Rutu 2 - Ika

Isi Nke Ẹbụọ Rutu E Kunrun Bụazị

¹ Ogẹn hụ, o nwọn nwẹnẹ di Nahomi rịnị; ọdanfịn wẹ marịn-amarịn k'ọ wụ; onyẹ ebọn Ẹlimẹlẹki k'ọ wụ; ẹfan a wụ Bụazị.

² Ụhụọkịn ohu, Rutu onyẹ alị Mụabụ nọ sị Nahomi, “Nị m jẹn ibe wẹ nọ a rụn ugbo d'a chọ ọka-bali wẹ ghọghafe; m ru ẹ a chọ m onyẹ k'e mẹ omikẹn nị m ghọsọn ẹ.” Nahomi nọ sị a, “Jẹnmẹ, nwa m.”

³ Ya Rutu nọ jẹnmẹ. O ru ebe wẹ rị a ghọ ọka-bali, ọ nọ banye, ghọma ọka-bali ndị wẹ ghọghafesọnmẹ. Ọ nọ nwan mẹ ni ugbo Bụazị onyẹ ebọn Ẹlimẹlẹki k'ọ rị.

⁴ Imẹ ugbo ebẹhụ k'ọ rị kẹ Bụazị gha imẹ obodo Bẹt'lẹhẹm bịa. Bụazị nọ kele ndị-ọrụn a, sị wẹ, “Osolobuẹ ya nọyeni ọnụ-o!” Wẹ nọ za a, “Osolobuẹ ya gọz'i-o!”

⁵ Ebẹhụ kẹ Bụazị nọ jụma onyẹ kị ndị rị a ghọn'a ọka, sị, “Onyẹ nwọn nwagbọọ hụ?”

⁶ Hụn kị ndị rị a ghọn'a ọka nọ sị a, “Ịya wụ onyẹ alị Mụabụ hụ gha alị Mụabụ sọnlụa Nahomi.

⁷ Ọ rịọ m, sị m, ‘Dodo, nị m ghọrịsọnmẹ ọka ndị rị a ghọnị rị a ghọghafe.’ Ya k'ọ nọ banhan d'a ghọma; o ke zu ikẹn kete ụtụntụn, wezụka hụn ọ banye imẹ ọdụ d'a nọdị ẹkẹrẹ.”

⁸ O mẹgụ, Bụazị nọ sị Rutu, “Gọn ntịn nwa m, ẹlẹ hụn y'e gi jẹnmẹ ugbo ọzọ d'a ghọ; nọ ebeni ghọsọnmẹ: a ghọsọn ịgbagba ndịnị rị a ghọnị m ọka.

⁹ E lee ẹnya n'ị hụn ụzọ a marịn ebe wẹ rị a ghọ, y'a ghọsọn wẹ. A gwagụọ m ikorọbịa rị ebeni wẹ eyekwọlẹ i nsọngbu. Ẹgụn mirin gụnma ị, jẹn d'a nọ hụn wẹ gbatọ ra.”

¹⁰ Rutu nọ gbun'ẹ osekpu, sị a, “Kị m mẹ i gi e mẹni m ọhụnmanị ile, bụ m wụhụ abịamabịa?”

¹¹ Kanị, Bụazị nọ sị a, “A gwachanrịngụọ wẹ m ihiẹn ile i mẹni nnẹ-di i kete di i a nwụnlẹ lẹzi kẹ i dọnmẹ latọ nẹdi i lẹ nnẹ i, latọ alị ị, bịa d'e sọn ndị ị marịnlẹni mbụ biri.

¹² Osolobuẹ ya kụ ị ụgwọ ihiẹn-ọmanị ile i mẹ; ẹghẹẹ, Osolobuẹ wụ Chuku ndị Izrẹlụ, hụn i gbabanhan okpuru nku ẹ, ya kụ ị ụgwọ zu òke.”

¹³ Rutu nọ sị, “Diọkpa, ihun-ọmanị y'a kpọsọnmẹkwọ m ebe ị rị! Y'e mẹọlẹ obi ru m alị k'i dọn kuyeni m, ọ sụọn'a nị arị m ndị a rụnn'ị ọrụn.”

¹⁴ Ogẹn wẹ gi rị e ri ihiẹn-oriri, Bụazị nọ sị Rutu, “Bịa d'e sọn ẹnyi ri ihiẹn-oriri, y'e gi brẹdi suru manya.” Ya Rutu nọ sọn ndị rị a ghọ ọka nọdị, ri ihiẹn-oriri; Bụazị nọ kpọnye ẹ ọka wẹ ghe, ọ nọ ta, tajun ẹfọ, tahọdụ.

¹⁵ Ogẹn Rutu gi jẹnmẹ n'o d'a ghọmazị ọka wẹ ghọghafe, Bụazị nọ sị ndị ọrụn a, “Hapụ n'a, ọsụọdẹn'a n'ọ nọ ebe wẹ kelẹni ghọ ghọrị; ajụgbọkwọlẹ n'a.

¹⁶ Ẹlẹdẹ ọhụn sụọ: a nọ nị ukun ndị ụnụ betọ a tụtọsọnmẹn'ẹ n'ọ hụn ụzọ a tụtụrụ. Ajụgbọkwọlẹ n'a-o!”

¹⁷ Ya Rutu nọ nọ ugbo hụ ghọ d'e ru ẹnyasị. Ọ kụkpọ ọka-bali ọ ghọ, o jun mkpu-kọstadị uku isẹn.

¹⁸ Ya Rutu nọ gha ugbo bulụa ọka hụ imẹ obodo, nnẹ-di ẹ nọ hụn hụn ọ ghọlụa. Rutu nọzị wepụha ọka ọ tahọdụ ugbo Bụazị, we ẹ ye ẹ.

¹⁹ Nnẹ-di ẹ wụ Nahomi nọ sị a, “Elebe k'i nọ ghọ ọka tannị? Ugbo onyẹ k'i jẹn d'a ghọ ọka tannị? Osolobuẹ ya gọzi okẹnnyẹ ahụn lee i ẹnya ihun!” Rutu nọ gwa nnẹ-di ẹ onyẹ o jẹn ugbo ẹ d'a ghọ, sị, “Ẹfan onyẹ m jẹn ugbo ẹ d'a ghọ wụ Bụazị.”

²⁰ Nahomi nọ yi oro, sị Rutu, “Osolobuẹ ya nọye n'ẹ-oo! Ọ zọdẹni kẹ ndị nwụnnị kẹ ẹnyi ndị rị ndụn! Okẹnnyẹ hụ wụ nwẹnẹ ẹnyi, ẹnyi lẹ ịya e mẹkẹnmẹkẹ ohu: ọ rị imẹ ndị e wuzoni ebọn ẹnyi.”

²¹ Ya Rutu onyẹ alị Mụabụ nọ sị, “Ọ sịgụọdẹ m, ‘Nọdịyeni ịgbagba ndịnị a rụnnị m ọrụn, a ghọsọn wẹ, d'e ru mgbe wẹ ghọchanrịn ọka m!’ ”

²² Nahomi nọ sị Rutu nwunyẹ nwa a, “Ẹghẹẹ nwa m, ọ kakwọ mma ni y'e sọn ịgbagba ndị a rụnnị Bụazị ọrụn; makẹni, i jẹn ugbo ichẹn, anịkọ wẹ ẹhụ fu i.”

²³ Ya Rutu nọ rị e sọn ịgbagba hụ a rụnnị Bụazị ọrụn, a ghọsọn wẹ, d'e ru nị ogẹn ọka-bali lẹ ọka-witi a gụ. Ogẹn hụ ile, nke nnẹ-di ẹ k'o bi.