Samuẹlụ Nke Ẹbụọ 12 - Ika

Isi Nke Mmẹbụọ Natanị A Jụgbọ Defidi

¹ Osolobuẹ nọ zi Natanị d'e kunrun Defidi. Ogẹn o gi ru ẹ, ọ nọ sị, “O nwọn ikẹnnyẹ ẹbụọ rị obodo ohu, ohu wụ ọdanfịn, ohu wụ ogbẹnnyẹ.

² Hụn ọdanfịn rịn'a nwọn atụnrụn lẹ efin bugbu enwẹn ẹ ọda,

³ kanị onwọnni ihiẹn hụn ogbẹnnyẹ rịn'a nwọn karị akpụ onyẹnnyẹ nwa atụnrụn ohu o ṅọn, ọ zụn a, ọ nọ nọ ẹka okẹnnyẹ ahụn lẹ ụmụ a suepụha. Atụnrụn hụ e sọndẹ ẹ e ri ihiẹn-oriri ọkpan ohu, a ra mirin imẹ mkpu ohu, a ranhịntọd'a ẹka. Atụnrụn ahụn te nọ a kẹ nwa a okpoho ẹhụ.

⁴ “O ru ụhụọhịn ohu, ọbịa nọ bịa iwe ọdanfịn ahụn; hụn nkẹ o gi weri atụnrụn nke ẹ mọbụ efin ẹ gbuni ọbịa a, ọ nọ weri akpụ onyẹnnyẹ atụnrụn ohu nwẹn hụn ogbẹnnyẹ nwọn, o gbu ẹ, gi lee hụn bịa d'e kunrunn'ẹ ọbịa.”

⁵ Okẹn olulu nọ bumẹ Defidi nị okẹnnyẹ hụ mẹ ihiẹn nọ ẹrịra; ọ nọ sị Natanị, “Ma Osolobuẹ, onyẹ mẹ ihiẹnni furu hụn a nwụnnị!

⁶ O k'a kụrịrị ụgwọ atụnrụn ahụn ụzọ ẹnọ, ebe ọ nọ mẹ ihiẹn nọ ẹrịra, o mẹni omikẹn!!”

⁷ Ya Natanị nọ sị Defidi, “Ịyụ wụ okẹnnyẹ hụ! Lee ihiẹn Osolobuẹ wụ Chuku Izrẹlụ ku, ọ sị, ‘Mmẹ tumẹ i eze Izrẹlụ, mmẹ zụọpụha ị ẹka Sọlụ hụn te chọ isi i.

⁸ E we m ụlọ di-nwọnni i ye i, bu inyẹnmẹ di-nwọnni i che i ẹka. E ye m'i ikpụlọ Izrẹlụ lẹ Juda kị. Omẹni ihiẹn ndịnị ile a rịka ntịn, nkẹ e yecheni m'i.

⁹ Kị haịn i gi lelịa oku Osolobuẹ, mẹ ihiẹn rịlẹni mma ẹnya a? Y'e gi ọpịa-agha gbu Yuria onyẹ Hẹti, weri nwunyẹ ẹ lụma. Ịyụ gbu ẹ ghahanị ọpịa-agha hụ ndị Amọnụ gi gbu ẹ.

¹⁰ Ufiri ẹ, ọpịa-agha egbubehikọ iwe i — makẹni i legberi m ebe ị nọ weri nwunyẹ Yuria onyẹ Hẹti lụma.’

¹¹ “Lee ihiẹn Osolobuẹ ku, ọ sị, ‘M jẹnkọ d'a gha ndị rị iwe i buhẹni i okẹn nsọngbu. M k'a nọ idẹnya ị weri inyẹnmẹ i ye onyẹ ẹhụ ị kẹti-kẹti, o sọn wẹ ranhịn efinnaị ifọnrinfọn.

¹² Nzuzue k'i nọ mẹ ẹ, kanị m k'e mẹ ihiẹnni efinnaị ifọnrinfọn, idẹnya Izrẹlụ ile.’ ”

¹³ Ya Defidi nọ sị Natanị, “E mẹọlẹ m Osolobuẹ njọ.” Natanị nọ sị, “Ẹghẹẹ, kanị Osolobuẹ a gbagharịgụọ ị njọ, isi i atọk'a.

¹⁴ Kanị, makẹni y'e yegụọ ndị-iṅẹnrẹn Osolobuẹ ihiẹn w'e gi kpari ẹ, nwata-okẹnnyẹ ahụn okpohoni mụn'ị k'a nwụnhụn.”

¹⁵ Ogẹn Natanị gi lamagụ, Osolobuẹ nọ tụ nwata hụ nwunyẹ Yuria mụnị Defidi emu.

¹⁶ Defidi a rịọ Osolobuẹ n'ọ zụọ nwata hụ; o bu ọnụ; ọ ban imẹ ụlọ a d'a nọdị; o dinẹ akpakalị eki e we fọn.

¹⁷ Ikẹnnyẹ-ọba rị ụlọ a nọ nọkunmẹ ẹ nị wẹ weli ẹ akpakalị ebẹhụ o dinẹ, kanị o kweni; o sọnni wẹ ri ihiẹn-oriri.

¹⁸ Hụn mẹ akpọhịn ẹsa, nwata ahụn nọ nwụnhụn. Egun anịnị ndị rị iwe Defidi gwa a nị nwata hụ a nwụnhụn, wẹ hụ a sị, “Kẹ nwata hụ kelẹni nwụn, ẹnyi a gwa Defidi oku, o gọnni ẹnyi ntịn. Nanị ẹnyi a dọn nwan gwa a nị nwata hụ a nwụnhụn? O ru tan o d'e mẹ ihiẹn wẹ ghalẹni e mẹ.”

¹⁹ Defidi a hụn kẹ ndị rị iwe ẹ rị a kagwasọnmẹ ibe wẹ, ọ nọ marịn nị nwata hụ a nwụnhụn. Ọ nọ jụ wẹ sị, “Nwata hụ a nwụnhụngụọ?” Wẹ nọ sị, “Ẹghẹẹ, ọ nwụnhụngụọ.”

²⁰ Defidi nọ gha akpakalị hụ o dinẹ lihi. Ọ wụgụ ẹhụ, kwọ udẹn, yipụ ẹkwa ndị o yi, yiri ichẹn, ọ nọ shi imẹ ụlọ Osolobuẹ d'e fe ofufe. Ya ọ nọ banye iwe ẹ, sị wẹ buhẹ ihiẹn-oriri, e buhẹ wẹ ẹ, ọ nọ ri.

²¹ Ndị rị iwe ẹ nọ jụma a sị, “K'ị rị e mẹni ẹnịna? Kẹ nwata hụ rị ndụn, i hụ e bu ọnụ, a kwan ẹkwan; ọ nwụnhụn nwan, y'e lihi ọtọ ri ihiẹn-oriri!”

²² Ọ nọ sị, “Kẹ nwata hụ kelẹni nwụn, m bu ọnụ, kwan ẹkwan. M te hụ a sị, ‘Onyẹ maị? Osolobuẹ nwọn ikẹn lee m ẹnya ihun, nị nwata hụ rị ndụn.’

²³ Hụnnị ọ nwụnhụngụ nwan, kị m'e bumẹzini ọnụ? Nị m sa nwan ẹka wekinhẹn ẹ? Mmẹ burukọ a, o kinhẹnkọzị d'e kunrun m.”

²⁴ Defidi nọ rọkọ nwunyẹ ẹ wụ Bat'shẹba obi — sọn ẹ ranhịn, ọ tụ imẹ, mụ okẹnnyẹ, wẹ nọ gụn a Solomọnụ. Ihiẹn ẹ nọ sụọ Osolobuẹ;

²⁵ makẹni ihiẹn ẹ sụọ Osolobuẹ, Osolobuẹ nọ zi onyẹ-amụma wụ Natanị d'a gụn a “Jedidia”.

Defidi E Jẹn D'e Mẹripụ Ndị Amọnụ

²⁶ Ogẹnni, Jụabụ nkẹ hụkwọ a lụ obodo Raba ndị Amọnụ agha; o mẹgụ, ya wụ obodo eze ndị Amọnụ bi nọ ban a ẹka.

²⁷ Ya Jụabụ nọ zi ozi jẹnni Defidi, sị a, “A lụsọngụọ m Raba ọgụn hụ. Ebe wẹ gha e nwọnhẹn mirin a bangụọ m ẹka.

²⁸ Kpọnrin nwan ndị-agha họdụnị d'e kehunmẹ obodo hụ n'i weri ẹ. Omẹni y'a bịanị, e mẹri m obodo hụ, weri ẹ, gụn a ẹfan m.”

²⁹ Ya Defidi nọ kịrị ndị-agha ile họdụnị, shi Raba, lụ a agha, weri ẹ.

³⁰ Ọ nọ weri okpu-eze rị eze wẹ isi, okpu-eze goru nyịnnahịn ẹkpa osikapa nta (35kg), hụn wẹ gisọnmẹ ọmụma pụ-ichẹn chọ mma; wẹ nọ bu ẹ che Defidi isi. Ọ kwarịzịghọ ihiẹn ọda-ọda imẹ obodo hụ;

³¹ o wepụha ndị ile rị ebahụn, ọ nọ ye wẹ ọrụn — kẹ ịwa-osisi kẹ ịwa-ọmụma kẹ ịwa-nkụn, o mẹ wẹ kpụsọnmẹ blọkụ. Ẹrịra k'o mẹ obodo ile rị Amọnụ. O mẹgụ, Defidi lẹ ndị-agha a ile nọ lakin Jerusalẹm.