Samuẹlụ Nke Ẹbụọ 15 - Ika

Isi Nke Mmisẹn Absalọm A Narịn Defidi Ukpo-eze

¹ O tebe, Absalọm nọ nwọnrin ụgbọ-ẹshin ohu, nwọnrinsọnmẹ ẹshin lẹ mmadụ iri kwasị ọgụnnaị hụn e burun'ẹ ụzọ.

² Ọ tẹnhinkẹnrin d'e wuzo mkpẹnrẹn ụzọ hụn pụ ọnụ-mgbọn obodo hụ. Onyẹ ọwụlẹ bula oku d'e kinghọsị eze n'o dọnzi, Absalọm a hị a, jụ a, sị, “Elee obodo k'ị gha bịa?” Ọ gwagụ Absalọm ebọn wẹ imẹ Izrẹlụ,

³ Absalọm a sị a, “Lee ẹ, ikpe i rịchanrịn mma, kanị eze e nwọn onyẹ o tumẹ ebẹhụ k'e leban oku i ẹnya.”

⁴ Absalọm a sị nwan, “Omẹni mmẹ te a han eṅẹn imẹ alịnị! Nkẹ o mẹ ni onyẹ nwọn ihiẹn o k'e ku mọbụ ikpe o k'e kpe, ọ bịa d'e kunrun m, e dọnzini m'ẹ oku ahụn ọhụnma!”

⁵ Ọzọ rịn'a, onyẹ bịa d'e kunrun Absalọm chọ n'o hulụa alị kele Absalọm, Absalọm a tịnpụ ẹka, kwọndọn ẹ, didedẹ ẹ.

⁶ Ẹnịna kẹ Absalọm e mẹchanrịn ndị Izrẹlụ ile rị e buhẹni eze oku n'o dọnzi, ọ nọ gi ẹ werichanrịn obi ndị Izrẹlụ.

⁷ O zu ahụa ẹnọ, Absalọm nọ sị eze, “Nị m jẹnru Hibrọnụ d'e mẹzu nkwa m kwe Osolobuẹ.

⁸ Ogẹn mmẹ odibo i gi rị Gẹshọ alị Aram kẹ m kwe nkwa, sị, ‘Nkẹ Osolobuẹ e wekinkwọ m Jerusalẹm, m k'a nọ Hibrọnụ fe Osolobuẹ.’ ”

⁹ Eze nọ sị a, “Ijẹn-ẹwẹrẹ.” Ọ nọ shi Hibrọnụ.

¹⁰ Absalọm nọ zi ndị ụkọ d'e gi nzuzue ghagbama ebọn ile rị Izrẹlụ d'a sị wẹ, “Hụn ụnụ gihụ nụ kẹ wẹ gbu opi, ụnụ a gwama wẹ sị, ‘Absalọm a wụrụgụọ eze imẹ Hibrọnụ.’ ”

¹¹ Wẹ rị madụ ọgụn-iri gha Jerusalẹm sọnrin Absalọm. Wẹ kpọ wẹ hụ akpọ, wẹ nọ jẹnmẹ — ajụnị wẹ ajụjụ, amarịn wẹ ihiẹn o romẹ.

¹² Ogẹn Absalọm gi rị a chụn ẹjan ahụn, o zi wẹ d'a kpọ Ahitofẹlụ onyẹ Gilo, hụn wụ ọka-iroro Defidi, sị a ya gha obodo ẹ wụ Gilo bịa. Umẹ ahụn Absalọm rị e zu nọ kẹnrẹn, ndị rị e sọn Absalọm hụ a bawaye ụba.

Defidi A Gbapụnị Absalọm

¹³ Onyẹ ozi ohu nọ bịa d'a sị Defidi, “Obi ndị Izrẹlụ ile rị ebe Absalọm rị.”

¹⁴ Defidi nọ sị ịhaịmẹ ẹ ile ya lẹ wẹ rị imẹ Jerusalẹm, “Ozigbokwọ nị! Nị ẹnyi gbapụnị! Omẹni ẹnyi agbapụnị, onwọnni akpụ onyẹ ohu imẹ ẹnyi k'a wanahịn Absalọm. Kikẹnni-kikẹnni kẹ ẹnyi pụkọ nwan, amamgbe o buli ozigbo d'e kunrun ẹnyi, tikpọ ẹnyi, gi ọpịa-agha mẹ obodoni ihiẹn.”

¹⁵ Ịhaịmẹ eze nọ sị a, “Ẹnyi ihu i jẹnkọ d'e mẹ ihiẹn ọwụlẹ eze nwọnni ẹnyi chọ.”

¹⁶ Eze nọ gha obi-eze ẹ pụha, ịya lẹ ezi-lẹ-ụlọ a ile sọnkọn'a; kanị ọ latọ ndị mgba a iri, kẹni wẹ hụn ụzọ e lepụ obi-eze ẹnya.

¹⁷ Eze nọ buli, ịya lẹ ndị ile sọnkọn'a, wẹ nọ kụsị ụlọ ikpanzụụn rị obodo hụ.

¹⁸ Ndị idibo eze ile nọ jẹnghafe ẹ, kẹ ndị nche ẹ wụ ndị Kẹrẹtị lẹ ndị Pẹlẹtị kẹzi ndị Gatị ọgụn-iri kwasị nnụ (600) hụ ile hụn gha Gatị sọnhẹn ẹ; wẹ nọ buruni eze ụzọ.

¹⁹ Eze nọ sị Itaị onyẹ Gatị, “K'i sọnkọnị ẹnyi? Kin azụụn d'e sọn Eze wụ Absalọm nọdị. Ị wụ abịamabịa; wẹ mẹdẹ i gha alị ị pụ.

²⁰ Ụnyanhụn k'ị bịa ebeni, o ru nwan tannị e mẹ m'i sọn ẹnyi wasọnmẹ, hụn m marịnlẹni ebe m jẹnkọ? Kin azụụn; weri umunẹ i kin azụụn. Ọhụnma lẹ ezioku ya sọnsọnmẹ i.”

²¹ Kanị Itaị nọ sị eze, “Ma Osolobuẹ, ma isi i eze nwọnni m, ebe ọwụlẹ eze nwọnni m bi, ebe ọwụlẹ eze nwọnni m rị, ọ sụọ n'a ndụn, ọ sụọn'a ọnwụn, ebẹhụ kẹ m k'a rị.”

²² Defidi nọ sị Itaị, “Nje nwan.” Ya Itaị onyẹ Gatị lẹ itu e ile lẹ inyẹnmẹ wẹ lẹ ụmụẹka wẹ, ndị ile ya lẹ wẹ wị nọ jẹnmẹ.

²³ Ndị ile rị ụmụ-alị ndị wẹ rị a ghafe nọ kwansusu kẹ wẹ ile ghafekọ. Eze nọzị fetu Ọdanmgbugbu Kidrọnụ, ya lẹ ndị hụ ile ya lẹ wẹ wị nọ dọn ihun ibẹka atụ alị ọkpọ-nkụn.

²⁴ Ebẹhụ kẹ Zadọkụ onyẹ nchụn-ẹjan nọzị pụha; ya lẹ ndị Livaị ile ya lẹ wẹ wị bukọ Ẹkpẹti Nkwerigbama Chuku. E butu wẹ Ẹkpẹti Chuku alị, Abiata nọ chụnma ẹjan. Ọ hụ a chụn a d'e runi ndị ile pụkọnị a ghachanrịn Jerusalẹm pụ.

²⁵ Ya eze nọ sị Zadọkụ, “Bukinkwọ Ẹkpẹti Chuku imẹ obodo. Omẹni ihiẹn m a sụọghọ Osolobuẹ, o k'e wekinhẹn m, mẹ m hụnzị Ẹkpẹti ẹ lẹ ebẹhụ ya lẹ enwẹn ẹ bi.

²⁶ Kanị, ọ sị m, ‘Ihiẹn i asụọnị m,’ ya mẹ m nwan ihiẹn ọwụlẹ rị a mma ẹnya.”

²⁷ Eze nọzị sị Zadọkụ onyẹ nchụn-ẹjan, “Ẹlẹ onyẹ-amụma k'ị wụ? Lakin imẹ obodo, ihiẹn emẹ i — ịyụ lẹ nwa ị okẹnnyẹ wụ Ahimaazị lẹ nwa Abiata wụ Jonatanị. Ịyụ lẹ Abiata, weri ni ụmụ ụnụ ẹbụọ hụ lakin.

²⁸ M k'a nọ ebẹhụ milẹni wẹ gha e fetu Iyi Jọdanị imẹ alị-ọkpọnkụn cheri d'e ru mgbe m nwọnhẹn ozi ụnụ”

²⁹ Ya Zadọkụ lẹ Abiata nọ buru Ẹkpẹti Chuku lakin Jerusalẹm d'a nọdị.

³⁰ Defidi nọ jẹnsọnmẹ, nyinkọ Ugu-Olivu, kwankọ; o kpumẹ isi; onwọnni ihiẹn o yi ụkụ. Ndị ile ya lẹ wẹ wị kpumẹzikwọ isi, kwankọ, jẹnkọ.

³¹ A gwagụọ wẹ Defidi, sị, “Ahitofẹlụ rị ndị wẹ lẹ Absalọm gba zun'i umẹ.” Defidi nọ mẹ ekpere, sị, “Osolobuẹ dodo, mẹ ndụnmọdụn ọwụlẹ Ahitofẹlụ jẹnkọ d'e ye wụrụ nzuzu.”

³² Ogẹn Defidi gi ru elu òke hụ, ebẹhụ wẹ te nọ e fe Chuku, e lee Hushaị onyẹ Aki, ọ hụ ebẹhụ e che ẹ; ọ dọkagụọ ẹwuru ẹ, kpọn uzunzun ye isi.

³³ Defidi nọ sị a, “I sọnmẹ m, ị k'a wụrụ m ibu olu.

³⁴ Kanị, ị lakin Jerusalẹm, sị Absalọm, ‘Agụ, m jẹnkọ d'e fe i; e fegụọ m nẹdi i, kanị ịyụ kẹ m sikọ nwan d'e femẹ,’ ebẹhụ kẹ y'a nọ kpayịyanị m ndụnmọdụn Ahitofẹlụ jẹnkọ d'e ye.

³⁵ Ndị nchụn-ẹjan wụ Zadọkụ lẹ Abiata — arị wẹ ebẹhụ? Ihiẹn ọwụlẹ i nụ imẹ obi-eze y'a gwa wẹ.

³⁶ Ụmụ wẹ ẹbụọ, Ahimaazị nwa Zadọkụ lẹ Jonatanị nwa Abiata, jẹnkọ d'a rịzị ebahụn. Ihiẹn ọwụlẹ ị nụ, y'e zi wẹ zi m.”

³⁷ Ẹrịra kẹ ọwụ Defidi wụ Hushaị gi kin azụụn shi Jerusalẹm; Absalọm nkẹ rịhụ a banhan imẹ obodo hụ kẹ Hushaị ru ẹ.