Samuẹlụ Nke Ẹbụọ 11 - Ika

Isi Nke Mmanaị Defidi Lẹ Bat'shẹba Nwunyẹ Yuria

¹ Ogẹn ndị-nze gi e jẹn agha imẹ ahụa, Defidi nọ zi Jụabụ lẹ ndị-agha a lẹ ndị-agha Izrẹlụ ile. Wẹ nọ mẹri ndị alị Amọnụ, kehunmẹ isi-alị wẹ wụ Raba. Kanị Defidi nọdị Jerusalẹm.

² Ẹnyasị ohu, Defidi nọ gha ebe o dinẹ e zu ikẹn lihi ọtọ, ghahunmẹmẹ elu-ụlọ imẹ obi-eze ẹ. Ọ nọ gha elu ebahụn legha okpoho rị a wụ ẹhụ. Okpoho hụ ma mma ọda,

³ Defidi nọ zi onyẹ ohu d'a chọpụha onyẹ ọ wụ. Okẹnnyẹ hụ nọ sị, “Bat'shẹba nwa Ẹliam rọ, nwunyẹ Yuria onyẹ Hẹti.”

⁴ Defidi nọ zi wẹ d'a kpọha a. Ọ bịa d'e kunrun Defidi, Defidi nọ sọn ẹ ranhịn. O mẹgụ, ọ nọ lama. Okpoho hụ wụgụhụ ẹhụ-ezi kẹ iwu dọn ku.

⁵ Okpoho hụ nọ tụrụ imẹ, ọ nọ zi wẹ jẹnni Defidi, sị, “M rị imẹ.”

⁶ Ya Defidi nọ zi wẹ jẹnni Jụabụ ebe wẹ rị ọnụ-agha: “Zihẹni m Yuria onyẹ Hẹti.” Jụabụ nọ zihẹni Defidi ya.

⁷ Ogẹn Yuria gi bịa, Defidi nọ jụma a ukwere Jụabụ lẹ ndị-agha, jụzị a kẹ agha hụ nọ.

⁸ Defidi nọ nwan sị Yuria, “Jẹnru iwe i d'a wụ, y'e zu ikẹn ijẹn.” Ya Yuria nọ gha imẹ obi-eze pụ, wẹ nọ bu ihiẹn eze y'ẹ jẹnn'ẹ.

⁹ Kanị, ọnụ-mgbọn obi-eze kẹ Yuria ranhịn, ya lẹ ndị-ọrụn di-nwọnn'ẹ wụ Defidi; ọ lashini iwe ẹ.

¹⁰ Ogẹn wẹ gi sị Defidi, “Yuria alanị iwe ẹ,” ọ nọ jụ Yuria, “Ẹlẹ ụzọ ote k'ị ghahụ lala? Kị haịn i gilẹni jẹnru ụlọ?”

¹¹ Yuria nọ sị Defidi, “Ẹkpẹti-nsọ Osolobuẹ lẹ ndị-agha ẹnyi ghasọnmẹ Izrẹlụ lẹ Juda bịa rịsọnmẹ imẹ ọdụ ọgbọ agha, di-nwọnni m wụ Jụabụ lẹ ndị-agha yụ wụ eze nwọnni m hụ ogbe ebẹhụ. Nanị m'e dọn nwan shi iwe m d'e ri, ra, sọn nwunyẹ m ranhịn? Ma isi i, emẹkọkwọ m ihiẹn nọ ẹrịra!”

¹² Defidi nọ sị Yuria, “Nọdịzị ebeni akpọhịn ohu, eki e zikin m'i ọgbọ-agha.” Ya Yuria nọ nọdị Jerusalẹm ụhụọhịn ahụn lẹ hụn sọnn'ẹ.

¹³ Defidi nọ kpọ a nị wẹ ri, ọ nọ sọn Defidi ri, ra; Defidi nọ mẹ ẹ ra manya tụ. Kanị ọhị a gba, Yuria nọ pụ d'a ranhịnzị ute ẹ, o sọn idibo di-nwọnn'ẹ ranhịn; ọ lanị iwe ẹ.

¹⁴ Eki e fọn ụtụntụn, Defidi nọ de ẹkụkwọ-ozi, weye Yuria jẹnni Jụabụ.

¹⁵ Ihiẹn o de wụ, “Bu Yuria che ebe ọgụn kachanrịn ikẹn, y'e yen'ẹ efe, nị wẹ hụn ụzọ gbu ẹ, n'ọ nwụnhụn.”

¹⁶ Hụn ahụn Jụabụ kehunmẹ obodo hụ, ọ nọ bu Yuria che ebe ọ marịn nị ndị-agha Amọnụ kachanrịn e ze rị.

¹⁷ Ogẹn ndị-agha obodo hụ gi nwan pụha d'a lụsọn Jụabụ wẹ ọgụn, wẹ nọ gbu ndị wẹ gbu imẹ ndị-agha Defidi — Yuria onyẹ Hẹti rị ndị wẹ gbu.

¹⁸ Jụabụ nọ zi ozi jẹnni Defidi, gwachanrịn a kẹ agha hụ nọ.

¹⁹ Ọ sị onyẹ hụn o jẹnkọ d'e zi, “Ị gwachanrịngụ eze kẹ aghanị nọ,

²⁰ iwe nwọn ikẹn wemẹ eze; ikẹnkwọ ọ jụma, ‘Kị ụnụ nọkunmẹchanrịnnị mgbọn obodo hụ ẹrịra d'a lụ wẹ agha?! Ụnụ amarịn nị o ru a gha wẹ ụgba gbama ụta?!

²¹ Onyẹ gbu Abimẹlẹkị nwa Jeru-Bẹshẹti (Jerubalụ) wẹ gbu ogẹn mbụ? Ẹlẹ okpoho gha ibe elu ụgba ma a ẹka-ọlọ, hụn o gi nwụntọ Tẹbẹzi? Kị ụnụ nọkunmẹchanrịnnị mgbọn wẹ ẹrịra?!’ Ọ jụma ị ihiẹnni, y'a sị a, ‘Odibo i wụ Yuria onyẹ Hẹti rịzị ndị nwụnnị.’ ”

²² Onyẹ-ozi hụ nọ jẹnmẹ; o ru ẹ, ọ nọ gwachanrịn Defidi ihiẹn ile Jụabụ sị a ku.

²³ Ihiẹn ọ gwa Defidi wụ, “Ndị ahụn te karị ẹnyi ẹka, gha imẹ obodo wẹ ẹnyi kehunmẹ zụnpụha ibe ugbo d'a lụsọn ẹnyi agha, kanị ẹnyi nọ karị wẹ ẹka, wẹ nọ lakin azụụn d'e ru ọnụ-ụgba obodo wẹ.

²⁴ Ya ndị-ụta wẹ nọ gha elu ụgba gbama ẹnyi ndị idibo i ụta, gbagbu ndị wẹ gbagbu imẹ ndị-agha ị — odibo i wụ Yuria onyẹ Hẹti rị ndị nwụnnị.”

²⁵ Defidi nọ sị onyẹ hụ Jụabụ zihẹ, “Sị Jụabụ: ‘Anịlẹ ihiẹnni sọngbumẹ i; ẹrịra k'ọ rị — w'a marịn onyẹ ọpịa-agha jẹnkọ d'e ri. Lụsọnmẹ obodo hụ agha hụ d'e ru nị y'e tikpọ a.’ ” Defidi sịzị onyẹ-ozi hụ: “Gi okuni gba Jụabụ umẹ.”

²⁶ Ogẹn nwunyẹ Yuria gi nụ nị di ẹ a nwụnhụn, ọ nọ kwan a.

²⁷ Ogẹn wẹ gi a kwan ịhịan e zugụ, Defidi nọ webanhan a obi-eze, o họnrin nwunyẹ ẹ; ọ nọ mụnị Defidi okẹnnyẹ. Kanị ihiẹn Defidi mẹ asụọnị Osolobuẹ.