Samuẹlụ Nke Ẹbụọ 19 - Ika

Isi Nke Mmitenẹi

¹ Wẹ nọ sị Jụabụ, “Eze rị a kwan ẹkwan; ọ rị a kwan Absalọm.”

² Ya kẹ mmẹri ụhụọhịn hụ nọ họnrin ụya, makẹni ndị-agha hụ ile a nụgụọ kẹ wẹ sị, “Eze rị a kwan nwa a.”

³ Ụhụọhịn ahụn, ogeban kẹ ndị-agha hụ geban imẹ obodo hụ, lekẹ ndị gba ọsọ-agha ifẹnrẹn rị e mẹ.

⁴ Eze nkẹ e kpumẹ ihun, a kwanshi elu, “Absalọm nwa m-ee! Euu Absalọm! Nwa m-ee! Nwa m-ee!”

⁵ Jụabụ nọ banye imẹ ụlọ d'e kunrun eze, sị a, “Y'e gbegụọ ifẹnrẹn kpu ndị-agha ị ile ihun tannị — ndị nwẹn o mẹni uwẹ zụọpụha ndụn ị lẹ ndụn ụmụ ị ikẹnnyẹ lẹ ikpoho lẹ inyẹnmẹ i lẹ ndị mgba ị.

⁶ Ndị iwe i e we kẹ ihiẹn wẹ a sụọ ị; ndị ihiẹn i a sụọ kẹ iwe wẹ e we i. Tannị k'i mẹ ẹ we ẹnya nị ndị ọkị-agha lẹ ndị-agha ị enwọn ihiẹn wẹ wụ ị ẹnya. A hụnọlẹ m'a nị nkẹ ọ sụọ ị nị ẹnyi ile nwụnhụnchanrịn tannị, kasị a mẹ ni Absalọm hụ ndụn!

⁷ Pụ nwan ezi d'a gba ndị-agha ị umẹ. Omẹni y'a pụnị ezi, ma Osolobuẹ, ọhị gini d'a gba tannị, akpụ onyẹ-agha ohu ahọdụkọn'ị. Ọnwan jẹnkọ d'a ka njọ karị eje-ihiẹn ile kunrunn'i gha okoro i lala.”

⁸ Ya eze nọ lihi ọtọ, nọdị oche ẹ ọnụ-mgbọn. Ogẹn wẹ gi sị wẹ, “Eze nọdị alị ọnụ-mgbọn”, wẹ ile nọ pụha ihun ẹ. Ogẹnni, onyẹ-onyẹ imẹ ndị Izrẹlụ te sọnkọ Absalọm a gbalagụọ iwe ẹ.

Defidi A Lakin Jerusalẹm

⁹ Ebọn ile rị Izrẹlụ hụ a dọ oku eze, a sị ibe wẹ, “Eze zụọpụha ẹnyi ẹka ndị-iṅẹnrẹn ẹnyi; ịya zụọpụha ẹnyi ẹka ndị Filistia. Oku Absalọm e mẹgụọ a nwan gha alị ẹnyi gbapụ;

¹⁰ bụ Absalọm nwẹn ẹnyi tumẹ n'ọ kị ẹnyi a nwụntọgụọ imẹ agha, kị mẹ nwan ụnụ gilẹni e ku oku iwekinhẹn eze?”

¹¹ Eze nọ zi ozini jẹnni ndị nchụn-ẹjan wụ Zadọkụ lẹ Abiata, “Jụ nị ndị-ichẹn Juda, ‘Kị haịn o gi mẹ ni ụnụ sụọ kelẹni ku oku iwekinhẹn eze? Eze rị a jụ ụnụ — makẹni eze a nụgụọ ọnụ ebọn Izrẹlụ ile họdụnị.

¹² Ụnụ wụ umunẹ m — mmẹ lẹ ụnụ wụ ẹdeke ohu. Kị haịnzị o gi mẹ ni ụnụ sụọ kelẹni ku oku iwekinhẹn eze?’

¹³ Sị nị Amasa, ‘Ẹlẹ mmẹ lẹ ịyụ wụ ẹdeke ohu? Osolobuẹ ya mẹ m ihiẹn, mẹshi m'ẹ ikẹn ọda-ọda, omẹni etumẹni m'i onyẹ-ndu agha m, gi i nọkin ẹnya Jụabụ gha kikẹnni jẹnmẹ.’ ”

¹⁴ Ọ nọ weri obi ndị Juda ile nọkẹ sị wẹ ile wụ onyẹ ohu. Wẹ nọ zi ozi jẹnni eze, sị, “Lụaha, ịyụ lẹ itu i ile.”

¹⁵ Eze nọ buli, pụha Iyi-Jọdanị. Ndị Juda a pụhagụọ Gil'galụ d'a nabanhan eze, du ẹ fetu Iyi-Jọdanị, dulụa a.

¹⁶ Shimei nwa Gẹra, onyẹ alị Bahurim ebọn Bẹnjamini nọ sọnrin ndị Juda ozigbo-ozigbo pụha d'e kunrun Eze wụ Defidi.

¹⁷ Ndị Bẹnjamini nnụ-uku sọnhẹn ẹ, cheni Ziba hụn e lepụ ikpụlọ Sọlụ ẹnya, Ziba lẹ ụmụ a ikẹnnyẹ mmisẹn lẹ idibo ọgụn. Wẹ nọ gbaha Iyi-Jọdanị ebe eze rị.

¹⁸ Wẹ nọ gha ebẹhụ mirin nọlẹni mi fetu d'e weghafe ikpụlọ eze, lẹni wẹ hụn ụzọ mẹ ihiẹn ọwụlẹ ọ chọ. Ogẹn Shimei nwa Gẹra gi fetu Iyi-Jọdanị, ọ nọ dannị eze, we ẹfọ mama alị,

Shimei A Rịọ, Defidi A Gbagharị A

¹⁹ sị a, “Di-nwọnni m, dodo, egilẹ njọ m mẹ sọn m. Anyanhanlẹ eje-ihiẹn odibo i mẹ ụhụọhịn hụ eze nwọnni pụkọ Jerusalẹm. Eze ya dodo ebulẹ che obi.

²⁰ Makẹni mmẹ wụ odibo i a marịnghọ n'e mẹgụọ m njọ; kanị, mmẹ wụ nwan onyẹ ibuzọ hụn gha ikpụlọ Josẹfụ bịa d'e kunrun eze nwọnni m tannị.”

²¹ Abishaị nwa Zeruaya nọ sị, “Kịnị k'a sị wẹ egilẹ ufiri ihiẹnni gbu Shimei — ebe omẹni ọ kpọgụọ onyẹ Osolobuẹ tumẹ iyi.”

²² Defidi nọ sị, “Kị biri mmẹ lẹ ụnụ, ụmụ Zeruaya ndịnị?! Ụnụ a wụrụọlẹ ndị-iṅẹnrẹn m tannị! Nị wẹ gbumẹzi ịhịan imẹ Izrẹlụ tannị? O wegụọnị m ẹnya tannị nị mmẹ wụ eze Izrẹlụ?”

²³ Eze nọ sị Shimei, “Egbukọ wẹ i.” Eze nọ kunn'ẹ ẹfan Osolobuẹ.

²⁴ Mẹfiboshẹti nwa-nwa Sọlụ nọzị bịa d'e kunrun eze. Gha ụhụọhịn hụ eze pụ, o lepụdẹni ụkụ a ẹnya k'o dọn e mẹ; o gbubelụanị ẹtu ẹ, ọ sụnị ẹkwa a — d'e ru ụhụọhịn eze lụaha udọn lẹ ndọnkwa.

²⁵ Ogẹn o gi gha Jerusalẹm bịa d'e kunrun eze, eze nọ jụma a, “Mẹfiboshẹti, kị mẹ i gilẹni sọn m?”

²⁶ Ọ nọ sị, “Eze nwọnni m, ebe o mẹni mmẹ wụ odibo i wụ ngụrọ, m nọ sị, ‘M jẹnkọ d'a sị odibo m kwademẹni m anyịnyan-jaki m, nị m nyinrin ẹ, kẹni m hụn ụzọ sọnrin eze.’ Kanị, odibo m wụ Ziba nọ mẹ m ẹro, bu m mbubu-azụụn.

²⁷ O kujagụọdẹ oku mmẹ wụ odibo i ebe ịyụ wụ eze nwọnni m rị. Eze nwọnni m marịn ihiẹn ile — nọkẹ mmọn-ozi Chuku; mẹ nwan ihiẹn ọwụlẹ sụọn'ị.

²⁸ Onwẹni ihiẹn te furu nị yụ wụ eze nwọnni m ye ụmụ nẹdi m kanị ile karị ọnwụn, kanị y'e ye mmẹ wụ odibo i ọnọdị imẹ ndị hụn e sọn i e ri ihiẹn-oriri. Elee ikẹn kẹ m nwọnzi nwan m'e gi rịọzị eze ihiẹn?”

²⁹ Eze nọ sị a, “Esọngbuzilẹ enwẹn i? M rị nwan a sị yụ lẹ Ziba kebe alị nẹdi i kanị.”

³⁰ Mẹfiboshẹti nọ sị eze, “Ya weri ihiẹn ile, ebe o mẹdẹ nwan nị eze nwọnni m e gighọ ẹhụ ikẹn lụa.”

³¹ Bazilaị onyẹ Gilẹdị ghazị obodo ẹ wụ Rogẹlim bịa d'e du eze fetu Iyi-Jọdanị lẹni o duzụkazị eze.

³² Bazilaị a kagụọ ẹgẹdi ọda-ọda, ọ rị nwa ahụa ọgụn-ẹnọ. O yeghọ eze ihiẹn o gi bi ogẹn hụ eze gi rị Mahanaim, makẹni okẹn ọdanfịn k'ọ wụ.

³³ Eze nọ nwan sị Bazilaị, “Sọn m fetu n'i d'e du m nọdị Jerusalẹm, m k'e ye i ihiẹn y'e gi bi.”

³⁴ Bazilaị nọ sị eze, “Ahụa ole kẹ m k'a tọzị — hụn m'e gi jẹnmẹ Jerusalẹm d'e sọn i nọdị?

³⁵ Nwa ahụa ọgụn ẹnọ kẹ m wụ nwan! Nị m sazị nwan ẹka marịn ihiẹn rị mma lẹ hụn rịlẹni mma? Nị odibo i sazị nwan ẹka marịn ụsụọ ihiẹn o ri lẹ hụn ọ ra? Nị m sazị nwan ẹka nụ olu ndị ọkụ-ẹbụ ikẹnnyẹ lẹ ikpoho? Kị odibo i k'a wụrụn'ị ibu, eze nwọnni m, cheni hụn i bu?

³⁶ Odibo i sikọ d'e sọnhụ eze ghafe Iyi-Jọdanị ẹkẹrẹ. Kị eze k'e gini ihiẹn han ẹnịna kụ m ụgwọ?

³⁷ Nị odibo i lakin, kẹni m nwụntọ alị m, ẹhụ ili nẹdi m lẹ nnẹ m. Lee odibo i wụ Kimham. Ya sọn eze nwọnni m fetu. Mẹn'ẹ ihiẹn ọwụlẹ sụọn'ị.”

³⁸ Eze nọ sị a, “Kimham jẹnkọ d'e sọn m fetu; m k'e mẹn'ẹ ihiẹn ọwụlẹ sụọnị ị. Ihiẹn ọwụlẹ ị chọ ẹka m, m k'e mẹn'i y'ẹ.”

³⁹ Wẹ ile e fetugụ Iyi-jọdanị, eze nọ fetu. Eze nọ dide Bazilaị, gọzi ẹ, Bazilaị nọ kin azụụn, lashi iwe ẹ.

⁴⁰ Ya wụ, ogẹn eze gi fetu Iyi Jọdanị, banye Gil'galụ, Kimham sọn ẹ. Ndị-agha Juda ile lẹ ahanmahan ndị-agha Izrẹlụ wị du eze fetu Iyi Jọdanị.

⁴¹ O k'e mẹ e mẹ, ndị Izrẹlụ ile nọ bịama d'e kunrun eze, wẹ sị a, “Kị haịn umunẹ ẹnyi wụ ndị Juda gi zuru eze, we yụ lẹ ikpụlọ ị fetu Iyi-jọdanị — kẹ ndị-agha eze ile?”

⁴² Ndị Juda ile nọ sị ndị Izrẹlụ, “Ẹnyi m'ẹ makẹni eze wụ nwẹnẹ ẹnyi. K'ọ rị e zeni ụnụ ize? Ra o nwọnghọ ihiẹn eze hụn ẹnyi ri mọbụ hụn ẹnyi weri?”

⁴³ Ya ndị Izrẹlụ nọ sị ndị Juda, “Ụzọ iri wụ nke ẹnyi ebe eze rị — ẹbụọ sụọ wụ nke ụnụ; wezụkadẹ ọhụn, ẹnyi ka Defidi e nwọn karị ụnụ. Kị ụnụ n'e legberini ẹnyi? Ẹlẹ ẹnyi buzọ kumẹ ni ẹnyi d'e welụa eze ẹnyi?” Kanị ọnụ ndị Juda nọ karị nke ndị Izrẹlụ.