Samuẹlụ Nke Ẹbụọ 13 - Ika

Isi Nke Mmẹtọ Amnọnụ E Mẹrụ Tama

¹ O mẹgụ, ihiẹn Tama nwa Defidi nọ sụọma Amnọnụ nwa-nẹdi ẹ. Tama wụ nwẹnẹ Absalọm nwa Defidi. Tama ma mma-ẹhụ ọda.

² Ẹhụ nọ ghanahịn Amnọnụ, ọ kụmadẹ emu, yeni Tama nwa-nẹdi ẹ. Makẹni nwagbọọ marịnlẹni okẹnnyẹ hụn wẹ ghalẹni e ye efe rọ, Amnọnụ erozini n'o k'a s'ẹka sọn ẹ ranhịn.

³ Ogẹnni, Amnọnụ nwọn ọwụ ohu w'a kpọ Jonadabụ; nwa Shimia nwẹnẹ Defidi rọ. Jonadabụ wụ onyẹ-akọ.

⁴ Ọ nọ jụ Amnọnụ, “Kị haịn ịyụ nwa eze gi e rọnmẹ ihun ụtụntụn ọwụlẹ? Y'a gwakọ m?” Amnọnụ nọ sị a, “Ihiẹn Tama nwẹnẹ Absalọm nwa-nẹdi m rị a sụọ m.”

⁵ Jonadabụ nọ sị a, “Shi nwan elu bẹdi; mẹ nọkẹsị emu rị a kụ ị. Nẹdi i bịa d'a hụn ị, sị a, ‘K'ọ rị m Tama nwẹnẹ m a bịa d'e ye m ihiẹn-oriri. Ya nọ idẹnya m shi ihiẹn-oriri hụ, nị m'e lee ẹ ebe ọ rị e shi ẹ, a nọ m ẹka a ri ẹ.’ ”

⁶ Ya Amnọnụ nọ dinẹ, mẹ kẹ sị emu rị a kụ a. Mgbe eze gi bịa d'a hụn a, Amnọnụ nọ sị a, “K'ọ rị m Tama nwẹnẹ m a bịa d'a nọ idẹnya m mẹmẹni m brẹdi pụ ichẹn, nị m hụn ụzọ nọ ẹka a ri ẹ.”

⁷ Defidi nọ zi ozi jẹnni Tama imẹ obi-eze, sị a, “Jẹn iwe Amnọnụ nwẹnẹ i d'e mẹmẹn'ẹ ihiẹn-oriri.”

⁸ Ya Tama nọ shi iwe nwẹnẹ ẹ wụ Amnọnụ, hụn dinẹni. Ọ nọ weri ọka wẹ gwegụ, ọ gwọ a; ọ kwademẹ ẹ ọhụnma; ọ nọ idẹnya a ebẹhụ gi ẹ kpụ brẹdi; ọ nọ shi ẹ.

⁹ Ọ nọ gha ihiẹn o gi shi ẹ hupụha brẹdi hụ buye ẹ. Kanị, Amnọnụ ekweni ri ẹ. Kama, Amnọnụ sị wẹ, “Chụpụ nị ịhịan ile ebeni.” Ya onyẹ ọwụlẹ nọ pụn'a.

¹⁰ Amnọnụ nọ sị Tama, “Bubanhan ihiẹn-oriri hụ mmughẹ m ebeni nị m hụn ụzọ nọ ẹka ị ri ẹ.” Tama nọ buru brẹdi hụ o mẹmẹ, bujẹnni Amnọnụ nwẹnẹ ẹ imẹ mmughẹ ẹ.

¹¹ Kanị, ogẹn Tama gi bu ẹ ye ẹ n'o ri, ọ nọ kwọndọn Tama, sị a, “Nwẹnẹ m, d'e sọn m ranhịn.”

¹² Tama nọ sị a, “Mbakwọ, nwẹnẹ m! Awal'a ye m olu. W'e mẹkwọ ẹnịna imẹ Izrẹlụ! Emẹkwọlẹ eje-ihiẹnni.

¹³ Elebe m'e zuemẹ ihun yeni ihiẹn-ifẹnrẹnni? Ịyụ nwẹn? O ru a gụn wẹ i ye ndị nwọnlẹni uche imẹ Izrẹlụ. Dodo, gwa nwan eze, ọ sịkọ m alụlẹ i.”

¹⁴ Kanị Amnọnụ ekweni gọn ẹ ntịn — kama, makẹni ya ka Tama ndụn e nwọn, ọ nọ wa a ye ẹ olu, mẹ mgba a.

¹⁵ Ya kẹ ize Tama nọ nwan ban Amnọnụ ọda-ọda, band'a karị kẹ ihiẹn ẹ te dọn sụọ a mbụ. Amnọnụ nọ sị a, “Lihi ọtọ! Pụ ebeni!”

¹⁶ Ọ nọ sị a, “Mbakwọ! Ị chụpụ m kakwọ njọ karị ihiẹn i mẹgụ m.” Kanị Amnọnụ ekweni gọn ẹ ntịn.

¹⁷ Ọ nọdẹ kpọ odibo ẹ, sị a, “Wepụ okpohoni ebeni, y'a kpọkin ụzọ.”

¹⁸ Odibo ẹ nọ wepụ Tama ezi, kpọkin ụzọ. Ẹwuru tueru alị wẹ gi ihiẹn ṅanrannị chọ mma kẹ Tama yi, makẹni ịya kẹ ịgbagba ụmụ eze e yi.

¹⁹ Tama nọ nwan bụọ ntụn ye isi, dọka ẹwuru-ọma hụ o te yi. Ọ nọ kị ẹka kwasị isi lama, kwankọ ẹkwan ọda-ọda, lakọ.

²⁰ Absalọm nwẹnẹ ẹ nọ sị a, “Amnọnụ nwẹnẹ i nọkunmẹ i? Gba nwan nkịtịn nwẹnẹ m; nwẹnẹ i kẹ Amnọnụ wụ. Anịlẹ ihiẹnni o mẹ sọngbu i.” Tama nọ biri iwe Absalọm nwẹnẹ ẹ, họnrin okpoho afịa jụ.

²¹ Ogẹn Eze wụ Defidi gi nụ ihiẹnni ile, ezigbo iwe nọ wẹ ẹ.

²² Absalọm nkẹ agwadẹni Amnọnụ kaka akpụ oku ohu, kẹ mma kẹ njọ — bụ ize Amnọnụ a bangụọ a makẹni o mẹrụ Tama nwẹnẹ ẹ.

Kẹ Absalọm Dọn Gbu Amnọnụ

²³ O zu ahụa ẹbụọ, ogẹn wẹ gi rị a kọpụhanị Absalọm ẹṅẹnrẹn atụnrụn a imẹ Baalụ-Hazọ, ẹhụ okẹn wẹ lẹ alị Ifrem, Absalọm nọ kpọ ụmụ-ikẹnnyẹ eze ile ebẹhụ d'e ri oriri rịn'a.

²⁴ Absalọm nọ jẹnburu eze wụ Defidi, sị a, “Mmẹ odibo i a kpọgụọ ndị sikọ d'a kọpụhanị m ẹṅẹnrẹn atụnrụn m. Eze dodo sọnjẹn m, yụ lẹ ịhaịmẹ ẹ mẹ ọhụnma bịa d'e du m ri, ra?”

²⁵ Eze nọ sị a, “Mba nwa m. Ẹnyi ile e jẹnchanrịnkọ, o ru ẹnyi a wụrụ i ibu olu.” Absalọm a rịọgbama a, ọ jụ; kanị ọ sị a n'ọ hụ a azụụn.

²⁶ Absalọm nọ sị a, “Omẹni y'e jẹnkọ, dodo nwan nị Amnọnụ nwẹnẹ m sọnjẹn ẹnyi.” Eze nọ sị a, “K'o sọnkọ ị d'e mẹ?”

²⁷ Kanị ogẹn Absalọm gi rịọkẹnmẹ ẹ, ọ nọ sị Amnọnụ lẹ ụmụ a ikẹnnyẹ họdụnị sọnmẹ ẹ.

²⁸ Absalọm nọ sị idibo ẹ, “Gọn ni ntịn! Hụn manya gi nwunyemẹ Amnọnụ ẹnya, m sịhụ ụnụ, ‘Gbu ni Amnọnụ,’ ụnụ e gbu ẹ. Atụkwọlẹ ni egun. Mmẹ gwa ụnụ — ẹlẹ ya? Atụlẹ ni egun; mẹn'ẹ.”

²⁹ Ya idibo Absalọm nọ mẹ Amnọnụ ihiẹn Absalọm sị wẹ m'ẹ. Ụmụ eze ile nọ felihi, tụkwasịsọnmẹ anyịnyan-mulu wẹ, gbama ọsọ.

³⁰ Kẹ wẹ rị ụzọ, ozi nọ ru eze wụ Defidi ẹhụ nị “Absalọm e gbuchanrịn ụmụ ị ikẹnnyẹ; akpụ onyẹ ohu ahọdụnị imẹ wẹ.”

³¹ Eze nọ felihi, tika ẹkwa a, tụha enwẹn ẹ ye akpakalị; idibo ẹ ile wuzochanrịn nwan ọtọ, wẹ nwẹn a dọkachanrịngụọ ẹkwa wẹ.

³² Kanị Jonadabụ, nwa nwẹnẹ Defidi wụ Shimia, nọ sị, “Di-nwọnni m, erolẹ ni ụmụ-ikẹnnyẹ i ile kẹ wẹ gbu; Amnọnụ sụọ nwụnhụn. Ọnwan wụ ihiẹn Absalọm rị e ku oku ẹ kete ụhụọhịn hụ Amnọnụ kwọn Tama nwẹnẹ ẹ, mẹ mgba a.

³³ Eze nwọnni m ya esọngbukwọlẹ enwẹn ẹ nị wẹ sị ikẹnnyẹ ile eze mụ a nwụnhụnchanrịn; Amnọnụ sụọ nwụnhụn.”

³⁴ Absalọm nkẹ a gbapụgụọ ogẹnni. Imẹ ọgwa Defidi, ogẹn onyẹ rị e che nche gi lee ẹnya, ọ nọ hụn ndị bu ọda gha ụzọ rị shikọ ẹbamịn ọdịdan-ẹnyanwụn kpọtula òke. Onyẹ-nche hụ nọ jẹn d'a gwa eze, sị a, “O nwọn ndị m rị e legha azụụn shi Horonaim, wẹ rị nkpọtu òke.”

³⁵ Jonadabụ nọ sị eze, “Lee ẹ, ụmụ eze e rugụọ ebeni! O mẹgụọ kẹ mmẹ odibo i dọn ku.”

³⁶ Hụn o gihụ kugụ a, ụmụ eze ndị ahụn nọ banhan, e goo; eze nkẹ lẹ idibo ẹ ile nọ kwan ezigbo ẹkwan.

³⁷ Kẹ Absalọm gbapụ, ọ nọ gbaburu eze alị Gẹshọ wụ Tal'maị nwa Amihudu. Kanị eze wụ Defidi hụ a kwan Amnọnụ nwa a ụhụọhịn-ụhụọhịn.

³⁸ Ogẹn Absalọm gi gbashi Tal'maị, ọ nọ nọdị ebẹhụ ahụa ẹtọ.

³⁹ O tebe, Absalọm nọ dama eze ọda-ọda, kẹ eze kwangụ Amnọnụ gharị.