Samuẹlụ Nke Ẹbụọ 18 - Ika

Isi Nke Mmẹsatọ E Gbu Wẹ Absalọm

¹ O mẹgụ, Defidi nọ kpọpụha ndị-agha ya lẹ wẹ wị, tumẹsọnmẹ ni wẹ ọkị-agha — ndị hụn sikọ d'a kị ndị-agha nnụ-uku nnụ-uku lẹ ndị hụn sikọ d'a kị ndị-agha ọgụn-isẹn ọgụn-isẹn.

² Ya Defidi nọ dọnbe wẹ ụzọ ẹtọ, zipụ wẹ: Jụabụ kị itu ohu, nwẹnẹ Jụabụ wụ Abishaị nwa Zeruaya kị itu ohu, Itaị onyẹ Gatị kị itu ohu. Defidi nọ sị wẹ, “Mmẹ lẹ enwẹn m sikọ d'e sọnrịrị ụnụ.”

³ Kanị wẹ nọ sị a, “Y'e jẹnkọkwọ! O mẹ hụn ẹnyi e gi gba ọsọ, achụkọdẹ wẹ ẹnyi nwẹn; wẹ gbupụdẹ ahanmahan ẹnyi ile nchaị, o hikọkwọ wẹ mmanị isi i — isi i nọ nwan kẹ isi madụ nnụ-uku iri imẹ ẹnyi. Ọ ka nwan mma n'ị nọdị imẹ obodo ebeni, a kwadọn ẹnyi.”

⁴ Eze nọ sị, “Hụn ọwụlẹ rị ụnụ mma ẹnya kẹ m k'e mẹ.” Ya eze nọ wuzo ọnụ-mgbọn, ndị-agha hụ nọ pụhama nị wẹ buli: itu ọgụn-isẹn ọgụn-isẹn lẹ itu nnụ-uku nnụ-uku.

⁵ Eze nọ sị Jụabụ, Abishaị lẹ Itaị, “Gi ni ẹka alụlụa sọn nwata ahụn wụ Absalọm makẹ ufiri m.” Ndị-agha ahụn ile nụ kẹ eze rị a gwa onyẹ-onyẹ imẹ ndị ọkị-agha ahụn oku Absalọm.

⁶ Ndị-agha ahụn nọ shi imẹ ọfịa d'a lụsọn ndị-agha Izrẹlụ agha. Imẹ ẹgboko ẹgbẹrẹ Ifrem kẹ wẹ nọ lụ agha hụ.

⁷ Ndị agha Defidi nọ nọ ebẹhụ mẹri ndị-agha Izrẹlụ. Ndị wẹ gbu ụhụọhịn ahụn e bukẹ ọda: ndị-agha nnụ-uku mmẹbụọ (20,000) kẹ wẹ gbu.

⁸ Agha ahụn ghagbarị azụụn ahụn ile; ndị ẹgboko ahụn gbu ụhụọhịn hụ ka ndị ọpịa-agha gbu.

⁹ O mẹgụ, Absalọm nọ kunrun ndị-agha Defidi idẹnmizi. O nyinkọ anyịnyan-mulu ẹ; kẹ anyịnyan-mulu ẹ ghafekọ okpuru agalaba osisi-okuu hi ogbe, osisi ahụn nọ kọndọn Absalọm isi, Absalọm e kọnrin ebẹhụ, efeke — anyịnyan hụ o te nyinkọ a gbasọnmẹ.

¹⁰ Onyẹ-agha Defidi ohu a hụn a, jẹn d'a sị Jụabụ, “M hụn Absalọm kikẹnni ebe o kọnrin elu osisi okuu.”

¹¹ Jụabụ nọ sị onyẹ hụ gwan'a “Kịnị! Y'a hụnghọ a? Kị haịn i gilẹni gbu ẹ tọ ebẹhụ? Nkẹ m'e ye i nwan akpụrụ siliva iri lẹ akpụkpọ-ukun odogun-agha.”

¹² Kanị okẹnnyẹ ahụn nọ sị a, “Ọsụọdẹn'a wẹ kpọnpụha ibe siliva nnụ-uku kpọnye m, emẹkọ m nwa eze eje-ihiẹn! Ẹnyi a nụgụọ kẹ eze rị a gwa ịyụ lẹ Abishaị lẹ Itaị, ‘Gikwọ nị ufiri m dọnmẹ nwata ahụn wụ Absalọm ndụn.’ ”

¹³ Omẹni m te we isi m che ọb'ẹka gbu ẹ, onwọnni ihiẹn w'e zuemẹni eze; nkẹ ọ wa, y'a la m tọ.

¹⁴ Jụabụ nọ sị a, “Esọnkọ m'ị gbu ogẹn ẹnịna.” Jụabụ nọ kịrị obo ẹtọ, kpọ wẹ ye Absalọm obi elu osisi okuu hụ — ebẹhụ ọ rịkwọ ndụn.

¹⁵ Ya madụ iri ndị e che Jụabụ nche nọ fihunmẹ Absalọm, gi ọpịa-agha gbupụ a.

¹⁶ Ya kẹ Jụabụ nọ gbu opi-agha, ndị-agha nọ chụbehi ndị-agha Izrẹlụ, makẹni Jụabụ a sịgụọ wẹ kụsị.

¹⁷ Wẹ nọ buru Absalọm, tụ a ye imẹ mgbugbu hi-ogbe rị imẹ ẹgboko ahụn, kpọn ọmụma bu ọda kpu ẹ. Ndị-agha Izrẹlụ ile nọ gbayịya, onyẹ-onyẹ nọ la iwe ẹ.

¹⁸ Ogẹn Absalọm gi rị ndụn, o zumẹgụọlẹ ọmụma ohu ye Ọdanmgbugbu-Eze kẹni w'e gi ẹ a nyanhan a, makẹni ọ sị enwẹn ẹ, “Amụnị m okẹnnyẹ hụn w'e gi a nyanhan ẹfan m.” Ya ọ nọ gụn ọmụma hụ ẹfan a. Ihiẹn w'a kpọkwọ a nwan d'e ru tannị wụ “Ịnyanhan Absalọm.”

Kẹ Defidi Dọn Kwan Absalọm

¹⁹ Ahimaazị nwa Zadọkụ nọ sị, “Nị m gba ọsọnị, nị m d'a gwa eze nị Osolobuẹ a zụọpụhagụọ a ẹka ndị-iṅẹnrẹn ẹ.”

²⁰ Jụabụ nọ sị a, “Ẹlẹ ịyụ jẹnkọ d'e zi ozi tannị. N'i zighọ ozi ogẹn ọzọ, kanị ẹlẹ nke tannị, makẹni nwa eze wụ onyẹni nwụnhụnnị maị.”

²¹ Jụabụ nọ sị onyẹ alị ọzọ, onyẹ Ẹtiopịa rị ndị-agha Defidi, “Jẹn d'a gwa eze ihiẹn ị hụn.” Onyẹ Ẹtiopịa ahụn nọ bini Jụabụ, gbajẹnmẹ.

²² Ahimaazị nwa Zadọkụ nọ sịzị Jụabụ, “K'ọrịlẹ, dodo nị m gbasọnmẹ onyẹ Ẹtiopịa.” Kanị Jụabụ nọ sị a, “Nwa m, kịnị k'ị rị a chọnị n'ị jẹn? Ozi hụnnị ẹlẹ hụn w'e gi ye ịhịan ihiẹn.”

²³ Ọ nọ sịzị Jụabụ, “K'ọrịlẹ, m chọ nị m gba ọsọnị.” Jụabụ nọ sị a, “Gba nwan!” Ahimaazị nọ gbajẹnmẹ, ghashi ụzọ alị-aradan ụsụọ Jọdanị, gbaghafe onyẹ Ẹtiopịa.

²⁴ Defidi nọdị alị ẹgbata ọnụ-mgbọn hụn rị imẹ lẹ hụn rị azụụn ezi, onyẹ-nche nọ nyinrin d'a nọdị mmughẹ ụlọ-nche rị elu ọnụ-mgbọn hụ. O lee ẹnya, ọ nọ hụn okẹnnyẹ ohu ya sụọ gbala.

²⁵ Onyẹ-nche hụ nọ kpọcheni eze, gwa a ihiẹn ọ hụn. Eze nọ sị, “Omẹni ịya sụọ wị, ya wụnị ozi rị mma rọ.” Okẹnnyẹ hụ gbalanị hụkwọ a gbazụnhan ọgbazụnhan-ọgbazụnhan.

²⁶ Onyẹ-nche hụ nọ hụnzị onyẹ ọzọ ya sụọ gbala, ọ nọ kpọcheni hụn e che ọnụ-mgbọn, sị a, “Lee o, o nwọnzi onyẹ ọzọ ya sụọ gbala!” Eze a sị, “Ozi rị mma k'o welazịkwọ.”

²⁷ Onyẹ-nche hụ nọ sị, “Hụn bu ụzọ gbakọ kẹ Ahimaazị nwa Zadọkụ.” Eze nọ sị, “Ezigbo ịhịan rọ. Ozi rị mma k'o wela.”

²⁸ Ahimaazị nọ kpọcheni eze, sị, “Ihiẹn ile a rịgụọ mma!” Ọ nọ gbuni eze osekpu, sị, “Ịja-mma ya rịnị Osolobuẹ wụ Chuku i! O wegụọ ndị bunụmanị eze nwọnni m ye ẹ mẹri.”

²⁹ Eze nọ jụ a, “Ndemẹ nwata hụ wụ Absalọm hụ mma?” Ahimaazị nọ sị, “Ihiẹn mẹ ya-ya-ya nị Jụabụ d'e zi odibo i onyẹ Ẹtiopịa lẹ mmẹ nwẹn wụ odibo i, kanị amarịn m ihiẹn ọ wụ.”

³⁰ Eze nọ sị a, “Wuzo ụsụọ; cheri ebeni.” Ọ nọ shi ụsụọ, turu ebahụn.

³¹ Onyẹ Ẹtiopịa hụ nọ pụha, sị, “Eze nwọnni m, nụ ozi rị mma! Osolobuẹ a zụọpụhagụọ ị tannị ẹka ndị ile hụn bunụman'ị.”

³² Eze nọ jụ onyẹ Ẹtiopịa, “Ndemẹ nwata hụ wụ Absalọm hụ mma?” Onyẹ Ẹtiopịa nọ sị a, “Ndị-iṅẹnrẹn eze nwọnni m lẹ ndị ile rị a chọ a njọ, ihiẹn mẹ nwata hụ ya mẹ wẹ.”

³³ Ihiẹn o ku nọ mẹhunmẹ eze. Ọ nọ nyinshi mmughẹ hụ rị elu ọnụmụzọ rị ọnụ-mgbọn, a kwan. K'o jẹnkọ, ọ hụ a sị, “Absalọm nwa m-ee! Euu, nwa m-ee! Absalọm nwa m-ee!! K'ọ rị m, mmẹ nwụnhụn, ẹlẹ ịyụ — Euu Absalọm; nwa m-ee! Nwa m-ee!”