Samuẹlụ Nke Ẹbụọ 21 - Ika

Isi Nke Ohu kwasị Ọgụn Kẹ Osolobuẹ Dọn Mẹgwarị Ndị Nke Ẹ Ihiẹn Wẹ Mẹ Ndị Gibiọnụ

¹ Ogẹn Defidi gi rị a kị Izrẹlụ, o nwọn ogẹn ụnwụn gi mụ ọrọgbọ ahụa ẹtọ zu ezu. Defidi nọ jụ Osolobuẹ ihiẹn buhẹn'ẹ. Osolobuẹ nọ sị, “Sọlụ lẹ ikpụlọ a ẹdeke rị ẹka haịn — ndị Gibiọnụ Sọlụ gbu haịn.”

² Eze nọ kpọ ndị Gibiọnụ, gwa wẹ oku. Ndị Gibiọnụ ẹlẹ ndị Izrẹlụ kẹti-kẹti; wẹ rị ndị Amọ họdụ alị Izrẹlụ, wẹ rị okpuru ndị Izrẹlụ; ndị Izrẹlụ kun ẹfan Osolobuẹ n'e gbukọ wẹ wẹ, kanị Sọlụ e te gbumẹgụọ wẹ n'o gbupụchanrịn wẹ makẹni ọ rị e mẹ n'ọ ghanị Izrẹlụ lẹ Juda.

³ Ya Defidi nọ nwan jụ ndị Gibiọnụ, “Kịnị kẹ m k'e mẹni ụnụ? Nanị m'e dọn dọnzi ihiẹn, kẹni ụnụ sị ‘Ya rịnị ndị nke Osolobuẹ mma’?”

⁴ Ndị Gibiọnụ nọ sị a, “Ẹnyi eruni hụn k'a sị Sọlụ mọbụ ikpụlọ a gi siliva mọbụ goru kụ ẹnyi ụgwọ mọbụ hụn k'e gbu onyẹ ọwụlẹ imẹ Izrẹlụ.” Defidi nọ jụ wẹ, “Kị ụnụ sị m nwan mẹni ụnụ?”

⁵ Wẹ nọ sị eze, “O mẹ nke okẹnnyẹ ahụn tikpọnị ẹnyi, zuni ẹnyi umẹ hụn wẹ gi gbuchanrịn ndị nke ẹnyi ile wẹ gbu lẹ hụn o gizilẹni nwọn ebe ẹnyi rị imẹ Izrẹlụ,

⁶ ye ni ẹnyi ikẹnnyẹ ẹsa imẹ ụmụ a, nị ẹnyi hogbu wẹ ihun Osolobuẹ imẹ Gibia obodo Sọlụ onyẹ nwẹn Osolobuẹ họrị.” Ya eze nọ sị, “M k'e we wẹ ye ụnụ.”

⁷ Kanị, eze wụ Defidi eyeni wẹ Mẹfiboshẹti nwa Jonatanị nwa Sọlụ gbu, makẹni eze wụ Defidi lẹ Jonatanị nwa Sọlụ kun ẹfan Osolobuẹ kwe ibe wẹ nkwa.

⁸ Eze nọ weri Amọni lẹ Mẹfiboshẹti hụn ẹbọ, ụmụ ikẹnnyẹ ẹbụọ Aya nwa Rizpa mụyeni Sọlụ; o werizi ikẹnnyẹ isẹn Mẹrabụ nwa Sọlụ mụnị Adriẹlụ nwa Bazilaị onyẹ Mẹhola.

⁹ Ọ nọ we wẹ ye ndị Gibiọnụ, wẹ nọ hogbu wẹ tọ elu-òke ihun Osolobuẹ. Wẹ ẹsa gba nwụn mgbe ohu; ogẹn wẹ gi a ghọ mkpụrụ kẹ wẹ gi gbu wẹ — wẹ ghọmahụ ọka-bali wẹ nke ọhụn.

¹⁰ Rizpa nwa Aya, hụn wẹ gbu ụmụ a isẹn nọ weri ẹkwa-achọ, gbamaye elu-ọmụma. Gha ogẹn hụ wẹ gi ghọma ihiẹn-ugbo wẹ hogbu wẹ d'e ru ogẹn mirin gi zuemẹ, mama ozun ndị hụ, ọ nịnị nnụnụ tụ wẹ ebe eki rị elu, ọ nịnị anụ-ọfịa mẹ wẹ ihiẹn ọwụlẹ imẹ uhinhin.

¹¹ Ogẹn wẹ gi gwa Defidi ihiẹn mgba Sọlụ wụ Rizpa nwa Aya mẹ,

¹² Defidi nọ jẹn d'a kịrị ọkpụkpụ Sọlụ lẹ Jonatanị nwa Sọlụ hụn te rị ẹka ndị-isi obodo Jabẹshi-Gilẹdị. (Ndị Jabẹshi-Gilẹdị gi nzuzue buru ẹhụ wẹ ebe wẹ rị ogbe imẹ Bẹt-Shanị, ebe ndị Filistia kọnmẹ wẹ ogẹn hụ wẹ gi gbu Sọlụ imẹ Gil'bụa.)

¹³ Defidi nọ nwan gha Jabẹshi-Gilẹdị bulụa ọkpụkpụ Sọlụ lẹ nwa a wụ Jonatanị, kpọnrinzikwọ ọkpụkpụ madụ ẹsa hụ ndị Gibia hogbu.

¹⁴ Wẹ nọ li Sọlụ lẹ Jonatanị nwa a ye ili-okporo Kishi nẹdi Sọlụ — imẹ Zẹla rị alị Bẹnjamini, mẹchanrịn ihiẹn ile eze sị wẹ mẹ. Omẹgụ, Osolobuẹ nọ za ekpere, mẹni alị Izrẹlụ ọhụnma.

Ndị Adụn-aran Filistia Ndị-agha Defidi Gbu

¹⁵ O nwọnzighọ agha ọzọ seni ndị Filistia lẹ ndị Izrẹlụ, Defidi lẹ ndị agha a nọ jẹn d'a lụsọn ndị Filistia ọgụn. Ebe wẹ nọ a lụ, ndụn nọ gụ Defidi.

¹⁶ Ish'bi-Bẹnọbụ nọ maye Defidi ọgụn. Ish'bi-Bẹnọbụ wụ agbọ adụn-aran, agbọ ndị Rafa. Igwe bronzu wẹ gi kpụ isi obo ẹ nyịnhan kẹ nwa-mkpodu; o buhụ ọpịa-agha ọhụn, ọ nọ sị n'o gbu Defidi.

¹⁷ Kanị Abishaị nwa Zeruaya nọ zụọ Defidi, kụtu onyẹ Filistia hụ, gbu ẹ. Ya ndị itu Defidi nọ kun Osolobuẹ, sị Defidi, “Y'e sọnjẹnkọzịkwọ ẹnyi agha eze, amamgbe w'e tinyụn ukpẹ Izrẹlụ!”

¹⁸ O mẹgụ, agha ọzọ nọ sezini wẹ lẹ ndị Filistia imẹ Gobu. Ogẹn ahụn kẹ Sibẹkaị onyẹ Husha gi gbu Safụ hụn wụzị adụn-aran, agbọ Rafa.

¹⁹ O nwọnzighọ agha ọzọ wẹ lẹ ndị Filistia lụ imẹ Gobu. Ẹl'hananị nwa Jaare-Oregim, onyẹ Bẹt'lẹhẹm, nọ gbu nwẹnẹ Golịatị onyẹ Gatị, hụn obo ẹ han kẹ ẹgbe wẹ gi a kpa ẹkwa.

²⁰ Imẹ agha ọzọ, hụn wẹ nọ Gatị lụ, o nwọn okẹnnyẹ ohu pụ ẹka, hụn nwọn mkpịnsịn-ẹka isin-isin lẹ mkpịnsịn-ụkụ isin-isin — ya wụ, mkpịnsịn ụkụ lẹ mkpịnsịn-ẹka a ile rị ẹnọ-kwasị-ọgụn. Agbọ adụn-aran ahụn wụ Rafa k'ọ wụzị.

²¹ Ogẹn o gi maye ndị Izrẹlụ ọgụn, Jonatanị nwa Shimia nwẹnẹ Defidi nọ gbu ẹ.

²² Madụ ẹnọnị bi Gatị wụchanrịn agbọ adụn-aran ahụn wụ Rafa; Defidi lẹ ndị-agha a gbu wẹ.