Samuẹlụ Nke Ẹbụọ 23 - Ika

Isi Nke Ẹtọ Kwasị Ọgụn Oku Ikpanzụụn Defidi Ku

¹ Ndịnị wụ oku ikpanzụụn Defidi ku: Ọnwan wụ oku Defidi nwa Jese ku — Ihiẹn okẹnnyẹ ahụn hụn Onyẹ Kachanrịnnị ye ọghọ ku, okẹnnyẹ ahụn Chuku Jekọpụ tumẹ, ọkụ-ẹbụ alị Izrẹlụ:

² “Mmọn Osolobuẹ gi m ku; oku ẹ rị m ire.

³ Chuku Izrẹlụ ku oku, Ọmụma Izrẹlụ sị m: Onyẹ hụn gi ezi-omumẹ a kị, e gi egun Chuku a kị,

⁴ ọ nọ kẹ ukpẹ ụtụntụn, ebe anwụn nọ a wa, ebe igwere nọ mẹ zaị; ọ nọzị kẹ eki fọnpụnị kẹ mirin zuegụ hụn ẹfịfịa gi e pupụha alị.

⁵ Ẹgbata Chuku lẹ ikpụlọ m arịgụọnị mma? O kwegụọnị m nkwa itẹbitẹ, hụn o dọnkwamagụ; hụn ihiẹn ọwụlẹ jẹnkọlẹni d'e mẹ? Ọ zụọpụhachanrịnkọ m, mẹzuchanrịnnị m ihiẹn rị a gụnnị m?

⁶ Kanị wẹ k'a tụ ndị ile e mẹ eje-ihiẹn ye ụsụọ rịkẹ ogun, hụn wẹ ghalẹni e gi ẹka e kpọnkikomẹ.

⁷ Onyẹ chọ n'o kpọn ogun sikọ d'e girịrị ihiẹn igwe mọbụ obo, ebe ogun rị kẹ wẹ nọ a dụn wẹ ọkụn.”

Ndị Odogun-Agha Defidi

⁸ Ndịnị wụ ẹfan ndị odogun-agha Defidi: Joshẹbụ-Bashẹbẹti onyẹ Takẹmọ, hụn wụ onyẹ-isi imẹ ndị-odogun ẹtọ nẹi; o gi obo ẹ lụsọn madụ nnụnaị ọgụn, gbu wẹ — imẹ agha ohu.

Joshẹbụ-Bashẹbẹti Ẹliẹza Nwa Dodaị

⁹ Hụn e sọnn'ẹ wụ Ẹliẹza nwa Dodaị hụn wụzị Dodo onyẹ Ahọ. Makẹni ọ rị ndị-odogun ẹtọ hụ, ya lẹ Defidi wị kẹ wẹ che ndị Filistia rị Pasị-Damim ọgụn. Ogẹn ndị Izrẹlụ ibe ẹ ile gi gbama ọsọ,

¹⁰ Ẹliẹza e turu ebe o turu, gbumẹ ndị Filistia — d'e runi ẹka a rọchanrịn a — ẹka a a nyantọghọdẹ ọpịa-agha. Okẹn mmẹri kẹ Osolobuẹ ye wẹ ụhụọhịn ahụn. Mgbe ndị agha Izrẹlụ gi nwan kinhẹn d'e kunrun Ẹliẹza, onwọnzini ihiẹn wẹ mẹ karị ikpọnrin ihiẹn ndị o gbu gi bịa agha.

Shama Nwa Agi

¹¹ Hụn e sọnn'ẹ wụ Shama nwa Agi, onyẹ Hara. Ogẹn ndị Filistia gi zu, nọ ebẹhụ ugbo ẹgwa-lẹntilụ rị maye ndị-agha Izrẹlụ ọgụn, ndị-agha Izrẹlụ ile nọ gbanị ndị Filistia ọsọ.

¹² Kanị Shama nọ wuzo ahanmahan ugbo hụ che wẹ ọgụn. Ọ nịnị wẹ weri ugbo hụ; o gbu ndị Filistia hụ, Osolobuẹ e ye Izrẹlụ okẹn mmẹri.

¹³ Ogẹn wẹ gi a ghọ ihiẹn-ugbo, madụ ẹtọ imẹ ndị odogun-agha iri-kwasị-ọgụn pụ ichẹn nọ bịa d'e kunrun Defidi imẹ okporo rị Adulam, ogẹn ndị-agha Filistia gi weri ọnọdị agha imẹ Ọdanmgbugbu Rẹfa.

¹⁴ Ogẹn ahụn, Defidi rị ebẹhụ w'a warị e che ẹhụ; ndị Filistia e butọgụọ ndị-agha imẹ Bẹt'lẹhẹm.

¹⁵ Ẹgụn mirin rị a gụn Defidi, ọ nọ sị, “K'o rị m a hụndẹ m onyẹ sikọ d'e jẹn ọmị rị ẹhụ ọnụ-mgbọn Bẹt'lẹhẹm d'e wẹhẹni m mirin ra!”

¹⁶ Ndị odogun-agha Ẹtọ hụ nọ lụsọn ndị-agha Filistia ọgụn, ghafe, dọrị mirin imẹ ọmị hụ nọkunmẹ ọnụ-mgbọn Bẹt'lẹhẹm, buhẹni Defidi ya. Kanị Defidi a jụ n'ọ rakọ a — o hupụ a yeni Osolobuẹ.

¹⁷ Ọ sị, “Ẹlẹ mmẹ! Osolobuẹ! Ẹlẹ ẹdeke ndịnị bu isi wẹ che ọb'ẹka wụ ihiẹnni?” Defidi a jụ n'ọ rakọ a. Ihiẹn ndị nọ ẹrịra kẹ Ndị odogun-agha Ẹtọ ahụn e mẹ.

Abishaị Nwa Zeruaya

¹⁸ Abishaị nwẹnẹ Jụabụ nwa Zeruaya kị Ndị Odogun Iri-kwasị-ọgụn Ahụn. O gi obo ẹ lụsọn ndị-agha ọgụn mmisẹn, gbu wẹ ile, ẹfan a nọ kpọma kẹ nke wẹ ẹtọ.

¹⁹ Ịya ka Ndị Odogun Iri-kwasị-ọgụn Ahụn, o họnrin onyẹ-isi wẹ — ọ sụọn'a n'a gụnnị w'a ye imẹ Ndị odogun-agha Ẹtọ.

Bẹnaya Nwa Jehoyada

²⁰ Bẹnaya nwa Jehoyada wụ ezigbo onyẹ-agha; onyẹ Kabzilu rọ. Ọ mẹsọnmẹ okẹn-ihiẹn. O gbu ọka-agha ẹbụọ imẹ ndị-agha Mụabụ. Ọ banyezighọ imẹ olu ụhụọhịn mirin ọchan a kpụkpụrụnị wụ sno hụn a tụ eje-oyi rị e ziẹn, gbu ẹwọrọ.

²¹ O gbuzighọ onyẹ Ijiptu ohu pụ-ẹka. Onyẹ Ijiptu hụ gi obo, Bẹnaya gihụ osisi mmaka; ọ zụọnarịn onyẹ Ijiptu hụ obo rị a ẹka, gi obo hụ gbu ẹ.

²² Ihiẹn nọsọnmẹ ẹrịra kẹ Bẹnaya nwa Jehoyada mẹ; ẹfan a a kpọzịghọ kẹ nke odogun ẹtọ hụ.

²³ Ya kachanrịn uwẹ madụ iri-kwasị-ọgụn ọghọ e nwọn. Kanị w'a ra gụn a ye imẹ Odogun Ẹtọ hụ. Ịya kẹ Defidi tumẹ onyẹ-isi ndị Defidi gi e che ẹhụ.

Ndị-agha Iri-kwasị-ọgụn Ahụn Pụ-ichẹn

²⁴ Ndị w'a gụnye imẹ madụ iri-kwasị-ọgụn ahụn wụ: Asahẹlụ nwẹnẹ Jụabụ, Ẹl'hananị nwa Dodo onyẹ Bẹt'lẹhẹm,

²⁵ Shama onyẹ Harọdụ lẹ Ẹlika onyẹ Harọdụ;

²⁶ Hẹlẹzi onyẹ Pal'ti, Ira nwa Ikeshi onyẹ Tẹkụa,

²⁷ Abiẹza onyẹ Anatọtụ lẹ Mẹbunaị onyẹ Husha;

²⁸ Zalụmọnụ onyẹ Ahọ, Maharaị onyẹ Netofa,

²⁹ Hẹlẹbụ nwa Baana onyẹ Netofa lẹ Itaị nwa Ribaị onyẹ alị Gibia rị Bẹnjamini;

³⁰ Bẹnaya onyẹ Piratọnụ, Hidaị hụn wụ onyẹ Ọdanmgbugbu Gaashị,

³¹ Abi-Alụbọnụ onyẹ Ar'ba lẹ Az'mavẹti onyẹ Bahum;

³² Ẹliaba onyẹ Shaalubọnụ, ụmụ Jashẹni, Jonatanị

³³ nwa Shama onyẹ Hara lẹ Ahịam nwa Sharari onyẹ Hara;

³⁴ Ẹlifẹlẹti nwa Ahasbaị onyẹ Maaka, Ẹliam nwa Ahitofẹlụ onyẹ Gilo,

³⁵ Hẹz'ro onyẹ Kamẹlụ lẹ Paraị onyẹ Araba;

³⁶ Igalụ nwa Natanị onyẹ Zoba, Bani onyẹ Gadị,

³⁷ Zẹlẹki onyẹ Amọnụ, Naharaị onyẹ Biẹrọtụ hụn e buni Jụabụ nwa Zeruaya ihiẹn-ọgụn;

³⁸ Ira onyẹ Itri, Garẹbụ onyẹ Itri

³⁹ lẹ Yuria onyẹ Hẹti. Wẹ ile rị madụ mmẹsa kwasị ọgụn.