Rutu 3 - Ika

Isi Nke Ẹtọ Kẹ Nahomi Dọn Kwanị Rutu Ụzọ

¹ Ọ nọbe, nnẹ-di Rutu wụ Nahomi nọ sị a, “Nwa m, o rugụọ ogẹn m'e gi chọn'ị di n'o lepụ ị ẹnya, kẹn'ọ rịn'ị mma.

² E lee ẹ, nwẹnẹ ẹnyi wụ Bụazị hụd'a nwan, hụn yụ lẹ ịgbagba rị iwe ẹ gba a rụn ọrụn. Gọn nwan ntịn, o jẹnkọ ebe wẹ nọ a kụkpọ ọka uhinhinni d'a kụkpọ ọka-bali.

³ Wụ nwan ẹhụ, kwọ udẹn e shi ọhụnma, y'e yiri ẹkwa ị rị mma. Y'e shi ebẹhụ wẹ nọ a kụkpọ ọka. Kanị, anịkwọl'a marịn nị ị rị ebẹhụ d'e ru mgbe o rigụ, ragụ

⁴ O dinẹ, y'a kọma ebe o dinẹ ẹnya; y'e jẹn d'e kpushi ẹkwa o gi kpumẹ ụkụ a elu, y'e dinẹ ibe ụkụ a. I mẹhụ ẹrịra, ọ gwa ị ihiẹn i jẹnkọ d'e mẹ.”

⁵ Rutu nọ sị a, “M jẹnkọ d'e mẹ ihiẹn ọwụlẹ ị sị m mẹ.”

⁶ Ọ nọ jẹnmẹ ebẹhụ wẹ nọ a kụkpọ ọka. O ru ẹ, ọ nọ mẹ kẹ nnẹ-di ẹ sị a mẹ.

⁷ Ogẹn Bụazị gi rigụ, ragụ, ẹhụ e mẹgụ a gbẹdẹẹ, ọ nọ shi ụsụọ ikpọn ọka hụ wẹ kụkpọ d'e dinẹ. Ya Rutu nọ gehẹ ebe o dinẹ, kpushi ẹ ẹkwa o gi kpumẹ ụkụ elu, dinẹyen'ẹ.

⁸ O ru etintin abalị, okẹnnyẹ hụ nọ fetẹnhin, o gbehutọhụ: e lee okpoho dinẹ ibe ụkụ a!

⁹ Ọ nị sị, “Onyẹ wụ onyẹni?” Rutu nọ za, sị, “Mmẹ Rutu nwa ị rọ; kpumẹ nwa ị ẹkwa — nị ịyụ k'o ru k'a nọkin ẹnya di m.”

¹⁰ Ebẹhụ kẹ Bụazị nọ sị, “Osolobuẹ ya gọzi i nwa m! O teghọ ị ghọsịma n'i furu w'e gi dọn ẹnya, kanị hụnnị i mẹ kikẹnni ka: y'e shini ogbe d'a chọrị okorọbịa lụrụ — kẹ ọdanfịn kẹ ogbẹnnyẹ.

¹¹ Esọngbulẹ enwẹn i, nwa m; m jẹnkọ d'e mẹchanrịnn'ị ihiẹn ile ị rịọ m; ndị nke ẹnyi ile a marịnghọ n'ị wụ ezigbo okpoho.

¹² Ezioku rọ nị o rughọ m imẹ ebọn ẹnyi, kanị o nwọnghọ onyẹ o rukwasị.

¹³ Nọdị nwan ebeni uhinhinni; eki fọn, n'o kweri n'o k'e wuzon'i, ọ hụ mma, ya mẹ ẹ; kanị ọ sị ọ sakọ ẹka, ma Osolobuẹ, m k'e mẹ ẹ. Dinẹhụ nị eki fọngụ.”

¹⁴ Ya Rutu nọzị dinẹ ibe ụkụ a eki e we fọn. Kanị, ni eki d'e fọnchanrịn hụn wẹ gi e leghama ịhịan ọhụnma, o lihigụọ, makẹni Bụazị e kugụọ a sị, “Achọnị m nị ịhịan marịn nị okpoho bịa ebeni ẹnyi nọ a kụkpọ ọka.”

¹⁵ N'o d'a la, Bụazị nọ sị a, “Wẹhẹ ẹwuru i yiye elu ẹ ebeni, y'a gbama a.” Rutu nọ gbama a, ọ nọ mayen'ẹ adana ọka isin, bu ẹ che ẹ uvun. Ya lẹ enwẹn ẹ nọ shi imẹ obodo.

¹⁶ Rutu a lụaha, nnẹ-di ẹ nọ jụma a, sị, “Nanị k'i jẹn, nwa m?” Ya Rutu nọ gwachanrịn a ihiẹn ile Bụazị mẹn'ẹ.

¹⁷ Rutu nọzị sị, “Ọ mayezi m adana ọka isinni, sị m, ‘Agbalẹ ẹka laburu nnẹ-di i.’ ”

¹⁸ Nahomi nọ sị a, “Cheri nwa m, n'ị hụn kẹ okuni jẹnkọ d'a rị, makẹni Bụazị ezukọ ikẹn tannị d'e ru n'ọ hụn alị okuni.”