Samuẹlụ Nke Ẹbụọ 22 - Ika

Isi Nke Ẹbụọ Kwasị Ọgụn Ẹbụ Defidi Gi Ja Osolobuẹ Mma

¹ Ogẹn Osolobuẹ gi zụọpụhachanrịngụ Defidi ẹka ndị-iṅẹnrẹn ẹ ile lẹ ẹka Sọlụ, Defidi nọ gi oku ndịnị bụnị Osolobuẹ ẹbụ.

² Ọ sị, “Osolobuẹ wụ Okẹn-ọmụma e che m nche, ebe m'a gbaban lẹ onyẹ hụn a zụọpụhanị m;

³ Chuku wụ Okẹn-ọmụma m, hụn m'a gbaban; akpaịn m lẹ mpịn hụn a zụọpụhanị m. Ịya wụ ebe m nọ e nwọn nchedọn, ebe m'a gbaban lẹ onyẹ a zụọpụhanị m — ịyụ zụọpụha m ẹka ndị egbu-lẹ-egbu.

⁴ A kpọku m Osolobuẹ, hụn furu w'a ja mma, a wanahịn m ndị-iṅẹnrẹn m.

⁵ Ọnwụn fihunmẹ m nọkẹ ẹbi-mirin; ntikpọ e rukpumẹ m lekẹ mirin-iyi;

⁶ alị-mmọn a kụhunmẹ m nọkẹ ẹgbụn, ọnwụn a kpọ m ihun.

⁷ A nọ m imẹ ụya kpọku Osolobuẹ; a kpọcheni m Chuku m. Ọ gha Ụlọ-NSỌ a nụ olu m, ẹkwan m e ru ẹ ntịn.

⁸ Alị e zinzin, mẹhunmẹ; igwere e mẹhunmẹ ru ebe ọ gha, e mẹhunmẹ ọda-ọda makẹni ize rị e ze ẹ.

⁹ Ẹnwụnrụn hụ a gha a imi a lọpụha; ọkụn e ri ihiẹn hụ a gha a ọnụ a pụha, ikeke ọkụn hụ a gha ebe ọ rị a pụha.

¹⁰ O kewa igwere hidan; igwere gitọnị k'ọ tụkwasị ụkụ.

¹¹ O nyinrin mmọn-ozi nọkẹ ẹshin, fehẹ; o gi ufere họnrin nku.

¹² Ọ gi ẹkpa-ishi kpumẹ enwẹn ẹ — ishi igwere gitọnị.

¹³ Ukpẹ hụ e ti ebe Osolobuẹ rị amụma hụ a gha a e bepụha.

¹⁴ Osolobuẹ a gha igwere gi olu akpabọ ku oku, olu Onyẹ ahụn Kachanrịnnị a hansọnmẹ.

¹⁵ Ọ gi ụta a gba ọbara bu ọda, ndị-iṅẹnrẹn a gbayịya; o gi amụma rị e beni, mẹri wẹ.

¹⁶ Akpakalị ohimin nọ pụha ifọn; iyetọ ụwa a pụha ifọn; makẹni Osolobuẹ bigbọ ohimin hụn o gi tahị; makẹni o kun uzun ẹ kpu ẹ, ọ kọrọ

¹⁷ Osolobuẹ nọ gha elu tịnpụ ẹka, kwọndọn m; ọ gha ogbu mirin dọpụha m.

¹⁸ Ọ zụọpụha m ẹka eṅẹnrẹn hụn kin akwanran, ẹka ndị iwe, hụn te ka m ẹka.

¹⁹ M rị imẹ nsọngbu kẹ wẹ maye m, kanị Osolobuẹ nọ yeni m ẹka.

²⁰ O wepụha m, bu m che ebe ẹhụ nọ fu m; ọ gbapụha m makẹni ihiẹn m sụọ a.

²¹ Osolobuẹ e gigụọ ezi-omumẹ m sọn m o gigụọ ufiri nị ẹka m rị ọchan kụ m ụgwọ-ọrụn.

²² Makẹni m hụ e sọn ụzọ Osolobuẹ; emẹni m eje-ihiẹn ghahanị ịgbakịtọ Chuku m azụụn.

²³ Iwu ẹ ile kẹ ẹnya m rị, apanị m iwu ndị o ye.

²⁴ Enwọn m nkọrịanị ẹnya a, e dọnmẹgụọ m enwẹn m amamgbe m'e mẹ njọ.

²⁵ Osolobuẹ a kụgụọ m ụgwọ makẹ ezi-omumẹ m, makẹni ẹka m rị ọchan ẹnya a.

²⁶ Onyẹ we enwẹn ẹ kwan'ị, y'e we enwẹn i kwan'a; onyẹ mẹchanrịnn'ị hụn ọ marịn, y'e mẹchanrịnn'a hụn ị marịn;

²⁷ Onyẹ gi ezioku sọn i, y'e gi ezioku sọn ẹ; kanị onyẹ gi ghẹrẹ-ghẹrẹ-ghẹrẹ sọn i, y'e gi akọ sọn ẹ.

²⁸ Y'a zụọpụha ndị e wetu enwẹn wẹ alị, kanị ị rị e ke ndị mpache nke, n'ị hụn ụzọ wetu wẹ alị.

²⁹ Euu Osolobuẹ, ịyụ wụ ukpẹ m; Osolobuẹ e mẹ ẹkpa-ishi m rị imẹ ẹ e họnrin ukpẹ.

³⁰ Eyemẹka ị kẹ m gi a s'ẹka a lụsọn igunrun ndị-agha ọgụn; makẹni Chuku nọyeni m, m'a sadẹ ẹka e fe mgbọn.

³¹ O mẹ nke Chuku, ụzọ a zuchanrịn oke; oku ọnụ Osolobuẹ enwọn ntụpọ. Akpaịn kẹ Osolobuẹ wụnị ndị ile gbagbọnin'ẹ.

³² Onyẹ wụ Chuku wezụka Osolobuẹ? Onyẹ wụ Ọmụma wẹ gi e che ẹhụ karị Osolobuẹ ẹnyi?

³³ Osolobuẹ wụ onyẹ e ye m ikẹn, mẹ ụzọ m zu oke.

³⁴ O mẹ ụkụ m e be nkanran, rịkẹ nke ele, m gi a saẹka e wuzo ebe jẹn elu.

³⁵ O zin m agha; m'a sadẹ ẹka a gba ụta igwe-bronzu.

³⁶ Y'e yegụọ m akpaịn i gi e mẹri; makẹni y'e tukun e yeni m ẹka kẹ m gi mẹ okẹn-ịhịan.

³⁷ Y'a kwashịanị m ụzọ m, makẹ ụkụ m gha e kpopụ.

³⁸ A chụ m ndị iṅẹnrẹn m ọsọ, gweriẹn wẹ, egbehutọnị m e we m tikpọgụ wẹ.

³⁹ E gweriẹnchanrịn m wẹ, asanị wẹ ẹka lihi; okpuru ụkụ m kẹ wẹ danye.

⁴⁰ Y'e ye m ikẹn gi lụ agha; y'e mẹ ndị lụsọnni m gbuni m osekpu.

⁴¹ Y'e mẹ ndị-iṅẹnrẹn m e gbehutọ, gbama ọsọ, e tikpọ m ndị e we iwe m.

⁴² A kpọ wẹ d'e yeni wẹ ẹka, kanị onwọnni onyẹ bịa d'a zụọpụha wẹ — a kpọku wẹ Osolobuẹ, ọ zanị.

⁴³ E gweriẹn m wẹ kẹ uzunzun rị alị; a sụ m wẹ, a zọ m wẹ ụkụ kẹ w'a zọ ịkpọtọ rị ogbe.

⁴⁴ Y'a zụọpụhagụọ m ẹka ndị nke m hụn bunụmanị m; y'e mẹgụọ m onyẹ hụn a kị ndị alị ichẹn-ichẹn. Ndị m marịnlẹni rị nwan okpuru m,

⁴⁵ egun m hụ nwan a tụgbu ndị alị ọzọ; wẹ nụhụ banyeni m, e mẹ wẹ ihiẹn m ku,

⁴⁶ ndụn a gụ wẹ ile, e gi wẹ egun pụhasọnmẹ ebe wẹ te nọ e che ẹhụ.

⁴⁷ Osolobuẹ rị ndụn! Ịja-mma ya rịnị Ọmụma m gi e che ẹhụ! Ọghọ ya rịnị Chuku, Ọmụma, Onyẹ-nzụọpụha m!

⁴⁸ Ịya wụ Chuku hụn e mẹgwarịnịnị m, hụn e bu alị ichẹn-ichẹn e che okpuru m;

⁴⁹ onyẹ hụn gbapụha m ẹka ndị-iṅẹnrẹn m. Ịyụ mẹ m karị ndị iwe m e we, gha ẹka ndị egbu-lẹ-egbu gbapụha m.

⁵⁰ Ufiri ẹ, m k'a ja yụ wụ Osolobuẹ mma — imẹ igunrun ndị alị ichẹn-ichẹn. M k'e gi ẹbụ ja ẹfan ị mma.

⁵¹ O yesọnmẹ eze ọ họrị okẹn mmẹri; o nwọnsọnmẹ ihiẹn-ọsụsụọ onyẹ hụn o tumẹ hụn wụ Defidi, kẹ ya kẹ ụmụ a ile jẹnrin ejẹn.”