Samuẹlụ Nke Ẹbụọ 14 - Ika

Isi Nke Mmẹnọ Jụabụ E Gi Uche Rịọnị Absalọm

¹ Ogẹn Jụabụ nwa Zeruaya gi lepụha nị Absalọm rị a da eze,

² ya Jụabụ nọ zijẹn ịhịan Tẹkụa, wẹ nọ jẹn d'e wẹhẹn'ẹ okpoho ohu marịn ihiẹn. Ọ nọ sị okpoho hụ “Mẹ kẹ sị ị rị a kwan ịhịan; yiri ẹkwa-achọ; akwọlẹ udẹn. Mẹhụ kẹ okpoho rị a kwan ịhịan kete elee mgbe.

³ Y'e jẹn d'e kunrun eze, n'ị gwa a oku ndịnị m jẹnkọ a gwa ị.” Ya Jụabụ nọ gwa a ihiẹn ndị o k'e ku.

⁴ Ogẹn okpoho hụ gha Tẹkụa bịa gi ru ebe eze rị, ọ nọ dannị eze alị ye ẹ ọghọ; ọ nọ sị, “Agụ, dodo, yeni m ẹka!”

⁵ Eze nọ sị a, “Kị wụ mkpa ị?” Ọ nọ sị a, “Eziẹ, okpoho di ẹ nwụn kẹ m wụ.

⁶ Mmẹ wụ igbọn i mụ ikẹnnyẹ ẹbụọ. Ọgụn e seni wẹ ẹbụọ imẹ ugbo, onwọnni onyẹ rị ebẹhụ k'e gbọn wẹ ọgụn. Ohu nọ fịan ibe ẹ ihiẹn fịangbu ẹ.

⁷ Ebọn ẹnyi ile e bugụọ nwan nụmanị mmẹ wụ igbọn i; wẹ sị m, ‘Wepụha onyẹ hụn gbu nwẹnẹ ẹ, nị ẹnyi gbugwarị, nị ẹnyi hụn a nị ya nwẹn ewerini ukuu nẹdi ẹ.’ Agụ, wẹ mẹ ẹ, e tinyụn wẹ akpụ ikeke ọkụn ohu họdụ m ẹka, onwọnkọzị hụn k'a họdụnị di m elu-ụwa, kẹ ẹfan kẹ nwa.”

⁸ Eze nọ sị okpoho hụ, “A la; m k'a gwa wẹ hapụ nwa ị.”

⁹ Okpoho ahụn gha Tẹkụa bịa nọ sị a, “Eze nwọnni m, ndọọ; ọmụma-ikpe ya lẹ eje-ihiẹnni wị ya rịnị mmẹ lẹ ikpụlọ nẹdi m — ikpe y'a malẹ eze lẹ ukpo ẹ.”

¹⁰ Eze nọ sị a, “Onyẹ gwazị ị ihiẹn ọwụlẹ, wẹhẹni m'ẹ, n'ọ hụn ụzọ yebehi i nsọngbu.”

¹¹ Okpoho ahụn nọ sị, “Eze y'a kpọku nwan Osolobuẹ wụ Chuku ẹ n'ọ kụsị onyẹ nwọn gbugwarịnị ebọn ẹnyi makẹ ọ gha e gbu ẹ cheni hụn wẹ gbugụ, mẹkẹ w'e gbu nwa m.” Eze nọ sị a, “Ma Osolobuẹ, onwẹni akpụ ntutu ohu rị nwa ị isi hụn k'a dan alị.”

¹² Okpoho hụ nọ sị a, “Nị mmẹ igbọn i gwa eze nwọnni m akpụ oku ohu.” Eze nọ sị a, “Ku.”

¹³ Okpoho ahụn nọ sị a, “K'i mẹni ndị nke Osolobuẹ ihiẹn nọ ẹnịna? Ebe eze nọ ku ihiẹnni, ọ magụọnị enwẹn ẹ ikpe — ebe eze nọlẹni welụa nwa a wẹ chụpụ?

¹⁴ K'o dọn mẹ ni mirin huye alị ọ lachanrịn, ẹrịra k'o dọn mẹ ni ẹnyi wụ ịhịan k'a nwụnhụnrịrị. Kanị Chuku ara wepụ ndụn ịhịan — kama, ọ chọ ụzọ o gi e wekinhẹn onyẹ ọ chụpụ, makẹ hụnyẹ gha a tọ ogbe.

¹⁵ “M bịa nwan d'a gwa eze nwọnni m ihiẹnni makẹni e mẹgụọ wẹ egun tụma m. Mmẹ odibo i sị, ‘M sikọ d'e du eze ku; ikẹnkwọ o mẹ ihiẹn odibo ẹ rịọ a.

¹⁶ Ikẹnkwọ eze e kweri gbapụha odibo ẹ ẹka onyẹ rị a chọ n'o gbụpụ kẹ mmẹ kẹ nwa m makẹ ẹnyi gha e nwọnrin ihiẹn Osolobuẹ ye ẹnyi.’

¹⁷ Igbọn i rị nwan a sị, ‘Oku eze nwọnni m ku ya dodo wẹhẹni m ihiẹn obi e gi ru m alị, makẹni eze nwọnni m nọ kẹ mmọn-ozi Chuku makẹni ọ marịnghọ ihiẹn rị mma lẹ ihiẹn rịlẹni mma. Osolobuẹ wụ Chuku ya nọyen'i-oo!’ ”

Absalọm A Lụakinhẹn Jerusalẹm

¹⁸ Ya eze nọ sị okpoho hụ, “Za m ihiẹn m jẹnkọ nwan d'a jụ ị, ezuemẹlẹni m ẹfọ.” Okpoho ahụn nọ sị, “Eze nwọnni m ya kumẹ.”

¹⁹ Eze nọ sị a, “Ẹlẹ Jụabụ zi i d'e mẹ ihiẹnni ile?” Okpoho hụ nọ sị a, “Ma isi i eze nwọnni m, hụnnị ị jụ ajụjụnị, onwọnni onyẹ k'a saẹka zuemẹn'i ẹfọ. Ẹghẹẹ, odibo i wụ Jụabụ sị m mẹ ihiẹnni, ịya bu oku ndịnị ile che igbọn i ọnụ.

²⁰ Odibo i wụ Jụabụ mẹ ihiẹnni n'o gi gbehutọ ọnọdị rị ogẹnni. Di-nwọnni m nwọn amamihiẹn nọkẹ nke mmọn-ozi Osolobuẹ, ọ marịnchanrịngụọ ihiẹn ile rị e mẹni.”

²¹ Ya eze nọ sị Jụabụ, “Ọ hụ mma; m k'e mẹ ẹ. Jẹn d'e welụa okorọbịa hụ wụ Absalọm.”

²² Jụabụ nọ dannị eze alị gi ye ẹ mgbaye; ọ nọ kpanmịn eze. Jụabụ nọ sị, “Tannị kẹ mmẹ odibo i marịn nị ihiẹn m sụọ ị asụọ, eze nwọnni m, makẹni y'e mẹgụọ ihiẹn odibo i rịọ ị.”

²³ Jụabụ nọ jẹn Gẹshọ, o welụa Absalọm Jerusalẹm.

²⁴ Kanị, eze sị, “Ya shikwọ iwe ẹ; y'a bịakwọlẹ d'a hụn m.” Absalọm nọ lashi iwe ẹ; ya lẹ eze ahụnnị ẹnya.

²⁵ Imẹ Izrẹlụ ile, onwọnni onyẹ wẹ gi e jeni Absalọm ebe mma-ẹhụ rị. Gha isi d'e ru ọbụkụ, onwọnni ebe rịlẹni mma ẹhụ a.

²⁶ Ọ gụnye, ọ kọ ntutu rị a isi. Ọ nyịnma a k'ọ nọ a kọ a; ọ kọ a, o lele k'ọ nyịnhan. Ọ ma a, ọ nyịnhan kẹ nneku-ọhụhụ (2kg).

²⁷ Ikẹnnyẹ ẹtọ lẹ okpoho ohu kẹ Absalọm mụ. Ẹfan nwa a hụn okpoho hụ wụ Tama, o suepụha, ma mma okpoho ọda-ọda.

²⁸ Absalọm nọdị imẹ Jerusalẹm ahụa ẹbụọ, ya lẹ eze ahụnnị ẹnya.

²⁹ O mẹgụ, Absalọm nọ zi wẹ kpọ Jụabụ n'ọ hụn ụzọ zi ẹ d'e kunrunn'ẹ eze. Kanị, Jụabụ ekweni bịa. O zizi wẹ, o kweni bịa.

³⁰ Ya Absalọm nọ sị idibo ẹ, “Lee n'ẹ, ugbo Jụabụ e sọn nke m, ọka-bali ẹ rị ebẹhụ. D'e yin'ẹ ọkụn.” Ya idibo Absalọm nọ yi ugbo Jụabụ ọkụn.

³¹ Ya Jụabụ nọ nwan shi iwe Absalọm, sị a, “Kị idibo i yini ugbo m ọkụn?”

³² Absalọm nọ sị Jụabụ, “Lee ẹnya, m zi wẹ d'a kpọ ị, sị ị, ‘Bịa ebeni nị m hụn ụzọ zi i d'e kunrun eze, n'ị jụ a kẹ “Kịnị kẹ m ghanị Gẹshọ lụaha? Omẹni echẹn kẹ m rị ebẹhụ k'o te ka m mma!” ’ M chọ nwan nị m d'a hụn eze; omẹni O nwọnghọ ihiẹn ikpe gi ma m, ya gbu m.”

³³ Ya Jụabụ nọ jẹn d'e kunrun eze, gwa a ihiẹnni. Eze nọ kpọ Absalọm, ọ nọ banhan, gbuni eze osekpu, eze nọ dide ẹ.