Samuẹlụ Nke Ẹbụọ 16 - Ika

Isi Nke Mmisin Ziba E Gi Ntụ Weri Ọnọdị Di-nwọnn'ẹ

¹ Ogẹn Defidi gi gha elu òke hụ kpọtu ẹkẹrẹ, e lee Ziba odibo Mẹfiboshẹti ebẹhụ k'ọ rị e che Defidi. O gihụ jaki ẹbụọ wẹ kẹnye ihiẹn o gi e bu ịhịan, dọn ogbe brẹdi ọgụn iri, ọkpụkpụ vaịnị ọgụn-isẹn wẹ kikọ, ọkpụkpụ figi ọgụn-isẹn wẹ kikọ — lẹ ihiẹn-manya ohu.

² Eze nọ jụma Ziba, “K'i buhẹni nwan ihiẹn ndịnị?” Ziba nọ sị a, “M wẹhẹ Jaki ndịnị nị ndị ikpụlọ eze gi jẹn ebe ụnụ jẹnkọ; brẹdi lẹ mkpụrụ-osisi ndịnị wụ ihiẹn-oriri ndị yụ lẹ wẹ wị jẹnkọ d'e ri; manya rịn'a kẹ ndị ndụn gụ imẹ alị ọkpọ-nkụn sikọ d'a ra kẹni ndụn banzị wẹ.”

³ Eze nọ jụma a, “Ebe Mẹfiboshẹti nwa-nwa Sọlụ di-nwọnni i rị?” Ziba nọ sị a, “Ọ hụ Jerusalẹm, makẹni ọ rị a sị, ‘Tannị kẹ ndị Izrẹlụ sikọ d'e yekin m alị-eze Sọlụ nẹdi m kanị kịma.’ ”

⁴ Eze nọ sị Ziba, “Ihiẹn ile Mẹfiboshẹti nwọn wụ nwan nke i.” Ziba nọ sị, “E biẹni m'i. Ihiẹn m ya sụọsọnmẹkwọ ị-oo, eze nwọnni m.”

Kẹ Shimei Dọn Kpari Defidi

⁵ Ogẹn Eze wụ Defidi gi nọkunmẹmẹ Bahurim, e lee okẹnnyẹ ohu ya lẹ ikpụlọ Sọlụ wụ ebọn ohu k'ọ kpọla iyi! Ẹfan a wụ Shimei nwa Gẹra.

⁶ Ọ kị ọmụma nwụn Defidi lẹ ịhaịmẹ ẹ, k'o mẹlẹru ni ndị-agha ile lẹ ndị-agha hụ pụ-ichẹn e che Defidi nche rị Defidi ẹka-nni lẹ ẹka-ekpẹn.

⁷ Shimei hụ a kpọ Defidi iyi, a sị, “Pụ ebeni! Pụ ebeni!! Izighẹ!! Eje-ịhịan!!

⁸ Osolobuẹ e mẹgwarịgụọ ị ogbugbu ile i gbu ikpụlọ Sọlụ, hụn ị narịn eze. Osolobuẹ e wegụọ alị-eze nwẹn ye Absalọm nwa ị. Lee nwan kẹ njọ ị dọnmẹ i, izighẹ!”

⁹ Abishaị nwa Zeruaya nọ sị eze, “Kị nkitẹni nwụnnị rị a kpọnị eze nwọnni m iyi?! Nị m fetu d'e bepụ a isi!!”

¹⁰ Eze nọ sị a, “Kị biri mmẹ lẹ ụnụ, ụmụ Zeruaya-nị?! Omẹni iyi ọ rị a kpọ wụ makẹni Osolobuẹ sị a, ‘Kpọ Defidi iyi,’ onyẹ k'a s'ẹka jụ a, ‘K'i mẹni ihiẹnni?’ ”

¹¹ Defidi nọ nwan sị Abishaị lẹ ịhaịmẹ ẹ ile, “Lee n'ẹ, nwa ẹfọ m rị nwan a chọ n'o gbu m, ọrịwụzị onyẹ ebọn Bẹnjamini-ni! Ha n'a ye; ya kpọma — nị Osolobuẹ sị a kpọ.

¹² Ikẹnkwọ Osolobuẹ a hụn ihiẹn wẹ rị e mẹ m, gi ezigbo ihiẹn kụ m ụgwọ iyini m rị a narịn tannị.”

¹³ Defidi lẹ ndị ya lẹ wẹ wị nọ ghasọnmẹ ụzọ wẹ ghakọ, Shimei nkẹ ghakọ nkpọnyin azụụn hụn ẹbọ kpọkọ Defidi iyi, a ma a ọmụma, a bụọ a ẹjan.

¹⁴ Ẹhụ a rọgụọ Eze lẹ ndị ile ịya lẹ wẹ wị kẹ wẹ ru ebe wẹ jẹnkọ. Ọ nọ nọ ebẹhụ zu ikẹn.

Ndụnmọdụn Ahitofẹlụ Ye Absalọm

¹⁵ Absalọm nkẹ lẹ ikẹnnyẹ Izrẹlụ ile nọ bịa Jerusalẹm; ịya lẹ Ahitofẹlụ wị.

¹⁶ Ọwụ Defidi wụ Hushaị onyẹ Aki nọ jẹnburu Absalọm, sị a, “Agụ, isi i chei! Agụ, isi i chei!”

¹⁷ Absalọm nọ jụma Hushaị, “Ẹrịra kẹ ihiẹn ọwụ ị sụọhan ị? Kị haịn i gilẹni sọnrin ọwụ ị?”

¹⁸ Hushaị nọ sị Absalọm, “Mba; onyẹ Osolobuẹ họrị, onyẹ ndịnị họrị, onyẹ hụn ndị Izrẹlụ ile họrị, ịya kẹ m k'a wụ nke ẹ, sọn ẹ nọdịsọnmẹ.

¹⁹ Ẹlẹdẹ ọhụn sụọ: onyẹ nkẹ m'e fedẹ omẹni ẹlẹ nwa a? Kẹ m dọn fe nẹdi i, ẹrịra kẹ m k'e fe i.”

²⁰ Absalọm nọ sị Ahitofẹlụ, “Tụnị ẹnyi iroro. Kị ẹnyi jẹnkọ d'e mẹ?”

²¹ Ahitofẹlụ nọ sị a, “Sọn ndị mgba nẹdi i ranhịn, ndịnị ọ latọ nị wẹ lepụn'a obi-eze ẹnya. Ndị Izrẹlụ ile jẹnkọ d'a nụ a nị y'e họnringụọ eje-eṅẹnrẹn nẹdi i. Ogẹn ahụn, obi e zewaye ndị ile sọnkọn'ị.”

²² Ya wẹ nọ tumẹni Absalọm ọdụ elu ụlọ, ọ nọ ebẹhụ sọn ndị mgba nẹdi ẹ ranhịn, idẹnya Izrẹlụ ile.

²³ Makẹni, ogẹn ahụn, Ahitofẹlụ tụ iroro, ọ nọ kẹ ebe Osolobuẹ nọ gi ịhịan ku uche ẹ; kẹ Defidi kẹ Absalọm e gi ẹnya hụ e lee ndụnmọdụn Ahitofẹlụ.