Samuẹlụ Nke Ẹbụọ 2 - Ika

Isi Nke Ẹbụọ E Kin Wẹ Defidi Eze Juda

¹ O mẹgụ, Defidi nọ jụ Osolobuẹ, “Nị m shi obodo rị imẹ Juda?” Osolobuẹ nọ sị, “Jẹnmẹ.” Defidi nọ jụ a, sị, “Ebe m'e jẹn?” Osolobuẹ nọ sị a, “Shi Hibrọnụ.”

² Ya Defidi nọ shi ebẹhụ, ya lẹ inyẹnmẹ ẹ ẹbụbụọ wụ Ahinụam onyẹ Jezriẹlụ lẹ Abigẹlụ hụn te wụ nwunyẹ Nabalụ onyẹ Kamẹlụ nị Nabalụ d'a nwụnhụn.

³ Defidi werizikwọ ikẹnnyẹ ịya lẹ uwẹ wị k'o jẹnkọ — onyẹ lẹ ikpụlọ a, onyẹ lẹ ikpụlọ a, wẹ nọ biri alị Hibrọnụ lẹ obodo ndị rị okpuru Hibrọnụ.

⁴ Ya ndị Juda nọ bịa Hibrọnụ, nọ ebẹhụ kin Defidi eze ebọn Juda. Ogẹn wẹ gi gwa Defidi nị ndị Jabẹshi Gilẹdị li Sọlụ,

⁵ ọ nọ han ụkọ jẹnni ndị Jabẹshi Gilẹdị d'a sị wẹ, “Osolobuẹ ya gọzi ọnụ ebe ụnụ nọ mẹni Sọlụ di-nwọnni ụnụ ọhụnma, li ẹ.

⁶ Osolobuẹ ya gi ihiẹn ọma ụnụ mẹ sọn ụnụ, ghọsị ụnụ n'ọ wụ onyẹ wẹ gi e dọn ẹnya; mmẹ nwẹn sikọ d'e mẹzini ụnụ ọhụnma makẹ ihiẹnni ụnụ mẹ.

⁷ Kakẹnmẹ ni nwan; kwọndọn ni obi ọnụ — ọsụọn'a nị di-nwọnni ụnụ wụ Sọlụ nwụnhụngụ, makẹni ebọn Juda e kingụọ m eze wẹ.”

Ish'boshẹti E Họnrin Eze Izrẹlụ

⁸ Ogẹn hụ, Abna nwa Nẹ nkẹ, hụn te wụ onyẹ-ndu agha Sọlụ e wẹhẹgụọ Ish'boshẹti nwa Sọlụ obodo Mahanaim,

⁹ nọ ebẹhụ kin ẹ eze Gilẹdị lẹ Ashuru lẹ Jezriẹlụ lẹ Ifrem lẹ Bẹnjamini — eze Izrẹlụ ile.

¹⁰ Ish'boshẹti nwa Sọlụ rị nwa ahụa ọgụnnaị k'o họnrin eze Izrẹlụ; ahụa ẹbụọ k'ọ kị. Kanị ebọn Juda hụkwọ e sọn Defidi.

¹¹ Ahụa ẹsa lẹ ifọn-isin kẹ Defidi nọ Hibrọnụ kị ebọn Juda.

Agha Izrẹlụ Lẹ Juda

¹² Omẹgụ, Abna nwa Nẹ nọ kịrị ndị-agha Ish'boshẹti nwa Sọlụ gha Mahanaim shi Gibiọnụ.

¹³ Jụabụ nwa Zeruaya lẹ ndị-agha Defidi nọ pụ d'e kunrun wẹ ọgọdọ mirin Gibiọnụ: itu wẹ nọ nọdịsọnmẹ alị — itu ohu rị mirin ahụn azụụnnị, itu ohu rị a azụụn hụn ẹbọ.

¹⁴ Abna nọ sị Jụabụ, “Nị ẹnyi kpọpụha ikorọbịa rị itu ẹnyi ẹbụbụọ d'a lụghọsị ẹnyi ọgụn.” Jụabụ nọ sị a, “Ọ hụghọ mma; wẹ d'a lụ.”

¹⁵ Wẹ nọ họpụha madụ mmẹbụọ imẹ ndị-agha Bẹnjamini lẹ ndị-agha Ish'boshẹti nwa Sọlụ, họpụha madụ mmẹbụọ imẹ ndị-agha Defidi.

¹⁶ Onyẹ-onyẹ imẹ wẹ ẹbụbụọ nọ dọdọn onyẹ hụn ya lẹ ya rị a lụ ntutu, zu ẹ agbada ẹkụnkụn, wẹ ẹbụbụọ nọ nwụnhụnchanrịn. Ya wẹ nọ kpọma ebẹhụ rị imẹ Gibiọnụ “Hẹkatị-Hazurim” hụn wụ “Ogige-agbada.”

¹⁷ Agha wẹ lụ tan ụhụọhịn ahụn kẹnrẹn ọda-ọda, ndị-agha Defidi nọ mẹri Abna lẹ ndị-agha Izrẹlụ.

Abna A Gwarị Gbu Asahẹlụ Nwẹnẹ Jụabụ

¹⁸ Ikẹnnyẹ ẹtọ Zeruaya mụ rị ebẹhụ: Jụabụ, Abishaị lẹ Asahẹlụ. Asahẹlụ a gba ọsọ kẹ ele.

¹⁹ Ọ chụrụ Abna sụọ kẹ wẹ rị agha hụ, ọ chụnị onyẹ ọzọ ẹka-nni, ọ chụnị onyẹ ọzọ ẹka-ekpẹn.

²⁰ Abna e lee ẹnya azụụn, sị a, “Asahẹlụ, ịyụ rọ?” Ọ nọ sị a, “Ẹghẹẹ.”

²¹ Abna nọ sị a, “Bukwọ ẹnya zimẹ ụzọ ọzọ; chọrịkwọ okorọbịa i k'a lụsọn, narịn ihiẹn ẹ o buhẹ agha.” Kanị Asahẹlụ ekweni chụbehi Abna.

²² Abna nọzị sị a, “Chụbehi m! Anịkwọlẹ m gbu i. M gbu i nwan, nanị m'a dọn bu ihun zinmẹ Jụabụ nwẹnẹ i?”

²³ Kanị Asahẹlụ ekweni chụbehi ẹ. Ya Abna nọ gi isi obo ẹ zu Asahẹlụ ẹfọ, obo ahụn nọ zupu ẹ ẹfọ gha a azụụn pụha. Ọ nọ dan ebẹhụ nwụnhụn. Onyẹ ru ebahụn Asahẹlụ nwụntọ, ọ kụsị.

²⁴ Kanị Jụabụ lẹ Abishaị nọ chụsọnmẹ Abna; hụn anwụn gi rọma, wẹ nọ ru ugu Ama hụn nọkunmẹ Gịa, ụzọ atụ alị ọkpọ-nkụn Gibiọnụ.

²⁵ Ya ndị-agha Bẹnjamini nọ zugbama d'a kụrụ Abna azụụn, e họnrin wẹ itu ohu, weri ọnọdị agha elu ugu ohu.

²⁶ Abna nọ kpọcheni Jụabụ sị a, “Ya wụ ẹnyi egbubehikọ ibe ẹnyi? Y'a marịn nị iwe kẹ ihiẹnni jẹnkọ d'e buhẹ? O k'e ru y'e gi sị ndị-agha ị chụbehi umunẹ wẹ?”

²⁷ Jụabụ nọ sị, “Ma Chuku, omẹni ẹlẹ hụn i ku ẹ, nkẹ a chụ wẹ umunẹ wẹ eki e we fọn.”

²⁸ Ya Jụabụ nọ gbu opi-agha, ndị nke ẹ ile nọ kụsị ebe-lẹ-ebe wẹ rị; achụzịnị wẹ ndị Izrẹlụ, alụzịnị wẹ ọgụn.

²⁹ Abna lẹ itu ẹ nọ lama, gi uhinhin ahụn ile fetu Ọdanmgbugbu Araba. E fetu wẹ Iyi-Jọdanị, ghachanrịn Bitrọnụ ile, ya wẹ nọ pụha Mahanaim wẹ gha bịa.

³⁰ Jụabụ nkẹ a gha ebe wẹ jẹn d'a chụ Abna kinhẹn, kpọkikomẹ ndị o duhẹ agha, ndị-agha Defidi, ndị rịlẹn'a rị mmadụ mmitenẹi sụọ, wezụka Asahẹlụ.

³¹ Kanị madụ ọgụn-mmẹsatọ (360) kẹ uwẹ wụ ndị-agha Defidi gbu imẹ ndị Bẹnjamini wẹ lẹ Abna wị.

³² Wẹ nọ buru Asahẹlụ, li ẹ ye ili nẹdi ẹ imẹ Bẹt'lẹhẹm ogẹn wẹ gi ru ụlọ. Jụabụ nkẹ lẹ itu ẹ jẹnzighọ ijẹn uhinhin ahụn ile, e we wẹ ru Hibrọnụ ebe eki nọhụ rị e fọn.