti; nke isẹn wụ Shẹfatịa nwa Abitalụ;

⁵ nke isin wụ Itrim hụn nnẹ ẹ wụ Ẹgla nwunyẹ Defidi. Ndịnị kẹ Defidi mụ k'ọ rị Hibrọnụ.

Kẹ Abna Dọn Bannị Defidi

⁶ Ogẹn ahụn ikpụlọ Sọlụ lẹ ikpụlọ Defidi gi rị a lụ agha, Abna hụ e mẹ ihiẹn ya lẹ enwẹn gi e kẹnrẹnwaye imẹ ikpụnọ Sọlụ.

⁷ Ogẹn hụ, o nwọn okpoho ohu te wụ mgba Sọlụ; ẹfan a wụ Rizpa nwa Aya. Ish'boshẹti nọ sị Abna, “Kị haịn yụ lẹ mgba nẹdi m gi ranhịn?”

⁸ Ihiẹnni Ish'boshẹti jụ Abna nọ we Abna iwe ọda-ọda, ọ nọ sị Ish'boshẹti, “M wụdẹ nwan nkitẹ Juda wẹ gi e gu egu ra? A nọyegụọnị m ikpụlọ nẹdi i wụ Sọlụ lẹ ezi-lẹ-ụlọ a lẹ ndị ọwụ a d'e ru tannị. Ereni m ụnụ ye Defidi. Ị rị nwan e ku ẹ nị m sọn okpohoni mẹ eje-ihiẹn!

⁹ Osolobuẹ ya mẹ mmẹ wụ Abna ihiẹn, mẹshi m'ẹ ikẹn, omẹni e mẹnini m Defidi ihiẹn Osolobuẹ kun enwẹn ẹ kwe ẹ nkwa,

¹⁰ napụ ikpụlọ Sọlụ eze, mẹ Defidi kịma kẹ Izrẹlụ kẹ Juda — gha Danị d'e ru Biẹshẹba.”

¹¹ Egun anịnị Ish'boshẹti shịarị Abna ihiẹn ọwụlẹ, makẹni egun Abna rị a tụ a.

¹² Abna nọ zi ozi jẹnni Defidi, sị a, “Alịnị wụ nke onyẹ? Nị mmẹ lẹ yụ kịgbama; ezioku kẹ m rị a gwa ị, m k'e yeni i ẹka wẹhẹ Izrẹlụ ile n'ị kịma.”

¹³ Defidi nọ sị a, “Ọ hụghọ mma. Nị mmẹ lẹ ịyụ kịgbamaghọ. Ihiẹn ohu kẹ m chọ ẹka ị: Abịalẹ d'a hụn m, mmanị i wẹhẹ Mikalụ nwa Sọlụ ị lalanị.”

¹⁴ Defidi nọ zi ozi jẹnni Ish'boshẹti nwa Sọlụ, sị a, “Ye m Mikalụ nwunyẹ m, hụn m gi ihiẹn m kwapụha ugun hụn m kwa ikẹnnyẹ Filistia ọgụn-isẹn m gbu imẹ agha lụrụ.”

¹⁵ Ish'boshẹti nọ zi wẹ d'a napụha Pal'tiẹlụ nwa Laishi ya, makẹni ịya kẹ Sọlụ we Mikalụ ye lụrụ.

¹⁶ Pal'tiẹlụ di ẹ te nọ sọnmẹ ẹ, a kwan, d'e rukwọrị Bahurim. Abna nọ sị a, “A la!” Ya ọ nọ kin azụụn.

¹⁷ Abna nọ sọn ndị-ichẹn Izrẹlụ ku. Ọ sị wẹ, “O tegụọ nwan ụnụ chọma nị ụnụ kin Defidi eze ụnụ.

¹⁸ Mẹn'ẹ nwan! Makẹni Osolobuẹ e kwegụọ Defidi nkwa, sị, ‘Odibo m wụ Defidi kẹ m k'a gha gbapụha ndị nke m ẹka ndị Filistia lẹ ndị iṅẹnrẹn wẹ ile.’ ”

¹⁹ Abna nọzị sọn ndị Bẹnjamini ku elee-m elee-i. Ọ nọ shi Hibrọnụ d'a gwa Defidi ihiẹn ile ndị Izrẹlụ lẹ ebọn Bẹnjamini chọ nị wẹ mẹ.

²⁰ Mgbe Abna lẹ madụ ọgụn sọnkọn'a gi bịa Hibrọnụ d'e kunrun Defidi, Defidi nọ kpọnị wẹ oriri.

²¹ Ya Abna nọ sị a, “Nị m lama ozigbo d'a kpọgbamanị ịyụ wụ eze nwọnni m Izrẹlụ ile, nị ịyụ lẹ wẹ hụn ụzọ kwerigbama, lẹn'i hụn ụzọ kị ndị Izrẹlụ ile k'i dọn chọ.” Ya Defidi nọ ha Abna ụla. Abna n'o lama udọn lẹ ndọnkwa.

Kẹ Jụabụ Dọn Gbu Abna

²² Kanị hụn Abna gihụ lamagụ, itu Defidi nọ gha ebe wẹ jẹn d'e gbukwarị pụha — uwẹ lẹ Jụabụ. Ihiẹn wẹ bulụa e hikẹmẹkẹ. Kanị Abna arịzị ebe Defidi rị imẹ Hibrọnụ, makẹni Defidi a hagụọ a ụla, o lama udọn lẹ ndọnkwa.

²³ Ogẹn Jụabụ lẹ ndị agha hụ gi lụa, wẹ nọ gwa a nị Abna bịa d'a hụn eze, lẹni eze nị a la — onwọnni ihiẹn mẹn'ẹ.

²⁴ Ya Jụabụ nọ jẹnburu eze, sị a, “K'i wụdẹ ihiẹnni i mẹ? Lee ẹ, Abna bịa d'a hụn ị. K'ị nịn'a la? Ọ lamagụọ nwan!

²⁵ Y'a marịnghọ Abna nwa Nẹ; ọ bịa d'e mẹ i ẹro, nọ hụnchanrịn k'i nọ e jẹn lẹni ọ hụn ụzọ chọpụhachanrịn ihiẹn ile i rị e mẹ.”

²⁶ Jụabụ nọ gha ebe Defidi rị pụ, zi wẹ d'a kpọ Abna. E ru wẹ ọmị Sira wẹ nọ kunrun ẹ, ya lẹ wẹ nọ kin azụụn. Kanị Defidi amarịn.

²⁷ Ogẹn Abna gi nwan kinhẹn imẹ Hibrọnụ, Jụabụ nọ weri ẹ shi ụsụọ ẹhụ ọnụ-mgbọn, nọkẹsị o nwọn ihiẹn ọ chọ n'ọ gwa a. Kanị ọ nọ gupu Abna ẹfọ, Abna nọ nwụnhụn. Jụabụ gi ẹ gbugwarị Abna ogbugbu o gbu Asahẹlụ nwẹnẹ ẹ.

²⁸ Mgbe Defidi gi nwan nụ ihiẹnni, ọ nọ sị, “Osolobuẹ a marịnghọ nị onwọnni ogẹn ẹka mmẹ lẹ alị-eze m gi rị ihiẹn gbu Abna nwa Nẹ.

²⁹ Ẹdeke ẹ ya rị Jụabụ lẹ ikpụlọ nẹdi ẹ ile isi! Okẹnnyẹ ẹtẹ rị e ru ẹbụn rị ẹhụ mọbụ oti mọbụ onyẹ gi ọkpọ e jẹn mọbụ onyẹ wẹ gi ọpịa-agha gbu mọbụ onyẹ nni-ọnụ rị a kọ akọkọ iwe Jụabụ!!”

³⁰ (Jụabụ lẹ Abishaị nwẹnẹ ẹ gbu Abna makẹni Abna gbu Asahẹlụ nwẹnẹ wẹ imẹ agha wẹ lụ imẹ Gibiọnụ.)

³¹ Ya Defidi nọ sị Jụabụ lẹ ndị ile ya lẹ wẹ wị, “Dọka nị ẹkwa ọnụ! Yiri ni ẹkwa ndị ihiẹn mẹ; kwan nị Abna!” Defidi nke ẹ nọ sọn ozun Abna azụụn kẹ wẹ bukọ a d'e li.

³² Wẹ nọ li Abna imẹ Hibrọnụ ebẹhụ, eze nọ nọ ili Abna kwanshi ẹkwan elu. Ịhịan ile nọzị kwan ẹkwan.

³³ Eze nọ bụ ẹbụnị gi kwan Abna: “Abna nwụnzị nwan kẹ onyẹ-nzuzu ihiẹnni?

³⁴ Ekẹnmẹni wẹ i ẹka; akpọdọnni wẹ i ụkụ. Wẹ gbu i kẹ onyẹ danye ẹka eje-ịhịan.” Ịhịan ile nọ kwanzị nị Abna ẹkwan.

³⁵ Wẹ ile nọ bịa efinaị hụ d'a rịọ Defidi n'o ri ihiẹn-oriri; kanị Defidi a jụ, kun ẹfan Osolobuẹ, sị, “Osolobuẹ ya mẹ m ihiẹn, mẹshi m'ẹ ikẹn, m danmịndẹ brẹdi mọbụ ihiẹn-oriri ọwụlẹ anwụn gini a rọ!”

³⁶ Ịhịan ile nọ kọma ihiẹnni eze mẹ ẹnya, ọ sụọ wẹ ụsụọ ẹfọ ọda-ọda. Ezioku-ezioku, ihiẹn ile eze mẹ sụọ wẹ a sụọ.

³⁷ Ụhụọhịn ahụn, ndị ahụn ile lẹ Izrẹlụ ile nọ marịn nị ẹka eze arị ogbugbu wẹ gbu Abna nwa Nẹ.

³⁸ Ya eze nọ sị ndị ọ rị a kị, “Ụnụ ahụnn'a nị onyẹ-ndu lẹ okẹn-ịhịan nwụnhụn imẹ Izrẹlụ tannị?

³⁹ Ọsụọn'a m wụ eze Osolobuẹ tumẹ, ndụn gụ m tannị — ụmụ Zeruaya-nị a karịka m ẹka; Osolobuẹ ya kụ onyẹ mẹ eje-ihiẹnni ụgwọ eje-ihiẹn o mẹ.”